ଲେଡି ବ୍ଲାକମେଲର ଅର୍ଚ୍ଚନାଙ୍କ ନାଗଫାଶରେ ରାଜନୀତି ପାଣି ଗୋଳିଆ। ସମ୍ପର୍କରେ ଥିବା ବହୁ ବିଧାୟକ ଓ ମନ୍ତ୍ରୀଙ୍କ ଛାତିରେ ଛନକା।
କନକ ବ୍ୟୁରୋ: ଅର୍ଚ୍ଚନାଙ୍କ ନାଗଫାଶରେ ବଡ ବଡ ବ୍ୟବସାୟୀ, ନେତା ପଡିଥିବା ନେଇ ଫଟୋ ସାମ୍ନାକୁ ଆସିବା ପରେ ଚର୍ଚ୍ଚା ବଢିଛି । ଆଗକୁ ଆଉ କାହାର ନାଁ ଆସିବ ସେନେଇ ପ୍ରମାଦ ଗଣୁଛନ୍ତି ନେତା ଓ ବିଧାୟକ । କାରଣ, ଅର୍ଚ୍ଚନାଙ୍କ ଘରକୁ ବଡବଡିଆଙ୍କ ଯିବାଆସିବା ଲାଗି ରହୁଥିଲା । ସେମାନଙ୍କୁ ହନିଟ୍ରାପରେ ଫସାଇ ସେ ବ୍ଲାକମେଲ କରୁଥିଲେ ବୋଲି ଅଭିଯୋଗ ବି ଆସିଛି । ସବୁଠାରୁ ବଡ କଥା ହେଲା କିଛି ବିଧାୟକଙ୍କ ସହ ସମ୍ପର୍କକୁ ନେଇ ଝଡ ଉଠିଛି । ପ୍ରାୟ ସବୁଦଳର ବିଧାୟକ ଅର୍ଚ୍ଚନାଙ୍କ ସାନ୍ନିଧ୍ୟରେ ରହୁଥିବା ଚର୍ଚ୍ଚା ହେବା ପରେ ପାଣି ଗୋଳିଆ ହୋଇଛି
Kanak News is now on WhatsApp
Join and get latest news updates delivered to you via WhatsApp
କୁହାଯାଉଛି, ଅର୍ଚ୍ଚନାଙ୍କ ଲିଙ୍କରେ ବହୁ ବଡବଡିଆ ନେତା ଓ ବିଧାୟକ ଅଛନ୍ତି । କିନ୍ତୁ ଯେଉଁ ବଡ ବଡିଆଙ୍କ ନାଁ ଆସିଛି ଗଣମାଧ୍ୟମକୁ ଆସି ଖବରକୁ ଖଣ୍ଡନ କରୁନାହାନ୍ତି । ମାତ୍ର ହାତଗଣତି ନେତା ଆସି ପ୍ରତିକ୍ରିୟା ଦେଇଛନ୍ତି । ତେଣୁ ଲୋକଙ୍କ ମନରେ ବି ନେତାଙ୍କ ଭୂମିକାକୁ ନେଇ ପ୍ରଶ୍ନ ଉଠିଛି । ଘଟଣାରେ ପ୍ରଭାବଶାଳୀ ବ୍ୟକ୍ତି ସାମିଲ ହୋଇଥିବାରୁ ତଦନ୍ତର ଗତି କୁଆଡେ ଯିବ ସେ ଉପରେ ସମସ୍ତଙ୍କ ନଜର ରହିଛି । ସବୁଠାରୁ ଚର୍ଚ୍ଚାର ବିଷୟ ହୋଇଛି, ପୁଲିସର ତଦନ୍ତ କୁଆଡେ ଯାଉଛି ସେ ନେଇ କୌଣସି ସୂଚନା ମିିଳିପାରୁନାହିଁ ।
ଗୋଟିଏ ପଟେ ଫଟୋରେ ନଜର ଆସୁଥିବା ନେତାଙ୍କ ନୀରବତା, ଅନ୍ୟପଟେ ପୁଲିସ ଚୁପ ରହିବା ସୋସିଆଲ ମିଡିଆରେ ସମାଲୋଚନା ପାଇଁ ଖୋରାକ ଯୋଗାଇଛି । ବ୍ଲାକମେଲ ରାଣୀଙ୍କ ସହ ୧୮ ବିଧାୟକଙ୍କ ସମ୍ପୃକ୍ତି ଥିବା କିଏ ଚର୍ଚ୍ଚା କରୁଛି ତ ଆଉ କିଛି ସାମାଜିକ ଗଣମାଧ୍ୟମରେ ୭୦ରୁ ଅଧିକ ବିଧାୟକଙ୍କ ସମ୍ପର୍କ ଥିବା ଅଭିଯୋଗ ହେଉଛି । ଲୋକଲଜ୍ଜା ଓ ସାମାଜିକ ଭାବମୂର୍ତି କ୍ଷୂର୍ଣ୍ଣ ହେବା ଭୟରେ କେହି ମୁହଁ ଖୋଲୁନାହାନ୍ତି । ଯାହା କାହାଣୀ ତିଆରି କରିବାକୁ ଅଧିକ ଖୋରାକ ଯୋଗାଇଛି । ବିରୋଧୀ ମଧ୍ୟ ସେହି କାହାଣୀ ଆଧାରରେ ଶାସକ ଦଳକୁ ଟାର୍ଗେଟ କରୁଛନ୍ତି ଆଉ ବିରୋଧୀ ଦଳର ନେତାଙ୍କ ଫଟୋ ମଧ୍ୟ ଘୁରିବୁଲିଥିବାରୁ ଶାସକ ଦଳ ବେଶୀ ପ୍ରତିକ୍ରିୟାଶୀଳ ହେଉନାହିଁ ।