କନକ ବ୍ୟୁରୋ: ଆଇପିଏଲ୍ ୨୦୨୨ର ୭ମ ମୁକାବିଲାରେ ଲକ୍ଷ୍ନୌ ସୁପର ଜ୍ୟାଣ୍ଟସଠାରୁ ଶୋଚନୀୟ ପରାଜୟ ବରଣ କରିଛି ଚେନ୍ନାଇ ସୁପର କିଙ୍ଗସ୍ । ଚଳିତ ଆଇପିଏଲରେ ସିଏସକେର ଏହା ଲଗାତାର ଦ୍ୱିତୀୟ ପରାଜୟ । ତେବେ ଗୋଟିଏ ଚାମ୍ପିୟନ୍ ଦଳ ହୋଇଥିଲେ ବି ସିଏସକେର ଏମିତି ପ୍ରଦର୍ଶନ ପରେ ଏବେ ଏହାକୁ ନେଇ ଚର୍ଚ୍ଚା ବଢିଛି । ବିଶେଷକରି କିଛି ବ୍ୟକ୍ତି ଦଳର ଅଧିନାୟକ ରବୀନ୍ଦ୍ର ଜାଡେଜାଙ୍କୁ ଟ୍ରୋଲ୍ କରୁଥିବାବେଳେ, ଆଉ କିଛି ପୂର୍ବ ଅଧିନାୟକ ଏମ୍ ଏସ୍ ଧୋନୀଙ୍କ ଉପରେ ବର୍ଷିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଅସଲ କଥା ହେଉଛି, ଗୁରୁବାର ଚେନ୍ନାଇ ସୁପରକିଙ୍ଗସ ତରଫରୁ ୧୯ ତମ ଓଭର ଶିଭମ ଦୁବେ ବୋଲିଂ କରିଥିଲେ । ଯେଉଁ ଓଭରରେ ସେ ମହଙ୍ଗା ସାବ୍ୟସ୍ତ ହେବା ସହିତ ୨୫ ରନ୍ ଦେଇଥିଲା । ଆଉ ଏହି ଓଭର ହିଁ ଲକ୍ଷ୍ନୌ ସୁପର ଜ୍ୟାଣ୍ଟସର ବିଜୟକୁ ପକ୍କା କରିଦେଇଥିଲା । ତେବେ ଶିଭମ ଦୁବେଙ୍କୁ ବୋଲିଂ ଦେବାର ନିଷ୍ପତ୍ତି ଦଳର ଅଧିନାୟକ ଜାଡେଜା ନେବା ବଦଳରେ ଧୋନୀ ନେଇଥିବା ଚର୍ଚ୍ଚା ହେବା ପରେ, ଏବେ ଏହାକୁ ନେଇ ପୂର୍ବତନ କ୍ରିକେଟରମାନେ ଅସନ୍ତୋଷ ପ୍ରକାଶ କରିଛନ୍ତି ।
ଏହାକୁ ନେଇ ପୂର୍ବତନ ଭାରତୀୟ କ୍ରିକେଟର ଅଜୟ ଜାଡେଜା ଅସନ୍ତୋଷ ପ୍ରକାଶ କରିଛନ୍ତି । ଚେନ୍ନାଇର ଅଧିନାୟକ ହୋଇ ମଧ୍ୟ ରବୀନ୍ଦ୍ର ଜାଡେଜା ସେହି ସମୟରେ ବାଉଣ୍ଟ୍ରିଂରେ ଫିଲ୍ଡିଂ କରୁଛନ୍ତି । ଆଉ ଧୋନୀ ହିଁ ସମସ୍ତ ନିଷ୍ପତ୍ତି ନେଉଛନ୍ତି । ଜଣେ କ୍ରିକେଟ୍ ଫ୍ୟାନ୍ ହିସାବରେ ସେ ଏହାକୁ ପସନ୍ଦ କରୁନାହାଁନ୍ତି ବୋଲି ଅଜୟ ଜାଡେଜା କହିଛନ୍ତି ।
ସୂଚନାଯୋଗ୍ୟ ଯେ, ଚଳିତ ଆଇପିଏଲ୍ ଆରମ୍ଭ ହେବା ପୂର୍ବରୁ ଧୋନୀ ସିଏସକରେ ଅଧିନାୟକ ପଦରୁ ହଟିଯାଇଥିଲେ । ତାଙ୍କ ବଦଳରେ ସେ ରବୀନ୍ଦ୍ର ଜାଡେଜାଙ୍କୁ ଦଳର ଅଧିନାୟକ ବାଛିଥିଲେ । ତେବେ ଏବେ ବି ଅନେକ ମ୍ୟାଚରେ ଧୋନୀ ହିଁ ପରୋକ୍ଷରେ ଦଳର ମଙ୍ଗ ଧରିଥିବା ଭଳି ମନେ ହେଉଛି । ସେ ଦଳର ଅନେକ ବଡ ବଡ ନିଷ୍ପତ୍ତି ନିଜେ ନେଉଥିବା ଦେଖିବାକୁ ମିଳୁଛି । ଯାହାକୁ କିଛି କ୍ରିକେଟର ପସନ୍ଦ ନକରିବା ସହିତ ଏହାକୁ ନେଇ ପ୍ରଶ୍ନ ଉଠାଇଛନ୍ତି ।