କନକ ନ୍ୟୁଜ୍: ଆଫଗାନିସ୍ତାନର ବଲ୍କ ଇଲାକାକୁ କବଜାରେ ନେବା ପରେ ଏଠାରେ ହିଂସା ଚଳାଇଛି ତାଲିବାନ୍ । ଏଠାରେ ଜଣେ ମହିଳା ଟଇଟ୍ ପୋଷାକ ପିନ୍ଧିବା ଓ ତାଙ୍କ ସହ କୌଣସି ପୁରୁଷ ନଥିବାରୁ ତାଙ୍କୁ ତାଲିବାନ୍ ଆତଙ୍କବାଦୀ ଗୁଳିମାରି ହତ୍ୟା କରିଥିବା ଅଭିଯୋଗ କରିଛି ସ୍ଥାନୀୟ ପୋଲିସ୍ ।
Kanak News is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ଘଟଣା ଉତ୍ତର ବଲ୍କର ସମର କାଦିୟାନ୍ ଅଂଚଳର, ଯାହା ଏବେ ସମ୍ପୂର୍ଣ୍ଣ ଭାବେ ତାଲିବାନର କବଜାରେ । ମୃତ ମହିଳା ଘରୁ ବଲ୍କ ରାଧାନୀ ମଜାର-ଏ-ଶରୀଫ୍କୁ ଯାଉଥିଲେ । ସେ ବସରେ ଚଢିବା ବେଳେ ଆତଙ୍କବାଦୀମାନେ ତାଙ୍କ ଉପରକୁ ଗୁଳିମାଡ କରିଥିଲେ । ଫଳରେ ଘଟଣାସ୍ଥଳରେ ତାଙ୍କର ମୃତ୍ୟୁ ହୋଇଥିବା ପୋଲିସ କହିଥିବାବେଳେ ତାଲିବାନ୍ କିନ୍ତୁ ଏହାକୁ ଅସ୍ୱୀକାର କରିଛି ।
କେବଳ ଏତିକି ନୁହେଁ ଆଫଗାନିସ୍ତାନରେ ତାଲିବାନ୍ ନିଜ ଆଧିପତ୍ୟ ବିସ୍ତାର କରିବା ପରେ ମହିଳାଙ୍କ ଉପରେ ଅତ୍ୟାଚାର କରିବା ଆରମ୍ଭ କରିଛି ।
ଦୈନିକ ସମ୍ବାଦ ‘ଦି ମେଲ’ର ରିପୋର୍ଟ ମୁତାବକ, କୌଣସି ଇଲାକୁ ଦଖଲକୁ ନେବା ପରେ ତାଲିବାନ୍ ଆତଙ୍କବାଦୀ ମହିଳାଙ୍କୁ ଅପହରଣ କରିବା ସହ ଜବରଦସ୍ତି ବିବାହ କରୁଛନ୍ତି । ବିଶେଷ କରି ତାଖାର ଓ ବଦାଖସାନ୍ ଅଂଚଳରୁ ଏପରି ଖବର ମିଳିଛି । ଏହାସହ ଏଠାରେ ନିଯୁକ୍ତ ପୋଲିସ କର୍ମଚାରୀ ଓ ସରକାରୀ କର୍ମଚାରୀଙ୍କୁ ତାଙ୍କୁ ସମର୍ପି ଦେବାକୁ ମଧ୍ୟ ଘୋଷଣା କରୁଛନ୍ତି । ଫଳରେ ଦଖଲରେ ଥିବା ଇଲାକର ଲୋକେ ନିଜ ଘରର ମହିଳା ମାନଙ୍କୁ କାବୁଲର ସୁରକ୍ଷିତ ସ୍ଥାନକୁ ପଠାଇଦେଉଥିବା ପ୍ରକାଶ ପାଇଛି ।