ୟୁକ୍ରେନ ସହ ଯୁଦ୍ଧ ମଧ୍ୟରେ ନାଟୋକୁ ଋଷର ଚେତାବନୀ । ବେଲାରୁସରେ ପରମାଣୁ ଅସ୍ତ୍ର ନିୟୋଜିତ କରିବେ ପୁଟିନ୍
କନକ ବ୍ୟୁରୋ : ଋଷ ଓ ୟୁକ୍ରେନ ମଧ୍ୟରେ ଚାଲିଥିବା ଯୁଦ୍ଧ ଗୋଟିଏ ବର୍ଷରୁ ଅଧିକ ହୋଇଥିବା ବେଳେ ଏବେ ଋଷ ରାଷ୍ଟ୍ରପତି ଭ୍ଲାଦିମୀର ପୁଟିନ ଏକ ବଡ ଘୋଷଣା କରିଛନ୍ତି । ପୁଟିନ କହିଛନ୍ତି କି, ଏବେ ଋଷ ବେଲାରୁସ ଠାରେ ପରମାଣୁ ଅସ୍ତ୍ର ନିୟୋଜିତ କରିବ । ଏହା ନ୍ୟୁକ୍ଲିୟର ଟ୍ରିଟ ଆଇନର ଉଲଂଘନ ନୁହେଁ ବୋଲି ପୁଟିନ କହିଛନ୍ତି । ଆମେରିକା ଅନେକ ଦେଶରେ ନିଜର ପରମାଣୁ ଅସ୍ତ୍ର ନିୟୋଜିତ କରିଥିବା କଥା ପୁଟିନ କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
କେବଳ ସେତିକି ନୁହେଁ ପଶ୍ଚିମ ଦେଶ ସହ ବଢୁଥିବା ତିକ୍ତତା ଭିତରେ ୟୁକ୍ରେନକୁ ଅସ୍ତ୍ରଶସ୍ତ୍ର ଯୋଗାଉଥିବା ମାମଲାରେ ନାଟୋକୁ ଚେତାବନୀ ଦେଇଛନ୍ତି ପୁଟିନ୍ । ପୁଟିନ କହିଛନ୍ତି କି ଯେଉଁ ଦେଶମାନେ ୟୁକ୍ରେନକୁ ଅସ୍ତ୍ରଶସ୍ତ୍ର ଯୋଗାଉଛନ୍ତି ସେମାନଙ୍କୁ ଏହାର ପରିଣାମ ଭୋଗିବାକୁ ପଡିବ ।
ସେପଟେ ପୁଟିନଙ୍କର ଏଭଳି ନିଷ୍ପତ୍ତି ଉପରେ ଆମେରିକା ପ୍ରତିକ୍ରିୟ ଦେଇଛି । ଆମେରିକା ତରଫରୁ କୁହାଯାଇଛି କି, ଋଷ ପରମାଣୁ ଅସ୍ତ୍ରର ଧମକ ଦେଉଥିଲେ ବି ଏପର୍ଯ୍ୟନ୍ତ ଏହାର ବ୍ୟବହାର କରିବା ନେଇ ଋଷ ତରଫରୁ କୌଣସି ସଂକେତ ମିଳିନାହିଁ । ଏଣୁ ଆମେରିକା ତରଫରୁ ପରମାଣ୍ଡ ଅସ୍ତ୍ର ବ୍ୟବହାର ନେଇ ଥିବା ଯୋଜନାର କୌଣସି ପରିବର୍ତ୍ତନ କରାଯିବ ନାହିଁ ବୋଲି କୁହାଯାଇଛି ।
୧୯୯୦ ପରେ ପ୍ରଥମଥର ଦେଖିବାକୁ ମିଳିଛି କି ଋଷ ଅନ୍ୟ ଏକ ଦେଶରେ ନିଜର ପରମାଣୁ ଅସ୍ତ୍ରଶସ୍ତ୍ର ନିୟୋଜିତ କରିବାକୁ ଯାଉଛି । ସେପଟେ ବେଲାରୁସର ମୁଖ୍ୟ ଆଲେକଜାଣ୍ଡାର ଲୁକାଶୈକୋଙ୍କୁ ପୁଟିନଙ୍କ ନିକଟତର ବୋଲି କୁହାଯାଏ । ସେ ଋଷର ଏସ-୪୦୦ ଏୟାର ଡିଫେନ୍ସ ସିଷ୍ଟମ ଓ ଡସ୍କନ୍ଦର ମିସାଇଲ ସିଷ୍ଟମକୁ ଇନଷ୍ଟଲ କରିସାରିଛନ୍ତି । ଏହାକୁ ଋଷ ତରଫରୁ ବେଲାରୁସକୁ ୬ମାସ ପୂର୍ବରୁ ପଠାଯାଇଥିଲା ।