କନକ ବ୍ୟୁରୋ: ଲୋୟର ପିଏମଜିରେ ବିଜେପି ଯୁବମୋର୍ଚ୍ଚା ଓ ପୋଲିସ ଖଣ୍ଡଯୁଦ୍ଧର ତାତି ବିଧାନସଭାରେ ଦେଖିବାକୁ ମିଳିଛି । ବିଜେପି ଯୁବମୋର୍ଚ୍ଚାର କର୍ମୀଙ୍କ ଉପରେ ପୋଲିସ ମାତ୍ରାଧିକ କାର୍ଯ୍ୟାନୁଷ୍ଠାନ କରିଥିବା ଅଭିଯୋଗ ଆଣି ଗୃହରେ ହଙ୍ଗାମା କରିଛନ୍ତି ବିଜେପି ସଦସ୍ୟ । ଗୃହକାର୍ଯ୍ୟ ଆରମ୍ଭରୁ ବାଚସ୍ପତିଙ୍କ ପୋଡିୟମ ତଳେ ପେପର କଟିଂ ଦେଖାଇ ପ୍ରତିବାଦ କରିଛନ୍ତି । ବିରୋଧୀଙ୍କ ହଙ୍ଗାମା ଯୋଗୁଁ ପ୍ରଶ୍ନକାଳ, ଶୂନ୍ୟକାଳ ଚାଲିପାରିନଥିଲା । ଗୃହକୁ ବାରମ୍ବାର ମୁଲତବୀ କରିଥିଲେ ବାଚସ୍ପତି । ବିରୋଧୀ ଦଳ ମୁଖ୍ୟ ସଚେତକ କହିଛନ୍ତି, ପୁଲିସ ଗୁଣ୍ଡାରାଜ ଚଲାଇଛି । ମିଛ ଅଭିନୟ କରି ପୁଲିସ କର୍ମଚାରୀ ହସ୍ପିଟାଲରେ ଆଡମିଶନ ହୋଇଛନ୍ତି । ଆକ୍ରମଣ କରି ଓଲଟା ୩୦୭ଦଫା ଲଗାଇବା ଦୁର୍ଭାଗ୍ୟଜନକ । ଜବାବ ଦେଇ ବିଜେଡି ବିଧାୟକ କହିଛନ୍ତି, ବିଜେପି କର୍ମୀ ପୁଲିସ ସହ ଗଣ୍ଡଗୋଳ କରିବାକୁ ପୂର୍ବ ପ୍ରସ୍ତୁତି ହୋଇଆସିଥିଲେ ।
Kanak News is now on WhatsApp
Join and get latest news updates delivered to you via WhatsApp
ଆନ୍ଦୋଳନବେଳେ କିଏ କାହାକୁ ମାରିଛି? ପୋଲିସ ନା ବିଜେପି ଯୁବମୋର୍ଚ୍ଚା କର୍ମୀ, କିଏ ଗୁଣ୍ଡାରାଜ କରିଛି? ଏନେଇ ଚର୍ଚ୍ଚା ଭିତରେ ଗିରଫ ହୋଇ ଜେଲରେ ଥିବା ବିଜେପି ଯୁବମୋର୍ଚ୍ଚା କର୍ମୀଙ୍କୁ ଭେଟିଛନ୍ତି ବିଜେପି ନେତା । ବିଜେପି ରାଜ୍ୟ ସଭାପତିଙ୍କ ନେତୃତ୍ୱରେ ବିଜେପିର ଏକ ଟିମ୍ ଭୁବନେଶ୍ୱର ଝାରପଡା ଜେଲ ଗସ୍ତ କରି ଗିରଫ ଯୁବମୋର୍ଚ୍ଚାର କର୍ମୀଙ୍କୁ ଭେଟିଛନ୍ତି । ସେପଟେ, ଏସସିବି ହସ୍ପିଟାଲ ଯାଇ ଚିକିତ୍ସିତ ହେଉଥିବା ପୋଲିସ କର୍ମଚାରୀଙ୍କୁ ଭେଟିଛନ୍ତି ପୋଲିସ କମିଶନର ।
