କନକ ବ୍ୟୁରୋ: ଜାଲ ସାର୍ଟିଫିକେଟ୍ ରାକେଟ ସାରା ଓଡିଶାରେ ବ୍ୟାପିଛି । ବଲାଙ୍ଗୀର ପରେ, କେନ୍ଦ୍ରାପଡା, ଢ଼େଙ୍କାନାଳ ଓ ଫୁଲବାଣୀରୁ ଆସିଛି ଜାଲ ସାର୍ଟିଫିକେଟ୍ ଦେଇ ଡାକ ବିଭାଗରେ ଚାକିରି ପାଇଁ ଆବେଦନ କରିଥିବାର ପ୍ରମାଣ । କେନ୍ଦ୍ରାପଡା ଜିଲ୍ଳାରେ ନକଲି ମାଟ୍ରିକ ସାର୍ଟିଫିକେଟ ଦେଇ ଡାକ ବିଭାଗରେ ଚାକିରି ପାଇଁ ଜଣେ ପ୍ରାର୍ଥୀ ଆବେଦନ କରିଥିବା ଜଣାପଡିବା ପରେ, ଆବେଦନକାରୀଙ୍କ ନାଁରେ କେନ୍ଦ୍ରାପଡା ଟାଉନ ଥାନାରେ ଏତଲା ଦିଆଯାଇଛି । ସେହିପରି ଫୁଲବାଣୀରେ ଜାଲ ସାର୍ଟିଫିକେଟ ଦେଇ ଡାକ ବିଭାଗରେ ଚାକିରି ପାଇଁ ୬ଜଣ ଆବେଦନକାରୀ ଆବେଦନ କରିଥିବା ସାମନାକୁ ଆସିବା ପରେ ସେମାନଙ୍କ ବିରୋଧରେ ଥାନାରେ ଫୁଲବାଣୀ ଡାକ ମଣ୍ଡଳ ତରଫରୁ ଏତଲା ଦିଆଯାଇଛି । ଢ଼େଙ୍କାନାଳରୁ ମଧ୍ୟ ଆସିଛି ସମାନ ଅଭିଯୋଗ ।
Kanak News is now on WhatsApp
Join and get latest news updates delivered to you via WhatsApp
ଫୁଲବାଣୀ ଡାକ ମଣ୍ଡଳ ଅଧିକାରୀଙ୍କ ସୂଚନା ଅନୁସାରେ, ପ୍ରାର୍ଥିମାନଙ୍କ ପ୍ରମାଣପତ୍ର ଯାଂଚ ବେଳେ ୬ଜଣଙ୍କ ପ୍ରମାଣପତ୍ର ଜାଲ ଥିବା ଜଣାପଡିଥିଲା । ସେଥିରୁ ୫ଜଣଙ୍କର ଆହ୍ଲାବାଦ ବୋର୍ଡର ସାର୍ଟିଫିକେଟ ହୋଇଥିବାବେଳେ, ଜଣଙ୍କର ଜାତୀୟ ମୁକ୍ତ ବିଶ୍ୱବିଦ୍ୟାଳୟର ସାର୍ଟିଫିକେଟ୍ ରହିଛି । ସେହିପରି ଭଦ୍ରକ ଜିଲ୍ଲା ଲୁଣିଆ ଗାଁର ଅନିତା ଜେନା, ନକଲି ସାର୍ଟିଫିକେଟ ଦେଇ ଚାକିରି ପାଇଁ କେନ୍ଦ୍ରାପଡାରେ ଆବେଦନ କରିଥିଲେ । କିନ୍ତୁ ସେ ଦେଇଥିବା ମାର୍କସିଟ୍ ସମସ୍ତଙ୍କୁ ଆଶ୍ଚର୍ଯ୍ୟ କରି ଦେଇଛି । ୟୁପିର ଏକ ବୋର୍ଡର ପାସ କରିଥିଲେ ବି ସାହିତ୍ୟରେ ଶହେରୁ ୯୯ ରଖିଛନ୍ତି ।
