କଂଗ୍ରେସକୁ ଆଉ ଏକ ଝଟକା, ଦଳ ଛାଡିଲେ ପଞ୍ଜାବର ପୂର୍ବତନ ଅଧ୍ୟକ୍ଷ
କନକ ବ୍ୟୁରୋ : କଂଗ୍ରେସକୁ ପୁଣି ଏକ ବଡ ଝଟକା ଲାଗିଛି । ପଞ୍ଜାବ କଂଗ୍ରେସର ପୂର୍ବତନ ଅଧ୍ୟକ୍ଷ ତଥା ଦଳର ବରିଷ୍ଠ ନେତା ସୁନିଲ ଜାକଡ ଦଳ ଛାଡିବା ନେଇ ଘୋଷଣା କରିଛନ୍ତି । ସେ ତାଙ୍କର ଫେସବୁକ ପେଜରେ ଲାଇଭ ଆସି ଏଭଳି ଘୋଷଣା କରିଛନ୍ତି । ପଞ୍ଜାବ କଂଗ୍ରେସର ଏହି ବରିଷ୍ଠ ନେତା ଦଳ ଜାତିଗତ ସମିକରଣକୁ ଧ୍ୟାନରେ ରଖି କରାଯାଉଥିବା ରାଜନୀତିକୁ ବିରୋଧ କରି ଏଭଳି ନିଷ୍ପତ୍ତି ନେଇଛନ୍ତି । ସେ ଫେସବୁକ ଲାଇଭରେ ଅମ୍ବିକା ସୋନୀଙ୍କ ନାମ ନେଇ ଦଳର ହାଇକମାଣ୍ଡ ସୋନିଆ ଗାନ୍ଧୀ ତାଙ୍କ ଉପରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରିଥିଲେ ।
Kanak News is now on WhatsApp
Join and get latest news updates delivered to you via WhatsApp
କହିରଖୁ କି ଦଳୀୟ ଅନୁଶାସନ ଉଲଙ୍ଘନ ଅଭିଯୋଗରେ ଦଳର ହାଇକମାଣ୍ଡ କିଛିଦିନ ତଳେ ସୁନିଲ ଜାକଡଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରିଥିଲେ । ତାଙ୍କୁ ଦଳର ସମସ୍ତ ପଦ ପଦବୀରୁ ବହିସ୍କାର କରାଯାଇଥିଲା । ପଞ୍ଜାବ କଂଗ୍ରେସ ସୁନିଲ ଜାକଡଙ୍କୁ ଦଳରୁ ୨ ବର୍ଷ ପାଇଁ ବହିସ୍କୃତ କରିବାକୁ ହାଇକମାଣ୍ଡଙ୍କ ପାଖରେ ଆବେଦନ କରିଥିଲା । ହେଲେ ଏନେଇ ସୋନିଆ ଗାନ୍ଧୀ କିଛି ନିଷ୍ପତ୍ତି ନେବା ପୂର୍ବରୁ ସୁନିଲ ଜାକଡ ଗତକାଲି ଉଦୟପୁର ଠାରେ ଏକ ସାମ୍ବାଦିକ ସମ୍ମିଳନୀ କରିବାକୁ ନିଷ୍ପତ୍ତି ନେଇଥିଲେ । ହେଲେ ଶେଷ ସମୟରେ ସେ ଏହାର ପରିବର୍ତ୍ତନ କରି ଆଜି ଫେସବୁକରେ ଲାଇଭ୍ ଆସି ନିଜ ମନର କଥା କହିଛନ୍ତି ।