ଖଣ୍ଡଯୁଦ୍ଧକୁ ନେଇ ବିଜେପି ଯୁବ ମୋର୍ଚ୍ଚା କର୍ମୀଙ୍କ ବିରୋଧରେ, କାର୍ଯ୍ୟରତ ପୋଲିସ କର୍ମଚାରୀଙ୍କୁ ବାଧା ଦେବା, ଆକ୍ରମଣ କରିବା, ହତ୍ୟା ଉଦ୍ୟମ, ଜୀବନରୁ ମାରିବାକୁ ଧମକ ଦେବା, ହିଂସା ଘଟାଇବା, ସର୍ବସାଧାରଣ ସମ୍ପତି ନଷ୍ଟ କରିବା ଭଳି ସଙ୍ଗୀନ ଦଫା ଲାଗିଛି । ଆଇପିସିର ଦଫା, ୧୪୭, ୨୯୪, ୩୫୩, ୩୨୩, ୩୩୨, ୩୨୫, ୩୦୭, ୫୦୬, ୧୪୮, ୧୪୯, ୨୨୪, ୩୩୩ ଲଗାଇଛି ପୋଲିସ । ଏଥିସହ ପୁଲିସକୁ ମାଡ ମାରିଥିବା ଅନ୍ୟମାନଙ୍କୁ ଧରିବା ପାଇଁ ଚଢ଼ାଉ ଜାରି ରଖିଛି କମିଶନରେଟ୍ ପୋଲିସ । ଯାହାକୁ ନେଇ ସରଗରମ ହୋଇଛି ରାଜନୀତି । ଅଭିଯୁକ୍ତ ପୋଲିସ କର୍ମଚାରୀଙ୍କ ଗିରଫ ଦାବିରେ ରାତି ସାରା କ୍ୟାପିଟାଲ ଥାନା ସମ୍ମୁଖରେ ଧାରଣା ଦେଇଥିଲା ବିଜେପି । ସାଧା ପୋଷାକଧାରୀ ପୋଲିସ ବିଜେପି କର୍ମୀଙ୍କ ଉପରେ ଆକ୍ରମଣ କରିବା ସହ ମହିଳା କର୍ମୀଙ୍କୁ ଅସଦାଚରଣ କରିଥିବା ଦଳ ଅଭିଯୋଗ କରିଛି । ବିଜେଡି ପ୍ରେସମିଟ୍ କରି କହିଛି, ପୋଲିସମାନେ ନିଜ କର୍ତ୍ତବ୍ୟରେ ନ୍ୟସ୍ତ ଥିବାବେଳେ ସବୁ ସୀମା ପାର କରିଥିଲେ ବିଜେପି ଯୁବ ମୋର୍ଚ୍ଚା କର୍ମୀ ।
ଆଇନଶୃଙ୍ଖଳା ପରିସ୍ଥିତିକୁ ନେଇ କୌଣସି ରାଜନୈତିକ ଦଳ ଆନ୍ଦୋଳନ କରିବା, ନୂଆ କଥା ନୁହେଁ । ପୋଲିସ ଓ ଆନ୍ଦୋଳନକାରୀ ମୁହାଁମୁହିଁ ହେବା, ଧସ୍ତାଧସ୍ତି ହେବା ବି କିଛି ନୂଆ କଥା ନୁହେଁ । କିନ୍ତୁ ଆନ୍ଦୋଳନ ସମୟରେ, ଢେଲାପଥର ମାଡ କରିବା, ତଳେ ପକେଇ ବିଧା – ଗୋଇଠା ମାରିବାର ଦୃଶ୍ୟ ଶାନ୍ତିପ୍ରିୟ ରାଜ୍ୟ ଓଡିଶାବାସୀଙ୍କ ଭିତରେ ଭିନ୍ନ ପ୍ରତିକ୍ରିୟା ସୃଷ୍ଟି କରୁଛି ।