କନକ ବ୍ୟୁରୋ: ସେପ୍ଟେମ୍ବର ୪ ତାରିଖ, ମୁଖ୍ୟମନ୍ତ୍ରୀଙ୍କୁ କ୍ୟାପିଟାଲ ଫାଉଣ୍ଡେସନ ପକ୍ଷରୁ ଦିଆଯାଇଥିଲା ଜୀବନ ବ୍ୟାପି ସାଧନା ସମ୍ମାନ । କାର୍ଯ୍ୟକ୍ରମରେ ଯୋଗଦେବାକୁ ଯାଇଥିବା ବିଜେଡି ବିଧାୟକ ଫେରିବା ସମୟରେ ଦିଲ୍ଲୀ ବିମାନବନ୍ଦରରେ ମଦ୍ୟପାନ କରି ତୁମୁଳକାଣ୍ଡ କରିଥିବା ଜାତୀୟ ଗଣମାଧ୍ୟମରେ ରିପୋର୍ଟ ପ୍ରକାଶ ପାଇଛି । ଜାତୀୟ ଗଣମାଧ୍ୟମରେ ପ୍ରକାଶିତ ଖବରକୁ ଆଧାର କରି ଯୁବମୋର୍ଚ୍ଚା ସଭାପତି ଇରାଶିଶ ଆଚାର୍ଯ୍ୟ ସାଂଘାତିକ ଅଭିଯୋଗ ଆଣିଛନ୍ତି । ସେ ଯୁକ୍ତି ରଖିଛନ୍ତି, ମଦ୍ୟପାନ କରିଥିଲେ ବିଜେଡି ବିଧାୟକ ଏବଂ ବିଜୁ ଯୁବ ଜନତା ଦଳ ସଭାପତି । ଏପରିିକି ଇଣ୍ଡିଗୋ ପାଇଲଟଙ୍କ ସହ ଯୁକ୍ତିତର୍କ କରିଥିଲେ ବିଜେଡି ବିଧାୟକ । ଇଣ୍ଡିଗୋ ବିମାନରେ ବିଧାୟକ ଏବଂ ବିଜେଡି କର୍ମୀଙ୍କ ଲଗେଜ ଆସିଥିବାବେଳେ ସେମାନଙ୍କୁ ଆସିବାକୁ ଦିଆଯାଇନଥିଲା ।
Kanak News is now on WhatsApp
Join and get latest news updates delivered to you via WhatsApp
ସେପଟେ କଂଗ୍ରେସ କହିଛି, ବିଧିବ୍ୟବସ୍ଥାର ନିର୍ଣ୍ଣୟ କରୁଥିବା ବିଧାୟକ ଯଦି ଏଭଳି କାଣ୍ଡ କରନ୍ତି, ତେବେ ଏହା ନିନ୍ଦନୀୟ । ଆଉ ବିଜେପି ଓ କଂଗ୍ରେସର ଅଭିଯୋଗର ସତ୍ୟତା ଉପରେ ପ୍ରଶ୍ନ ଉଠାଇଛି ବିଜେଡି । ଅଭିଯୋଗର ସତ୍ୟତା ଥିଲେ ପ୍ରମାଣ ଦିଅନ୍ତୁ ଏବଂ ଏହାକୁ ଲୋକଲୋଚନକୁ ଆଣନ୍ତୁ ବୋଲି କହିଛି ବିଜେଡି ।
ଜାତୀୟ ଗଣମାଧ୍ୟମରେ ପ୍ରକାଶିତ ଖବର ଅନୁଯାୟୀ ବିମାନ ଯାତ୍ରା ପାଇଁ ବୋର୍ଡିଂ ସମୟ ଶେଷ ହୋଇଯାଇଥିବା ପରେ ବିଧାୟକ ଏବଂ କର୍ମୀ ମଦ୍ୟପାନ କରି ବିମାନକୁ ପ୍ରବେଶ କରିବାକୁ ଉଦ୍ୟମ କରିଥିଲେ । ଯାହା ଫଳରେ ବିମାନ ଅଧଘଣ୍ଟା ବିଳମ୍ବରେ ଦିଲ୍ଲୀ ବିମାନ ବନ୍ଦର ଛାଡିଥିଲା । ଏହି ଆଧାରରେ ବିଜେପି ଯୁବମୋର୍ଚ୍ଚା ସାମ୍ବାଦିକ ସମ୍ମିଳନୀ କରି ବିଜେଡିକୁ ଘେରିଛି ।