କନକ ବ୍ୟୁରୋ: ଋାହୁଲ ଗାନ୍ଧୀଙ୍କ ନେତୃତ୍ୱରେ ଭାରତ ଯୋଡ ଯାତ୍ରା କଂଗ୍ରେସ ପାଇଁ ସଞ୍ଜିବନୀ ହୋଇଥିବା ବେଳେ ଏବେ ପୂର୍ବରୁ ପଶ୍ଚିମକୁ ଯାତ୍ରା କରିବାକୁ ଦଳ ଯୋଜନା କରୁଛି । ରାୟପୁରରେ ଚାଲିଥିବା ୮୫ତମ ମହାଅଧିବେଶନରେ ଏହି ସୂଚନା ଦେଇଛନ୍ତି ଭାରତ ଯୋଡଯାତ୍ରାର ଆବାହକ ଜୟରାମ ରମେଶ । କହିଛନ୍ତି କଂଗ୍ରେସ ଏବେ ଅରୁଣାଚଳ ପ୍ରଦେଶରୁ ଗୁଜାରଟକୁ ପଦଯାତ୍ରା କରିବା ଉପରେ ବିଚାର ବିମର୍ଶ କରୁଛି । ଅନ୍ୟପଟେ ରାୟପୁରରେ ମହାଅଧିବେଶନକୁ ସମ୍ବୋଧିତ କରି ରାହୁଲ ଗାନ୍ଧୀ ଚୀନ ସହ ସୀମା ବିବାଦଠୁ ଆରମ୍ଭ କରି ସଂସଦରେ ଅଦାନୀ ପ୍ରସଙ୍ଗ ଓ ୨୦୨୪ ସାଧାରଣ ନିର୍ବାଚନ ପ୍ରସଙ୍ଗ କଥା ଉଠାଇଛନ୍ତି । ସିଧାସଳଖ ପ୍ରଧାନମନ୍ତ୍ରୀଙ୍କୁ ଟାର୍ଗେଟ କରି ଆଦାନୀ ପ୍ରସଙ୍ଗ ଉଠାଇ କେନ୍ଦ୍ର ଉପରେ ବର୍ଷିିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସେପଟେ ଅଧିବେଶନକୁ ସମ୍ବୋଧନ କରି ପ୍ରିୟଙ୍କା ଗାନ୍ଧୀ କେନ୍ଦ୍ର ସରକାରଙ୍କୁ ଟାର୍ଗେଟ କରିବା ସହ ୨୦୨୪ ପାଇଁ ବୀଜମନ୍ତ୍ର ଦେଇଛନ୍ତି । ନିର୍ବାଚନ ପାଇଁ ପାଖାପାଖି ବର୍ଷେ ସମୟ ରହିଥିଲା ବେଳେ ସବୁ ବିରୋଧୀଙ୍କୁ ଏକଜୁଟ ହେବାକୁ ପ୍ରିୟଙ୍କା ଆହ୍ୱାନ ଦେଇଛନ୍ତି । ମହାଅଧିବେଶନରେ ୟୁପିଏ ଅଧ୍ୟକ୍ଷା ସୋନିଆ ଗାନ୍ଧୀ ସକ୍ରିୟ ରାଜନୀତିରୁ ଅବସର ନେବା ସଙ୍କେତ ପରେ ଏହାକୁ ନେଇ କଳ୍ପନା ଜଳ୍ପନା ପ୍ରକାଶ ପାଇଛି । ରାଜନୈତିକ ମହଲରେ ଚାଲିଥିବା ଏହି ଚର୍ଚ୍ଚା ଯଦି ସତ ହୁଏ ତେବେ ଆଗାମୀ ନିର୍ବାଚନ କଂଗ୍ରେସ ପାଇଁ କଣ ହେବ ଓ ଜାତୀୟ ରାଜନୀତିର ଏହାର ପ୍ରଭାବ କଣ ପଡିବ ।
ଏହି ପ୍ରଶ୍ନର ଉତ୍ତର ଏବେ କଂଗ୍ରେସ ଖୋଜିବ । ସୋନିଆ ସକ୍ରିୟ ରାଜନୀତିରୁ ଅବସର ନେଲେ ଉତ୍ତରପ୍ରଦେଶରେ କଂଗ୍ରେସର ଗଡ ରାୟବରେଲିରେ ମଧ୍ୟ ଚେହେରା ବଦଳାଇବାକୁ ପଡିବ । ରାହୁଲ ଆମେଠିରୁ ନିର୍ବାଚନ ଲଢୁଥିବାରୁ ରାୟବରେଲିରୁ ପ୍ରିୟଙ୍କା ଲଢିବା ସମ୍ଭାବନା ଅଧିକ । କାରଣ ୟୁପିକୁ ଛାଡିଦେଲେ ଦିଲ୍ଲୀ ଗାଦିରେ ପହଞ୍ଚିବା ସମ୍ଭବ ନୁହେଁ । ରାୟପୁରରେ ଚାଲିଥିବା କଂଗ୍ରେସର ମହାଅଧିବେଶନରେ ପ୍ରିୟଙ୍କାଙ୍କ ସ୍ୱାଗତ ପାଇଁ କଂଗ୍ରେସ କର୍ମୀ ୨ କିଲୋମିଟର ରାସ୍ତାରେ କାର୍ପେଟ ଭଳି ଗୋଲାପ ବିଛାଇବା ପ୍ରିୟଙ୍କା ସପକ୍ଷରେ ମଧ୍ୟ ମତ ଦେଉଛି ।