ରାହୁଲଙ୍କୁ ଉପହାରରେ କୋହଲି ଦେଲେ ୨ କୋଟିର କାର । ଜାଣନ୍ତୁ ନବଦମ୍ପତିଙ୍କୁ ଧୋନି ଓ ସଲମାନ ଦେଲେ କଣ?
କନକ ବ୍ୟୁରୋ : ଭାରତୀୟ କ୍ରିକେଟର କେ.ଏଲ ରାହୁଲ ଓ ବଲିଉଡ ଅଭିନେତ୍ରୀ ଆଥିୟା ସେଟ୍ଟୀ ଗତ ୨୩ ଜାନୁଆରୀରେ ବିବାହ ବନ୍ଧନରେ ବାନ୍ଧି ହୋଇଛନ୍ତି । ବଲିଉଡ ସୁପରଷ୍ଟାର ସୁନୀଲ ସେଟ୍ଟୀଙ୍କ ଖଣ୍ଡାଲା ସ୍ଥିତ ଫାର୍ମ ହାଉସରେ ଏହି ବିବାହ ଉତ୍ସବ ହୋଇଥିଲା । ତେବେ ଏହି ବିବାହକୁ ନେଇ ଏବେ ଚର୍ଚ୍ଚା ଜୋର ଧରିଛି । କାରଣ ନବଦମ୍ପତିଙ୍କୁ ଉପହାରରେ ଯାହା ମିଳିଛି ତାହା ଏହି ବିବାହକୁ ଆହୁରି ଚର୍ଚ୍ଚିତ କରିଛି । ଉଭୟ ରାହୁଲ ଓ ଆଥିୟାଙ୍କ ସର୍ମ୍ପକୀୟ ଓ ବନ୍ଧୁଙ୍କ ପାଖରୁ ମହଙ୍ଗା ଉପହାର ମିଳିଛି । ନ୍ୟୁଜିଲାଣ୍ଡ ବିପକ୍ଷ ସିରିଜ ପାଇଁ ଭାରତୀୟ କ୍ରିକେଟ ଟିମର ଅନେକ ଖେଳାଳି ରାହୁଲଙ୍କ ବିବାହ ଉତ୍ସବରେ ସାମିଲ ହୋଇପାରିନଥିଲେ । କିନ୍ତୁ ବିବାହକୁ ଆସିନଥିଲେ ମଧ୍ୟ ମହଙ୍ଗା ଉପହାର ଦେବାକୁ ଭୁଲିନଥିଲେ ରାହୁଲଙ୍କ ସାଥୀ ଖେଳାଳି । ଆଉ ଟିମମେଟ୍ ବିରାଟଙ୍କ ଗିଫ୍ଟକୁ ନେଇ ଅଧିକ ଚର୍ଚ୍ଚା ହେଉଛି ।
Kanak News is now on WhatsApp
Join and get latest news updates delivered to you via WhatsApp
ରାହୁଲଙ୍କ ଘନିଷ୍ଠ ଟିମମେଟ୍ ଭାବେ ଜଣାଶୁଣା ବିରାଟ ନ୍ୟୁଜିଲାଣ୍ଡ ସିରିଜ ପାଇଁ ବିବାହ ଉତ୍ସବରେ ସାମିଲ ହୋଇପାରିନଥିଲେ କିନ୍ତୁ ଉପହାରରେ ୨ କୋଟିରୁ ଅଧିକ ଟଙ୍କାର ବିଏମଡବ୍ଲୁ କାର ଗିଫ୍ଟ କରିଛନ୍ତି । ଜାତୀୟ ଗଣମାଧ୍ୟମରେ ପ୍ରକାଶିତ ରିପୋର୍ଟ ଅନୁଯାୟୀ, ବିରାଟ ବିଏମଡବ୍ଲୁର ଲାଟେଷ୍ଟ ମଡେଲର କାର ଗିଫ୍ଟ କରିଛନ୍ତି । ଏହି କାର ମାତ୍ର ୫.୪ ସେକେଣ୍ଡ ମଧ୍ୟରେ ଘଣ୍ଟା ପ୍ରତି ୧୦୦ କିଲୋମିଟର ବେଗରେ ଗତି କରିପାରିବ ।
