କନକ ବ୍ୟୁରୋ: ପାଖେଇ ଆସିଲାଣି ୨୦୨୪ ନିର୍ବାଚନ । କିଛି ଦିନ ପରେ ପଡିବ ଭୋଟ । ଦଳଗୁଡିକ ବାଛି ସାରିଛନ୍ତି ଉପଯୁକ୍ତ ପ୍ରାର୍ଥୀ । ଏଥରକ ନିର୍ବାଚନରେ ଏମିତି କିଛି ଚର୍ଚ୍ଚିତ ବ୍ୟକ୍ତି ଦେଖିବାକୁ ମିଳିବେ ଯେଉଁମାନେ ସିଲଭର ସ୍କ୍ରିନରେ କମାଲ କରି ଦର୍ଶକଙ୍କ ନିକଟରେ ଚିହ୍ନା ଚେହେରା ପାଲଟିଛନ୍ତି ଆଉ ଏବେ ଭୋଟ ମାଗୁଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଯଦି ତାଲିକା ଉପରେ ନଜର ପକାଇବା ତେବେ ସବୁଠୁ ଅଧିକ ଧ୍ୟାନ ଆକର୍ଷଣ କରିଛନ୍ତି ବଲିଉଡ ଅଭିନେତ୍ରୀ କଙ୍ଗନା ରାଣାୱତ । ହିମାଚଳ ପ୍ରଦେଶ ମଣ୍ଡି ଆସନ ପାଇଁ ପାଇଛନ୍ତି ବିଜେପି ଟିକେଟ । ପ୍ରାର୍ଥୀ ହେବା ପରେ ଜୋରଦାର ପ୍ରଚାର ଆରମ୍ଭ କରିସାରିଲେଣି । ଏଥିସହ ପୌରାଣିକ ଧାରାବାହିକ ରାମାୟଣରେ ପ୍ରଭୁ ରାମଙ୍କ ଚରିତ୍ରରେ ଅଭିନୟ କରି ସବୁ ବର୍ଗର ଦର୍ଶକଙ୍କ ହୃଦୟରେ ରାଜୁତି କରନ୍ତି ବରିଷ୍ଠ କଳାକାର ଅରୁଣ ଗୋଭିଲ । ବର୍ଷ ଆରମ୍ଭରୁ ଅରୁଣଙ୍କ ନାଁ ଚର୍ଚ୍ଚା ହେଉଥିବାବେଳେ ବିଜେପି ତାଙ୍କୁ ଉତ୍ତରପ୍ରଦେଶ ମେରଠରୁ ପ୍ରାର୍ଥୀ କରିଛି ।
ଚଳିତ ନିର୍ବାଚନରେ ଉଭୟ କଙ୍ଗନା ଓ ଅରୁଣ ଚର୍ଚ୍ଚିତ ଚେହେରା ରହିଛନ୍ତି । ତେବେ ବିଜେପି କିଛି ପୁରୁଣା ସେଲିବ୍ରେଟିଙ୍କ ଟିକେଟ ପୁଣି ଥରେ ଦେଇଛି ଯେଉଁମାନେ ପ୍ରଥମ ଇନିଂସରେ ସଫଳତା ପାଇଛନ୍ତି । ତାଲିକାରେ ସବୁଠୁ ଆଗରେ ରହିଛନ୍ତି କେନ୍ଦ୍ରମନ୍ତ୍ରୀ ସ୍ମୃତି ଇରାନୀ । ଆମେଠିରୁ ପୁଣି ଲଢ଼ିବେ ସ୍ମୃତି । ଗତଥର ରାହୁଲ ଗାନ୍ଧୀଙ୍କୁ ହରାଇଥିଲେ ବିଜେପିର ଏହି ହେଭିୱେଟ ନେତ୍ରୀ । ଟିଭି ଦୁନିଆର ଜଣେ ଲୋକପ୍ରିୟ କଳାକାର ଥିଲେ ସ୍ମୃତି ଇରାନୀ । ସେହିପରି ନିଜ କଥା କୁହା ଶୈଳୀ ପାଇଁ ଜଣାଶୁଣା ମନୋଜ ତିୱାରୀଙ୍କୁ ମିଳିଛି ଉତ୍ତର-ପୂର୍ବ ଦିଲ୍ଲୀ ଟିକେଟ । ବଲିଉଡ ଓ ଭୋଜପୁରୀ ଅଭିନେତା ରବି କିଶନ ମଧ୍ୟ ଆସ୍ଥା ଜିତି ପୁଣି ଥରେ ଟିକେଟ ହାତେଇଛନ୍ତି । ଗୋରଖପୁରରୁ ଲଢ଼ିବେ ରବି କିଶନ । ମଥୁରା ଆସନରେ ପୁଣି ଥରେ ଲଢ଼ିବେ ଡ୍ରିମଗର୍ଲ ହେମାମାଳୀନୀ ।ଜୋରଦାର ପ୍ରଚାର ସହ ହେମା ନିର୍ବାଚନ ମଇଦାନକୁ ଓହ୍ଲାଇସାରିଲେଣି ।
ସେଲିବ୍ରେଟିଙ୍କ ବିଜେପି ଟିକେଟ
- ଆଜମଗଡ଼ରୁ ଦିନେଶଲାଲ ଯାଦବ ଉର୍ଫ ନିରୁହା
- ତ୍ରିଶରରୁ ସୁରେଶ ଗୋପୀ
- ବିରୁଧନଗରରୁ ରାଧିକ ଶରତକୁମାର
- ହୁଗୁଳିରୁ ଲକେଟ ଚାର୍ଟାଜୀ
- ମେଦିନିପୁରରୁ ଅଗ୍ନୀମିତ୍ର ପଲ
- ଆସନସୋଲରୁ ପବନ ସିଂ
ବିଜେପି ସହ ପ୍ରତିଦ୍ୱନ୍ଦ୍ୱିତା କରୁଛି ତୃଣମୂଳ କଂଗ୍ରେସ । ତାରକା ଓ ପୂବର୍ତନ କ୍ରିକେଟରୁ ବିଭିନ୍ନ ଆସନ ପାଇଁ ପ୍ରାର୍ଥୀ କରିଛି ଟିଏମସି । ତାଲିକାରେ ଅଛନ୍ତି ଅନେକ ଲୋକପ୍ରିୟ ଚେହେରା ।
ସେଲିବ୍ରେଟିଙ୍କୁ ଟିଏମସି ଟିକେଟ
- ହୁଗୁଳିରୁ ରଚନା ବାର୍ନାଜୀ
- ଆସନସୋଲରୁ ଶତ୍ରୁଘ୍ନ ସିହ୍ନା
- ବହରମପୁର ପୂର୍ବତନ କ୍ରିକେଟର ୟୁସୁଫ ପଠାନ
- ଦୁର୍ଗାପୁରରୁ କ୍ରୀତି ଆଜାଦ
- ଯାଧବପୁରରୁ ସାୟୋନୀ ଘୋଷ
- ବୀରଭୂମରୁ ଶତାଦ୍ଦୀ ରୟ
କଳେ ବଳେ କୌଶଳେ ନିର୍ବାଚନରେ ଜିତ୍ ପାଇଁ ଦଳଗୁଡିକ ବଳ ଲଗାଇଛନ୍ତି । ନିଜ ନିଜର ରଣନୀତି ସହ ୨୦୨୪ ମହାଲଢ଼େଇକୁ ଓହ୍ଲାଇବେ ରାଜନୈତିକ ଦଳ । ତେବେ କଳାକାର, କ୍ରିକେଟ କିମ୍ବା ଅନ୍ୟ ଲୋକପ୍ରିୟ ଚେହେରାଙ୍କ ପ୍ରାର୍ଥୀ କରିବା ଏକାଧିକ ଫାଇଦା ରହିଛି । ପ୍ରଚାର ଦମଦାର ହେବ, ଜନତାଙ୍କ ନିକଟରେ ପହଁଚି ସହଜ ମଧ୍ୟ ହେବ । ତେବେ ଦେଖିବାକୁ ଅପେକ୍ଷା ରହିଲା ଦଳଗୁଡିକ ତାରକାଙ୍କ ଉପରେ ବିଶ୍ୱାସ ରଖି ଟିକେଟ ଦେବା ନିଷ୍ପତି ଆଗାମୀ ଦିନରେ କେତେ ସଫଳ ହେଉଛି ।