ଋଷ ପର୍ଯ୍ୟଟକ ପାଭେଲଙ୍କ ମୃତ୍ୟୁ ଓ ଶବପୋଡ଼ାକୁ ନେଇ ଉଠିଲା ପ୍ରଶ୍ନ । କାହିଁକି ମୃତଦେହ ନେବାକୁ ରାଜି ହେଲେ ନାହିଁ ପରିବାର ଲୋକ?
କନକ ବ୍ୟୁରୋ: ଓଡିଶା ହୋଟେଲରେ ଦୁଇ ୠଷୀୟ ପର୍ଯ୍ୟଟକଙ୍କର କେମିତି ମୃତ୍ୟୁ ହେଲା? ଆତ୍ମହତ୍ୟା ନା ହତ୍ୟା ଏନେଇ ସସପେନ୍ସ ଲାଗି ରହିଥିବାବେଳେ ତରବରିଆ ଭାବେ ଉଭୟଙ୍କ ଶବକୁ ପୋଡି ଦେବାକୁ ନେଇ ଏବେ ସନ୍ଦେହ ବଢ଼ିବାରେ ଲାଗିଛି । କାରଣ ମୃତ୍ୟୁବରଣ କରିଥିବା ଋଷ୍ ନାଗରିକ ଭ୍ଲାଦିମିର ବିଦାନାଭ ଓ ପାଭେଲ ଆଣ୍ଟୋଭ ଉଭୟ ଖ୍ରୀଷ୍ଟଧର୍ମାବଲମ୍ବୀ ହୋଇଥିଲେ ବି ସେମାନଙ୍କ ଶବକୁ ହିନ୍ଦୁଙ୍କ ଭଳି ପୋଡି ଦିଆଯାଇଛି ।
Kanak News is now on WhatsApp
Join and get latest news updates delivered to you via WhatsApp
ତେବେ ଖ୍ରୀଷ୍ଟଧର୍ମାବଲମ୍ବୀଙ୍କ ମୃତ୍ୟୁ ପରେ ସେମାନଙ୍କ ଶବକୁ କବର ଦେବାର ପରମ୍ପରା ରହିଥିଲେ ବି ଏମିତି ଅନ୍ତିମ ସଂସ୍କାର କରିଦିଆଯାଇଛି । ରାୟଗଡା ପୋଲିସ ଓ ସ୍ଥାନୀୟ ମାଜିଷ୍ଟ୍ରେଟଙ୍କ ଉପସ୍ଥିତିରେ ଦୁଇ ଜଣଙ୍କ ଶବକୁ ପୋଡି ଦେଇଛି ପ୍ରଶାସନ । ଯାହାକୁ ନେଇ ପ୍ରଶ୍ନ ଉଠିବା ପରେ ମୁହଁ ଖୋଲିଛନ୍ତି ସ୍ଥାନୀୟ ତହସିଲଦାର । କହିଛନ୍ତି, ଶବଦାହ ପାଇଁ ଋଷ ଦୂତାବାସ ଅନୁମତି ଦେଇଥିଲା । ଏନେଇ ପୋଲିସ ତାଙ୍କୁ ଜଣାଇବା ପରେ ତାଙ୍କ ଉପସ୍ଥିତିରେ ଅନ୍ତିମ ସଂସ୍କାର କରାଯାଇଥିଲା ।
- ଶବ ନେବାକୁ ଚାହିଁନଥିଲେ ପରିବାର
- ‘ସାଥୀ ପର୍ଯ୍ୟଟକଙ୍କୁ ଦେଇଥିଲେ ଅନ୍ତିମ ସଂସ୍କାର ଦାୟିତ୍ୱ’
ଜାତୀୟ ଗଣାମଧ୍ୟମର ରିପୋର୍ଟ ଅନୁସାରେ ଋଷୀୟ ସାଂସଦ ପାଭେଲଙ୍କର ମୃତ୍ୟୁ ପରେ ତାଙ୍କ ସାଥୀରେ ଥିବା ଅନ୍ୟ ଦୁଇ ପର୍ଯ୍ୟଟକ ତାଙ୍କ ପରିବାରକୁ ଏନେଇ ଜଣାଇଥିଲେ । କିନ୍ତୁ ବିଡମ୍ବନା ଓ ଦୁଃଖର ବିଷୟ ଧନୀ ପାଭେଲଙ୍କ ଶବକୁ ନିଜ ଦେଶକୁ ଫେରାଇ ନେବାକୁ ତାଙ୍କ ପରିବାର ଲୋକ ଇଚ୍ଛା