ଶ୍ରୀମନ୍ଦିର ପରିକ୍ରମା ପ୍ରକଳ୍ପ : ଆଜି ସୁପ୍ରିମକୋର୍ଟଙ୍କ ରାୟ; କାମ ଚାଲିବ ନା ବନ୍ଦ ହେବ, ତାକୁ ଅପେକ୍ଷା
କନକ ବ୍ୟୁରୋ : ଶ୍ରୀମନ୍ଦିର ପରିକ୍ରମା ପ୍ରକଳ୍ପ ମାମଲାର ଶୁଣାଣି ଶେଷ ହୋଇଛି । ଆଜି ଏହାର ରାୟ ପ୍ରକାଶ ପାଇବ । ଗୁରୁବାର ପାଖାପାଖି ଦେଢ଼ ଘଂଟା ଧରି ସୁପ୍ରିମକୋର୍ଟରେ ମାମଲାର ଶୁଣାଣି ହୋଇଥିଲା । ଦୁଇଟି ସ୍ୱତନ୍ତ୍ର ଲିଭ ପିଟିସନ୍ ଉପରେ ଶୁଣାଣି କରି ରାୟ ସଂରକ୍ଷିତ ରଖିଛନ୍ତି ସୁପ୍ରିମକୋର୍ଟ । ବିଚାରପତି ବିଆର୍ ଗଭାନି ଓ ଜଷ୍ଟି ହିମା କୋହଲିଙ୍କୁ ନେଇ ଗଠିତ ଖଣ୍ଡପୀଠଙ୍କ ନିକଟରେ ମାମଲାର ଶୁଣାଣି ହୋଇଥିଲା ।
Kanak News is now on WhatsApp
Join and get latest news updates delivered to you via WhatsApp
ପ୍ରଥମ ଆବେଦନକାରୀ ଅର୍ଦ୍ଧେନ୍ଦୁ କୁମାର ଦାସଙ୍କ ପକ୍ଷରୁ ଆଇନଜୀବୀ ମହାଲକ୍ଷ୍ମୀ ପାଭନୀ ଯୁକ୍ତି ଦର୍ଶାଇଥିଲେ ଯେ ‘ଆମସାର’ ଆଇନ୍ ଅନୁଯାୟୀ, ସଂରକ୍ଷିତ ଅଂଚଳରେ କୌଣସି ନିର୍ମାଣ କାର୍ଯ୍ୟ ଲାଗି ରାଜ୍ୟ ସରକାର କ୍ଷମତାପ୍ରାପ୍ତ କର୍ତ୍ତୃପକ୍ଷ ଠାରୁ ଅନୁମତି ନେବାକୁ ବାଧ୍ୟ । ସେ ଆହୁରି କୋର୍ଟ ରୁମରେ କହିଥିଲେ, ରାଜ୍ୟ ସରକାର ଏଥିପାଇଁ ଜାତୀୟ ସ୍ମାରକୀ ପ୍ରାଧିକରଣଙ୍କ ଠାରୁ ନୋ ଅବଜେକ୍ସନ ସାର୍ଟିଫିକେଟ୍ ଆଣିଛନ୍ତି । ହେଲେ ଆଇନ ଅନୁସାରେ ଏଏସଆଇ ହିଁ କୌଣସି ନିର୍ମାଣ କାମ ପାଇଁ ଏନଓସି ଦେବାକୁ କ୍ଷମତାପ୍ରାପ୍ତ ସଂସ୍ଥା । ନିରୀକ୍ଷଣ ରିପୋର୍ଟ କହୁଛି, ଖନନ ସ୍ଥଳରେ ଅପୂରଣୀୟ କ୍ଷତି ହୋଇଛି ।
ସେପଟେ ରାଜ୍ୟ ସରକାରଙ୍କ ପକ୍ଷରୁ ଅଶୋକ ପରିଡ଼ା, ପିନାକୀ ମିଶ୍ର ଓ କପିଲ ସିବଲ ପକ୍ଷ ରଖି କହିଥିଲେ, ସରକାର ବେଆଇନ୍ ଭାବେ କୌଣସି ଖନନ କାର୍ଯ୍ୟ କରୁନାହାନ୍ତି । ରାଜ୍ୟ ସରକାରଙ୍କ ଓକିଲ ଯୁକ୍ତି ରଖିଥିଲେ ଯେ, ଆମସାର ଆଇନ ଅନୁସାରେ ନ୍ୟାସନାଲ ମନୁମେଣ୍ଟ ଅଥରିଟି ଏବଂ ରାଜ୍ୟ ସରକାରଙ୍କ ସଂସ୍କୃତି ବିଭାଗର ନିର୍ଦ୍ଦେଶକ କ୍ଷମତାପ୍ରାପ୍ତ ସଂସ୍ଥା । ଶ୍ରୀମନ୍ଦିର ପାଖରେ କରାଯାଉଥିବା କାମ ଆଇନ ଅନୁସାରେ ନିର୍ମାଣ ନୁହେଁ । ଡ୍ରେନ କାମ, ଲୋକଙ୍କ ପାଇଁ ଶୌଚାଳୟ ତିଆରି କିମ୍ବା ପାଣି ଯୋଗାଣ ପାଇଁ ମରାମତି କାମ ଆଇନ ଅନୁସାରେ ନିର୍ମାଣ କାମ ଭିତରେ ଆସୁନାହିଁ ।
ରାଜ୍ୟ ସରକାର କେବଳ ଭକ୍ତଙ୍କୁ ସୁବିଧା ଦେବାକୁ ଚାହୁଁଛନ୍ତି, ଯେଉଁଥିପାଇଁ ଏନଏମଏର ଅନୁମତି ରହିଛି । ସମସ୍ତ ପକ୍ଷଙ୍କର ତର୍କ ଶୁଣିବା ପରେ ଖଣ୍ଡପୀଠ ରାୟକୁ ସଂରକ୍ଷିତ ରଖିଥିଲେ । ସୂଚନାଯୋଗ୍ୟ, ଶ୍ରୀ ଜଗନ୍ନାଥ ପ୍ରକଳ୍ପ କରିଡରରେ ବେଆଇନ୍ ନିର୍ମାଣ କରାଯାଉଥିବା ଅଭିଯୋଗ କରି ତଥା ହାଇକୋର୍ଟଙ୍କ ଆଦେଶ ବିରୋଧରେ ମେ’ ୨୭ ତାରିଖରେ ସର୍ବୋଚ୍ଚ ନ୍ୟାୟାଳୟରେ ଦୁଇଟି ଏସଏଲପି ଦାଖଲ କରାଯାଇଥିଲା ।