ଚର୍ଚ୍ଚାରେ ନେତାଙ୍କ ନିଆରା ହୋଲି। ଅତିଥିଙ୍କ ସହ ନାଚିଲେ ପ୍ରତିରକ୍ଷାମନ୍ତ୍ରୀ ରାଜନାଥ ସିଂ।
କନକ ବ୍ୟୁରୋ: ହୋଲିର ରଙ୍ଗରେ ରଙ୍ଗୀନ ହୋଇଛନ୍ତି ରାଜନେତା । ସକାଳୁ ସକାଳୁ ହୋଲି ପାଳନ କରିବାକୁ ରାଜ୍ୟର ସମସ୍ତ ରାଜନୈତିକ ଦଳର ନେତା ଦଳୀୟ କର୍ମୀ ଓ ସମର୍ଥକଙ୍କ ସହ ହୋଲି ପାଳନ କରିଛନ୍ତି । ହୋଲି ଅବସରରେ ରାଜ୍ୟବାସୀଙ୍କୁ ମୁଖ୍ୟମନ୍ତ୍ରୀ ଶୁଭେଚ୍ଛା ଜଣାଇଥିବା ବେଳେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ବାସଭବନକୁ ଯାଇ ଦଳୀୟ କର୍ମୀ ଓ ନେତା ହୋଲି ଶୁଭେଚ୍ଛା ଜଣାଇଛନ୍ତି । ସେହିପରି କଂଗ୍ରେସ ଭବନରେ ବିଧାୟକ ସୁର ରାଉତରାୟ, ଜୟପୁରରେ ବିଧାୟକ ତାରା ବାହାନୀପତି ସମେତ ଦଳର ଅନ୍ୟାନ୍ୟ କର୍ମୀ ହୋଲି ପାଳନ କରିଛନ୍ତି । ସେହିପରି ରାଜଧାନୀରେ ବିଜେଡି ବିଧାୟକ ଅମର ଶତପଥୀ, ପୂର୍ବତନ ମନ୍ତ୍ରୀ ସଞ୍ଜୟ ଦାସବର୍ମା, ଜୟପୁରରେ ରବି ନନ୍ଦ, ଦଳୀୟ କର୍ମୀ ଏବଂ ସମର୍ଥକଙ୍କ ସହ ଏହି ଖୁସିର ପର୍ବରେ ସମସ୍ତେ ସାମିଲ ହୋଇଥିଲେ । ରାଜଧାନୀରେ ମେୟର ସୁଲୋଚନା ଦାସ ସଫେଇ କର୍ମଚାରୀଙ୍କ ସହ ନାଚ ଓ ଗୀତରେ ଝୁମିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସେହିପରି କୋଭିଡ ପରେ କୌଣସି କଟକଣା ନଥିବାରୁ ସାରା ଦେଶରେ ହୋଲିର ପର୍ବକୁ ସମସ୍ତେ ଉତ୍ସାହର ସହିତ ପାଳନ କରିଛନ୍ତି । ପ୍ରତିରକ୍ଷା ମନ୍ତ୍ରୀ ରାଜନାଥ ସିଂଙ୍କ ବାସଭବନରେ ଆମେରିକା ବାଣିଜ୍ୟିକ ସଚିବ ଜିନା ରାୟମୋଣ୍ଡୋ, ବୈିଦେଶିକ ମନ୍ତ୍ରୀ ଏସ.ଜୟଶଙ୍କର ଓ ବାଣିଜ୍ୟ ମନ୍ତ୍ରୀ ପିୟୁଷ ଗୋଏଲ ଏକାଠି ହୋଲି ପାଳନ କରିଥିଲେ । ସେହିପରି ଉତ୍ତରପ୍ରଦେଶ ଗୋରଖପୁରରେ ଧୁମଧାମରେ ହୋଲି ପାଳନ କରିଛନ୍ତି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ । ମୁଣ୍ଡରେ ପଗଡି, ମୁହଁରେ କଳା ଚଷମା ପିନ୍ଧି ହୋଲି ଖେଳିଛନ୍ତି ଯୋଗୀ । ଚଳିତ ବର୍ଷ ବିଧାନସଭା ନିର୍ବାଚନ ଥିବାରୁ ମଧ୍ୟପ୍ରଦେଶରେ ମୁଖ୍ୟମନ୍ତ୍ରୀ ଶିବରାଜ ସିଂ ଚୌହ୍ୱାନଙ୍କ ହୋଲି ପାଳନ ମଧ୍ୟ ବେଶ ଗୁରୁତ୍ୱ ବହନ କରିଛି । ଛତିଶଗଡରେ ମଧ୍ୟ ମୁଖ୍ୟମନ୍ତ୍ରୀ ଭୂପେଶ ବାଘେଲ ବି ରଙ୍ଗ ଉତ୍ସବ ପାଳନ କରିଛନ୍ତି । ବିହାର ପାଟନାରେ ହୋଲି ଅବସରରେ ତେଜ ପ୍ରତାପ ଯାଦବ ବଇଁଶି ବଜାଉଥିବା ଦେଖିବାକୁ ମିଳିଛି ।
ପଠାନକୋଟରେ ମଧ୍ୟ ରଙ୍ଗର ପର୍ବ ହୋଲି ପାଳନ କରିଛନ୍ତି ବିଏସଏଫ ଯବାନ । ବଡ଼ କଥା ହେଉଛି ସହିଦ ଯବାନଙ୍କ ପରିବାର ସହିତ ହୋଲି ପାଳନ କରିଛନ୍ତି । ସହିଦ ଯବାନଙ୍କ ପରିବାର ପାଖରେ ପହଞ୍ଚି ତାଙ୍କୁ ରଙ୍ଗ ଲଗାଇବା ସହ ଖୁସି ବାଣ୍ଟିଛନ୍ତି ।