ପ୍ରକାଶ କରିନଥିଲେ । ଏପରିକି ସାଥିରେ ଥିବା ଅନ୍ୟ ଦୁଇ ଜଣଙ୍କୁ ଅନ୍ତିମ ସଂସ୍କାର ସାରି ଦେବା ପାଇଁ ମେଲ ଯୋଗେ ଜଣାଇଥିଲେ । ଆଉ ତାପରେ ପୋଲିସର ସହଯୋଗରେ ପାଭେଲଙ୍କ ଶବ ଦାହ କରାଯାଇଥିଲା । ତେବେ ପାଭେଲଙ୍କ ପରିବାର ଲୋକ ପ୍ରକୃତରେ ମେଲ କରିଥିଲେ କି ନାହିଁ ତାହା ସ୍ପଷ୍ଟ ହୋଇନାହିଁ । ପାଭେଲଙ୍କ ମୃତ୍ୟୁକୁ ନେଇ ସନ୍ଦେହ ବଢ଼ୁଥିବାରୁ, ମାମଲାର ତଦନ୍ତ କରୁଥିବା କ୍ରାଇମବ୍ରାଞ୍ଚ ଆଗାମୀ ଦିନରେ ମେଲର ସତ୍ୟତା ଖୋଜିବ ବୋଲି ବିଶ୍ୱସ୍ତ ସୂତ୍ରରୁ ଜଣାପଡିଛି ।
ଋଷ୍ ପର୍ଯ୍ୟଟକଙ୍କ ମୃତ୍ୟୁକୁ ନେଇ ସନ୍ଦେହ ବଢ଼ୁଥିବାବେଳେ ଆସିଛି ଶବ ବ୍ୟବଛେଦ ରିପୋର୍ଟ । ଦୁହିଁଙ୍କ ମଧ୍ୟରୁ ଜଣଙ୍କର ହୃଦଘାତରେ ମୃତ୍ୟୁ ହୋଇଥିବା ଜଣାପଡିଥିବାବେଳେ ସାଂସଦ ପାଭେଲଙ୍କ ବ୍ୟବଛେଦ ରିପୋର୍ଟ ପୋଲିସକୁ ଦିଆଯାଇଛି । ହେଲେ, ପାଭେଲଙ୍କର କେମିତି ମୃତ୍ୟୁ ହେଲା, ମୃତ୍ୟୁର କାରଣ କଣ, ସେ ବିଷୟରେ ଗୁମର ଖୋଲି ନାହାଁନ୍ତି ହସ୍ପିଟାଲ କର୍ତୁପକ୍ଷ କିମ୍ବା ପୋଲିସ ।
ଏପଟେ ମୃତ ପର୍ଯ୍ୟଟକଙ୍କ ଦୁଇ ସାଥୀଙ୍କୁ କ୍ରାଇମବ୍ରାଞ୍ଚର କଟକ ସ୍ଥିତ କାର୍ଯ୍ୟାଳୟକୁ ନିଆଯାଇ ପଚରାଉଚୁରା କରାଯାଉଛି । ତଦନ୍ତ ନସରିବା ପର୍ଯ୍ୟନ୍ତ ଓଡିଶା ନଛାଡିବାକୁ କ୍ରାଇମବ୍ରାଞ୍ଚ ପକ୍ଷରୁ ସେମାନଙ୍କୁ ନିର୍ଦ୍ଦେଶ ଦିଆଯାଇଛି । ସେମାନଙ୍କ ସହ ଗାଇଡ୍ ଜିତେନ୍ଦ୍ର ସିଂ ମଧ୍ୟ କ୍ରାଇମବ୍ରାଞ୍ଚରେ ହାଜର ହୋଇଛନ୍ତି । ତେବେ ଭାଷାଗତ ସମସ୍ୟା ରହୁଥିବାରୁ କ୍ରାଇମବ୍ରାଞ୍ଚ ଅନୁବାଦକଙ୍କ ସହଯୋଗ ଲୋଡିଥିବା ଜଣାପଡିଛି । ସୂଚନାଯୋଗ୍ୟ ଯେ, ଜନ୍ମଦିନ ପାଳନ କରିବାକୁ ଓଡିଶା ଆସିଥିବା ସାଂସଦ ପାଭେଲ ଅଚାନକ କାହିଁକି ଆତ୍ମହତ୍ୟା କଲେ ସେ ନେଇ ସନ୍ଦେହ ବଢ଼ିବାରେ ଲାଗିଛି । ପାଭେଲ ଆତ୍ମହତ୍ୟା କରିଛନ୍ତି ନା ଏହା ପଛରେ କିଛି ବଡ ଷଡଯନ୍ତ୍ର ରହିଛି ,ସେ ନେଇ ପ୍ରଶ୍ନ ଉଠିବାରେ ଲାଗିଛି ।