ଗ୍ରାମିଣ ଡାକ ସେବକ , ଶାଖା ପୋଷ୍ଟମାଷ୍ଟର ଓ ସହକାରୀ ପୋଷ୍ଟ ମାଷ୍ଟର ପଦରେ ନିଯୁକ୍ତି ପାଇଁ ସାରାଦେଶରେ ୪୦ ହଜାର ପୋଷ୍ଟ ବାହାରିଥିଲା । ଓଡିଶାରେ ୧୩୮୨ ପୋଷ୍ଟ ପାଇଁ ବିଜ୍ଞାପନ ବାହାରିଥିଲା । ଆଉ ୧୩୮୦ ଜଣଙ୍କୁ ମେରିଟ୍ରେ ଚୟନ କରାଯାଇଥିଲା ।
ମେରିଟରେ ଚୟନ ହୋଇଥିବା ପ୍ରାର୍ଥୀଙ୍କ ସାର୍ଟିଫିକେଟ ଯାଂଚ ବେଳେ ବଲାଙ୍ଗୀରରେ ନକଲି ବୋଲି ଜଣାପଡିଥିଲା । ଅଧିକାଂଶ ସାର୍ଟିଫିକେଟରେ ପିଲାମାନଙ୍କ ମାର୍କ ଶହେରୁ ୯୯ ରହିବା ଓ ଉତ୍ତରପ୍ରଦେଶ ବୋର୍ଡର ଅଧିକାଂଶ ହୋଇଥିବାରୁ ସନ୍ଦେହ ସୃଷ୍ଟି ହୋଇଥିଲା । ତାପରେ ପଚରାଉଚୁରାରୁ ସାମନାକୁ ଆସିଥିଲା ନକଲି ସାର୍ଟିଫିକେଟର ପୂରା କାହାଣୀ । ସ୍ଥାନୀୟ ଅଂଚଳରେ କୋଚିଂ ସେଂଟର ଚଳାଇଥିବା ମନୋଜ ମିଶ୍ର ମାଟ୍ରିକ ଠାରୁ ଆରମ୍ଭ କରି, ଡାକ୍ତର, ଇଞ୍ଜିିନିୟର ସବୁ ନକଲି ସାର୍ଟିଫିକେଟ ପ୍ରସ୍ତୁତ କରୁଥିଲେ । ତାପରେ ମାଷ୍ଟର ମାଇଣ୍ଡ ମନୋଜ ମିଶ୍ର ଓ ସହଯୋଗୀ ଆଲୋକ ଉଦ୍ଗାତଙ୍କ ସମେତ ୧୯ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି ବଲାଙ୍ଗୀର ପୋଲିସ ।
ଗିରଫ ହୋଇ ଜେଲ ଯାଇଥିବା ଜାଲ ସାର୍ଟିଫିକେଟ ର୍ୟାକେଟର ଚେର ବଲାଙ୍ଗୀରରୁ ଉତରପ୍ରଦେଶ ପର୍ଯ୍ୟନ୍ତ ଲମ୍ବିଥିଲା । ଆଉ ଏଥିଲେ ତାର ମାଷ୍ଟରମାଇଣ୍ଡ । ପୋଲିସ ଚଢ଼ାଉ ପରେ ଜବତ କରିଛି ପ୍ରାୟ ୪୧ଟି ଶିକ୍ଷାନୁଷ୍ଠାନର ପ୍ରାୟ ହଜାରରେ ଅଧିକ ଜାଲ ସାର୍ଟିଫିକେଟ୍ । କୁହାଯାଉଛି ଏହି ର୍ୟାକେଟ ସାରା ଓଡିଶାକୁ ବ୍ୟାପିଥିଲା । ଏହି ପ୍ରସଙ୍ଗ ଉଠାଇ ବିଧାନସଭାରେ ବର୍ଷିଛନ୍ତି ବିରୋଧୀ ।
ପୋଲିସର କହିବା ଅନୁସାରେ ଏହି ର୍ୟାକେଟ ୭ରୁ ୮ବର୍ଷ ହେଲାଣି ଚାଲିଥିଲା । ଯଦି ଏହା ସତ ହୋଇଥାଏ ତାହେଲେ ଜାଲ ସାର୍ଟିଫିକେଟ ଦେଇ ଅନେକ ଚାକିରି କରିଥାଇ ପାରନ୍ତି । ଆଉ ମେଧାବୀ ଯୁବକ-ଯୁବତୀ ଚାକିରିରୁ ବଂଚିତ ହୋଇଥାଇପାରନ୍ତି । ତେଣୁ ତଦନ୍ତ ହେବା ଅତି ଜରୁରୀ ।