ଲୁଲୁ ମଲରେ ନମାଜ ପଢାକୁ ନେଇ ଲଙ୍କାକାଣ୍ଡ । ହନୁମାନ ଚାଳିଶା ପଢିବାକୁ ଯାଇଥିବା ବେଳେ ୧୫ ଜଣଙ୍କୁ ଉଠାଇନେଲା ପୋଲିସ
କନକ ବ୍ୟୁରୋ : ଉତ୍ତର ପ୍ରଦେଶ ରାଜଧାନୀ ଲକ୍ଷ୍ନୌ ଠାରେ ଥିବା ଲୁଲୁ ମଲରେ ନମାଜ ପଢା ମାମଲା ଥମିବାର ନାଁ ନେଉନି । ଗୋଟିଏ ପଟେ ମଲ ଭିତରେ ନମାଜ ପଢୁଥିବା ଲୋକଙ୍କ ନାମରେ ମାମଲା ରୁଜୁ ହୋଇଛି ତ ଅନ୍ୟପଟେ ମଲ ନିକଟକରେ ହନୁମାନ ଚାଳିଶା ଓ ସୁନ୍ଦରକାଣ୍ଡ ପଢିବାକୁ ଯାଇଥିବା ଲୋକଙ୍କ ମଧ୍ୟରୁ ୧୫ ଜଣଙ୍କୁ ପୋଲିସ ନିଜ ହେପାଜତକୁ ନେଇଛି ।
Kanak News is now on WhatsApp
Join and get latest news updates delivered to you via WhatsApp
ସୂଚନା ମୁତାବକ ଲୁଲୁ ମଲରେ ନମାଜ ପଢାଯିବାକୁ ନେଇ କିଛି ହିନ୍ଦୁବାଦୀ ସଂଗଠନ ଆଜି ମଲ ଆଗରେ ଭାରି ମାତ୍ରାରେ ବିରୋଧ ପ୍ରଦର୍ଶନ କରିଥିଲେ । ଏହାସହ ସେଠାରେ କିଛି ଲୋକ ହନୁମାନ ଚାଳିଶା ଓ ସୁନ୍ଦରକାଣ୍ଡ ବି ପଢିବା ଆରମ୍ଭ କରିଦେଇଥିଲେ । ଏସବୁକୁ ଦେଖି ପୋଲିସ ତୁରନ୍ତ ପ୍ରଦର୍ଶନ କରୁଥିବା ହିନ୍ଦୁବାଦୀ ସଂଗଠନର କିଛି ଲୋକଙ୍କୁ ଗାଡିରେ ବସାଇ ନିକଟସ୍ଥ ଥାନାକୁ ନେଇ ଯାଇଛି । କୁହାଯାଉଛି କି ଏବେ ଏବେ ପୁଣି କରଣୀ ସେନାର କିଛି କର୍ମୀ ସେହି ମଲ ଆଗରେ ପହଂଚି ବିକ୍ଷୋଭ ପ୍ରଦର୍ଶନ କରିବା ଆରମ୍ଭ କରିଦେଇଛନ୍ତି ।
ସେପଟେ ଏସବୁକୁ ନଜରରେ ରଖି ପୋଲିସ ପକ୍ଷରୁ ଲୁଲୁ ମଲ ଅଞ୍ଚଳରେ ଧାରା ୧୪୪ ଲାଗୁ କରିଛି । ପୋଲିସ ପକ୍ଷରୁ କୁହାଯାଇଛି କି ଏହି ମଲ ପରିସରରେ ନା କେହି ନମାଜ ପଢିପାରିବେ ନା କେହି ହନୁମାନ ଚାଳିଶା ପଢିପାରିବେ । ଯେଉଁମାନେ ଏଭଳି କରିବାକୁ ଚେଷ୍ଟା କରିବେ ସେମାନଙ୍କ ଉପରେ ଦୃଢ କାର୍ଯ୍ୟାନୁଷ୍ଠାନ ନେବାକୁ ପୋଲିସ ଚେତାବନୀ ଦେଇଛି ।
କହିରଖୁ କି କିଛିଦିନ ତଳେ ଖୁଲାଯାଇଥିବା ଲୁଲୁ ମଲ ମଧ୍ୟରେ ନମାଜ ପଢାଯାଉଥିବାର ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଥିଲା । ଏହାପରେ କିଛି ହିନ୍ଦୁ ସଂଗଠନ ଏହାକୁ ବିରୋଧ କରି ମଲ ଆଗରେ ପ୍ରଦର୍ଶନ କରିବା ସହ ନମାଜ ପଢିବା ଆରମ୍ଭ କରିଦେଇଥିଲେ । ସେପଟେ ପ୍ରଶାସନ କହିଛି କି ଲୁଲୁ ମଲ ଭିତରେ ନମାଜ ପଢୁଥିବା ଲୋକମାନେ ମଲର କର୍ମଚାରୀ ନୁହଁନ୍ତି ।