ସେହିଭଳି ରାହୁଲଙ୍କ ବିବାହ ଉତ୍ସବରେ ପୂର୍ବତନ ଭାରତୀୟ ଅଧିନାୟକ ମହେନ୍ଦ୍ର ସିଂ ଧୋନି ସାମିଲ ହେବା ସହ ଉପହାରରେ ଏକ କାୱାସିକ୍ ବାଇକ ଦେଇଛନ୍ତି । ଯାହାର ମୂଲ୍ୟ ପାଖାପାଖି ୮୦ ଲକ୍ଷ ଟଙ୍କା ହେବ । ଏହା ଭାରତରେ କାୱାସିକ ମଡେଲର ସବୁଠୁ ମହଙ୍ଗା ବାଇକ୍ ବୋଲି କୁହାଯାଉଛି । ଯେହେତୁ ଧୋନୀ ନିଜେ ବାଇକ ଚଳାଇବାକୁ ଅଧିକ ପସନ୍ଦ କରନ୍ତି ତେଣୁ ରାହୁଲଙ୍କୁ ଉପହାରରେ ଏକ ବାଇକ ଦେଇଛନ୍ତି ।
ଗୋଟିଏ ପଟେ ରାହୁଲଙ୍କ ସାଥୀ ଖେଳାଳି ବିବାହ ଉପହାରରେ ଦାମୀ ଗାଡି, ବାଇକ ଦେଇଥିବା ବେଳେ ସୁନୀଲ ସେଟ୍ଟିଙ୍କ ନିମନ୍ତ୍ରଣକ୍ରମେ ବିବାହ ଉତ୍ସବରେ ସାମିଲ ହୋଇଥିବା ବଲିଉଡ ସୁପରଷ୍ଟାର ସଲମାନ ଖାନ୍ ମଧ୍ୟ ନବଦମ୍ପତ୍ତିଙ୍କୁ ଏକ ଅଡି କାର ଉପହାର ଦେଇଛନ୍ତି । ଯାହାର ମୂଲ୍ୟ ଦେଢ କୋଟି ଟଙ୍କାରୁ ଅଧିକ ରହିଛି । ସଲମାନ ଯେଉଁ ଅଡି କାର ଉପହାରରେ ଦେଇଛନ୍ତି ତାହା ମାତ୍ର ୫.୭ ସେକେଣ୍ଡରେ ଘଣ୍ଟାପ୍ରତି ୧୦୦ କିଲୋମିଟର ବେଗରେ ଗଡିପାରିବ । ଏହାର ସର୍ବାଧିକ ବେଗ ଘଣ୍ଟାପ୍ରତି ୨୫୦ କିଲୋମିଟର ରହିଛି । ସେହିଭଳି ଜ୍ୟାକି ଶ୍ରଫ୍ ନବଦମ୍ପତ୍ତିଙ୍କୁ ମହଙ୍ଗା ଘଡି ଉପହାରରେ ଦେଇଛନ୍ତି ।
ଏସବୁ ଭିତରେ ଜାତୀୟ ଗଣମାଧ୍ୟମରେ ପ୍ରକାଶିତ ରିପୋର୍ଟ ଅନୁଯାୟୀ, ଝିଅଙ୍କ ବାପା ଭାବେ ସୁନୀଲ ସେଟ୍ଟୀ ଉଭୟ ଆଥିୟା ଓ ରାହୁଲଙ୍କୁ ମୁମ୍ବାଇରେ ୫୦ କୋଟି ଟଙ୍କାର ଏକ ଘର ଉପହାରରେ ଦେଇଛନ୍ତି । ତେବେ ଏନେଇ ଉଭୟ ପରିବାର ପକ୍ଷରୁ କୌଣସି ସୂଚନା ମିଳିନାହିଁ । ଅନ୍ୟପଟେ ଆଇପିଏଲ ପରେ ରାହୁଲଙ୍କ ତରଫରୁ ବଡ ରିସେପସନ୍ ପାର୍ଟି ଦିଆଯିବ । ଯାହା ଫଳରେ ସମସ୍ତ କ୍ରିକେଟର ଓ ଫିଲ୍ମ ଜଗତ ସହ ଜଡିତ ବ୍ୟକ୍ତି ସାମିଲ ହୋଇପାରିବେ ।