ଆଦିବାସୀଙ୍କ ଜୀବନ ଜୀବିକାର ମାଧ୍ୟମ ପାଲଟିଛି ମହୁଲ ଚାଷ । ମହୁଲରୁ ଲଡୁ ପ୍ରସ୍ତୁତ କରି ହେଉଛନ୍ତି ଲାଭବାନ
କନକ ବ୍ୟୁରୋ : ଆଦିବାସୀଙ୍କ ଜୀବନ ଜୀବିକାର ମାଧ୍ୟମ ପାଲଟିଛି ମହୁଲ.. । ଆଦିବାସୀ ମହିଳାଙ୍କୁ ଆତ୍ମନିର୍ଭର କରାଇବା ପାଇଁ ଓଡ଼ିଶା ଜୀବିକା ମିଶନ ଓ ବସୁନ୍ଦରାର ମିଳିତ ସହଯୋଗରେ ଆରମ୍ଭ ହୋଇଛି ନୂଆ ପ୍ରୟାସ । ମହୁଲରୁ କିଭଳି ଲଡ଼ୁ ପ୍ରସ୍ତୁତ କରି ଏହାକୁ ବଜାରରେ ବିକ୍ରି କରିପାରିବେ ସେଥିପାଇଁ ମହିଳାଙ୍କୁ ଦିଆଯାଉଛି ସ୍ୱତନ୍ତ୍ର ତାଲିମ । ବିଶେଷକରି ମାର୍ଚ୍ଚ ମାସରୁ ଏପ୍ରିଲ ମାସ ଭିତରେ ପାହାଡ଼ ପର୍ବତ ଘେରା ଫୁଲବାଣୀ ଅଂଚଳରେ ପ୍ରଚୁର ପରିମାଣ ଫୁଲ ହୋଇଥାଏ । ଏହାକୁ ସଂଗ୍ରହ କରି ବ୍ୟବସାୟୀଙ୍କୁ ବିକ୍ରି କରିଥାଆନ୍ତି ଆଦିବାସୀ । ଏଥିପାଇଁ ତାଙ୍କୁ ଅଧିକାଂଶ ସମୟରେ ଉଚିତ୍ ମୂଲ୍ୟ ମିଳିନଥାଏ । ଏବେ ମହୁଲରୁ ଲଡ଼ୁ ପ୍ରସ୍ତୁତ କରି ବକ୍ରି କରିବା ଦ୍ୱାରା ମହିଳା ବେଶ ଲାଭବାନ ହୋଇପାରିବେ ।
Kanak News is now on WhatsApp
Join and get latest news updates delivered to you via WhatsApp
ତେବେ ଲଡ଼ୁ ପ୍ରସ୍ତୁତ କରିବା ପାଇଁ ପ୍ରଥମେ ସଂଗ୍ରହ କରିଥିବା ମହୁଲକୁ ଭଲଭାବେ ଖରାରେ ସୁଖାଇ ସାଇତି ରଖିଥାଆନ୍ତି ମହିଳା । ଏହା ପରେ ଫୁଲ ଗୁଡ଼ିକରୁ ପାଖୁଡ଼ା ଛଡ଼ାଇ ଭାଜି ଗୁଡ଼ରେ ପାଗ କରାଯାଏ । ଭଜା ମହୁଲକୁ ସ୍ୱାଦ ଅନୁସାରେ ରାଶି ଓ ବାଦାମ ମିଶାଯାଇଥାଏ । ଯାହା ଅନ୍ୟ ମିଠା ଠାରୁ ବେଶ ସ୍ୱାଦିଷ୍ଟ । ଲଡ଼ୁ ପ୍ରସ୍ତୁତ କରିବା ପରେ ଏହାକୁ ଜରିରେ ପ୍ୟାକିଂ କରି ବିକ୍ରି କରିବାକୁ ପଠାଯାଏ । ଏକ କିଲୋ ମହୁଲରେ ୩୦ଟି ଲଡୁ ତିଆରି ହେଉଥିବା ବେଳେ ତାହା ବଜାରରେ ୧୫୦ ଟଙ୍କାରେ ବିକ୍ରି କରାଯାଉଛି । ଏସ.ଏଚ.ଜି ଗୃପ୍ ମାଧ୍ୟମରେ ଫୁଲବାଣୀ ଓ ସ୍ଥାନୀୟ ବଜାରରେ ବିକ୍ରି କରି ଲାଭବାନ ହେଉଛନ୍ତି ।
ସାଧାରଣତଃ ନିରିହ ଆଦିବାସୀ ମାନେ ଜଙ୍ଗଲଜାତ ଜିନିଷ ସଂଗ୍ରହ କରି ସେମାନଙ୍କ ଜୀବନ ଜୀବିକା ନିର୍ବାହ କରନ୍ତି । ମାର୍ଚ୍ଚ ଏପ୍ରିଲ ମାସର ଟାଣ ଖରାରେ ଜଙ୍ଗଲରୁ ମହୁଲ କରନ୍ତି । କେତେବେଳେ ମହୁଲରୁ ମଦ ପ୍ରସ୍ତୁତ କରନ୍ତି ତ ପୁଣି କେତେବେଳେ ମହୁଲକୁ ବିକ୍ରି କରି ଉଚିତ୍ ମୂଲ୍ୟ ପାଇପାରନ୍ତି ନାହିଁ । ଆଦିବାସୀଙ୍କ ଜୀବନ ଧାରଣରେ ଉନ୍ନତି ଆଣିବା ସହ ସେମାନଙ୍କ ଆର୍ଥିକ ସ୍ଥିତିର ବିକାଶ ପାଇଁ ଏଭଳି ପ୍ରୟାସ ଏକ ସ୍ୱାଗତ ଯୋଗ୍ୟ ପଦକ୍ଷେପ ବୋଲି କୁହାଯାଉଛି ।