ଆସାମର ଷ୍ଟାର ହୋଟେଲରେ ଡେରା ପକାଇଛନ୍ତି ମହାରାଷ୍ଟ୍ର ବିଦ୍ରୋହୀ ବିଧାୟକ । ହୋଟେଲରେ ରହିବା ଖର୍ଚ୍ଚ ୫୬ ଲକ୍ଷ । ଦିନକୁ ଖାଇବା ଖର୍ଚ୍ଚ ୮ ଲକ୍ଷ ।
କନକ ବ୍ୟୁରୋ: ମହାରାଷ୍ଟ୍ରର ରାଜନୀତିରେ ଏବେ ଘଡିକେ ଘୋଡା ଛୁଟୁଛି । ସମୟ ଯେତିକି ଆଗକୁ ବଢୁଛି ବିଦ୍ରୋହୀ କ୍ୟାମ୍ପ ସେତିକି ସେତିକି ଅଧିକ ସୁଦୃଢ ହେଉଛି ଆଉ ଉଦ୍ଧବ ଠାକରେଙ୍କ ଟେନସନ ବି ବଢିବାରେ ଲାଗିଛି । ତେବେ ବର୍ତ୍ତମାନ ସମସ୍ତ ବିଦ୍ରୋହୀ ବିଧାୟକ ଆସାମରେ ଡେରା ପକାଇଥିବାବେଳେ ତାଙ୍କ ପାଇଁ ପାଣି ଭଳି ଟଙ୍କା ଖର୍ଚ୍ଚ ହେଉଛି ।
Kanak News is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ମୁତାବକ, ବିଦ୍ରୋହୀ ବିଧାୟକଙ୍କ ଖାଇବା ଆଉ ରହିବା ପାଇଁ ହିଁ କେବଳ ଖର୍ଚ୍ଚ ହେଉଛି ୧.୧୨ କୋଟି ଟଙ୍କା । ଏକନାଥ ସିନ୍ଦେଙ୍କ ସହିତ ବିଦ୍ରୋହୀ ବିଧାୟକମାନେ ଏବେ ଗୌହାଟୀର ରେଡିଏସନ୍ ବ୍ଲୁ ହୋଟେଲର ରହିଛନ୍ତି । ଏହି ହୋଟେଲରେ ଏବେ ୭୦ଟି ରୁମକୁ ବୁକ୍ କରିଛନ୍ତି ଏକନାଥ ସିନ୍ଦେ । ତେବେ ଗୋଟିଏ କି ଦୁଇ ଦିନ ନୁହେଁ, ବରଂ ଆଗାମୀ ୭ ଦିନ ପାଇଁ ଏହି ହୋଟେଲର ରୁମକୁ ବୁକ୍ କରାଯାଇଛି । ଯେଉଁଥିପାଇଁ କେବଳ ୫୬ ଲକ୍ଷ ଟଙ୍କା ଖର୍ଚ୍ଚ ହେବ । ତା ସହିତ ବିଧାୟକଙ୍କ ଖାଇବା ପାଇଁ ଓ ଅନ୍ୟ ସର୍ଭିସ ପାଇଁ ଦିନକୁ ଖର୍ଚଚ୍ ହେଉଛି ୮ ଲକ୍ଷ ଟଙ୍କା । ତେଣୁ ସେହି ହିସାବ ଅନୁସାରେ ୭ ଦିନ ପାଇଁ ୫୬ ଲକ୍ଷ ଟଙ୍କା ଖର୍ଚ୍ଚ ହେବ । ତେଣୁ ଏହାକୁ ମିଶାଇ ବିଦ୍ରୋହୀ ବିଧାୟକଙ୍କ ଖାଇବା ଓ ରହିବା ପାଇଁ କେବଳ ୧.୧୨ କୋଟି ଟଙ୍କା ଖର୍ଚ୍ଚ ହେଉଥିବା ସୂଚନା ମିଳିଛି ।
ଗୌହାଟୀର ଏହି ହୋଟେଲରେ ଏବେ ଏକନାଥ ସିନ୍ଦେଙ୍କ ସହିତ କେତେ ଜଣ ବିଧାୟକ ଅଛନ୍ତି ତାହା ଠିକ୍ ଭାବେ ଜଣାପଡିନି । ହେଲେ ଏହି କଥା ସତ ଯେ, ସମୟ ବଢିବା ସହିତ ବିଦ୍ରୋହୀ କ୍ୟାମ୍ପରେ ବିଧାୟକଙ୍କ ସଂଖ୍ୟା ବଢିବାରେ ଲାଗିଛି । ସୂଚନା ମୁତାବକ, ସିନ୍ଦେଙ୍କ ପାଖରେ ଏବେ ୩୭ ଶିବସେନା ବିଧାୟକଙ୍କ ସମର୍ଥନ ରହିଥିବାବେଳେ, ୭ ଜଣ ସ୍ୱାଧୀନ ବିଧାୟକଙ୍କର ମଧ୍ୟ ସମର୍ଥନ ରହିଛି । ତେଣୁ ଏହାକୁ ମିଶାଇ ମୋଟ ୪୬ ବିଧାୟକ ଏବେ ଆସାମର ରେଡିଏସନ୍ ବ୍ଲୁ ହୋଟେଲରେ ରହିଛନ୍ତି ।
ସୂଚନାଯୋଗ୍ୟ ଯେ, ଗତକାଲିଠୁ ଉଦ୍ଧବ ସରକାର ନରମ ସ୍ୱଭାବ ଦେଖାଉଥିବା ଦେଖିବାକୁ ମିଳିଛି । ବିଦ୍ରୋହୀ ବିଧାୟକମାନେ ମହାରାଷ୍ଟ୍ର ଆସି କଥାବାର୍ତ୍ତା କରିବାକୁ କୁହାଯାଇଛି । ସଞ୍ଜୟ ରାୱତ ଏପରି ମଧ୍ୟ କହିସାରିଛନ୍ତି ଯେ, ବିଦ୍ରୋହୀ ବିଧାୟକ ଚାହିଁଲେ ଶିବସେନା ଏମଭିଏ ମେଣ୍ଟରୁ ମଧ୍ୟ ଅଲଗା ହୋଇଯିବ । ହେଲେ ଉଦ୍ଧବଙ୍କର କୌଣସି ସର୍ତ୍ତରେ ଏବେ ସୁଦ୍ଧା ସିନ୍ଦେଙ୍କ ବିଦ୍ରୋହୀ ଟିମ ରାଜି ହୋଇନି ।
ଅନ୍ୟପଟେ ଉଦ୍ଧବ ବିଧାନସଭା ଉପ-ବାଚସ୍ପତିଙ୍କୁ ଚିଠି ଲେଖି ସିନ୍ଦେଙ୍କ ସମେତ ୧୨ ଜଣ ବିଧାୟକଙ୍କୁ ଅଯୋଗ୍ୟ ଘୋଷିତ କରିବାକୁ ଦାବି କରିଛନ୍ତି । ଯାହା ପରେ ସିନ୍ଦେ ମଧ୍ୟ ବିଧାନସଭା ଉପ-ବାଚସ୍ପିତଙ୍କୁ ଚିଠି ଲେଖି ତାଙ୍କୁ ଶିବସେନାର ବିଧାୟକ ଦଳ ନେତା ଘୋଷଣା କରିବାକୁ ଦାବି କରିଛନ୍ତି । ଯାହା ଫଳରେ ମହାରାଷ୍ଟ୍ର ରାଜନୀତି ଆହୁରି ରୋଚକ ହେବାରେ ଲାଗିଛି ।