କନକ ବ୍ୟୁରୋ: ଭୋଟରଙ୍କୁ ଆକୃଷ୍ଟ କରିବା ପାଇଁ ପ୍ରଚାରକୁ ଓହ୍ଲାଇଛନ୍ତି ସିନେ ତାରକା । ବିଜେଡି ପାଇଁ ବର୍ଷା ପ୍ରିୟଦର୍ଶିନୀ ପ୍ରଚାର କରିଥିବାବଳେ ବିଜେପି ପ୍ରାର୍ଥୀଙ୍କ ପାଇଁ ଅନୁ ଚୌଧୁରୀ ଭୋଟ ମାଗିଛନ୍ତି । ସିନେ ତାରକାଙ୍କ ପ୍ରତି ଆମ ଲୋକଙ୍କ ଭିତରେ ସ୍ୱତନ୍ତ୍ର ଆକର୍ଷଣ ଥିବାରୁ ସେମାନଙ୍କୁ ଷ୍ଟାର କ୍ୟାମ୍ପେନର ସଜାଇ ପ୍ରଚାର କରୁଛନ୍ତ ପ୍ରାର୍ଥୀ । ସେମାନଙ୍କୁ ଦେଖିବା ପାଇଁ ଗାଁ ଦାଣ୍ଡରେ ଲୋକଙ୍କ ଗହଳି ଦେଖିବାକୁ ମିଳୁଛି ।
Kanak News is now on WhatsApp
Join and get latest news updates delivered to you via WhatsApp
ବିଜେଡି ସାଂସଦ ତଥା ସ୍ୱାମୀ ଅନୁଭବ ମହାନ୍ତିଙ୍କ ସହ ବିବାଦ ଭିତରେ ପ୍ରଚାର ମଇଦାନକୁ ଓହ୍ଲାଇଛନ୍ତି ଅଭିନେତ୍ରୀ ବର୍ଷା ପ୍ରିୟଦର୍ଶୀନି । ବିଜେଡିର ସାଂସଦ ହୋଇଥିଲେ ବି ଯେତେବେଳେ ଅନୁଭବ ମହାନ୍ତି କେନ୍ଦ୍ରାପଡା ପ୍ରଚାର ମଇଦାନରୁ ଗାଏବ ଅଛନ୍ତି, ସେତିକିବେଳେ ଭଦ୍ରକ ବ୍ଲକ ବ୍ରହ୍ମପୁର ପଂଚାୟତରେ ବିଜେଡି ସମର୍ଥିତ ପ୍ରାର୍ଥୀଙ୍କ ପାଇଁ ପ୍ରଚାର କରିଛନ୍ତି ବର୍ଷା । ବାଇକ ଶୋଭାଯାତ୍ରାରେ ସାମିଲ ହୋଇ, ବିଭିନ୍ନ ଗାଁ ବୁଲି ବିଜେଡି ସମର୍ଥିତ ପ୍ରାର୍ଥୀଙ୍କ ପାଇଁ ଭୋଟ ମାଗିଛନ୍ତି । ବିଜେଡି ସମର୍ଥିତ ପ୍ରାର୍ଥୀଙ୍କ ପାଇଁ ବର୍ଷାଙ୍କ ଏହି ପ୍ରଚାର ବର୍ଷା ବିଜେଡିରେ ସାମିଲ ହେବା ନେଇ ଚର୍ଚ୍ଚାକୁ ଖୋରାକ ଯୋଗାଇଛି । ଆଉ ଆଗାମି ଦିନରେ ବର୍ଷା ବିଜେଡିରେ ବିଧିବଦ୍ଧ ଭାବେ ସାମିଲ ହୋଇପାରନ୍ତି ବୋଲି ଚର୍ଚ୍ଚା ଜୋର ଧରିଛି ।
ଗଞ୍ଜାମ ଜିଲ୍ଲା ଖଲ୍ଲିକୋଟ ବ୍ଲକର ୧୧ନଂ ଜୋନରେ ବିଜେପି ପ୍ରାର୍ଥୀଙ୍କ ପାଇଁ ପ୍ରଚାର କରିଛନ୍ତି ଅଭିନେତ୍ରୀ ଅନୁ ଚୌଧୁରୀ । ରୋଡସୋରେ ସାମିଲ ହୋଇ ବିଭିନ୍ନ ଗାଁ ବୁଲି ଦଳୀୟ ପ୍ରାର୍ଥୀଙ୍କ ପାଇଁ ପ୍ରଚାର କରିଛନ୍ତି । କେନ୍ଦ୍ର ସରକାରଙ୍କ ସବକା ସାଥ ସବକା ବିକାଶ ଧାରାକୁ ଅଗ୍ରଗତି କରିବା ପାଇଁ ବିଜେପିକୁ ଭୋଟ ଦେବାକୁ ଅନୁରୋଧ କରିଛନ୍ତି । ଦୀର୍ଘ ବର୍ଷ ହେବ ଏହି ଜିଲ୍ଲାପରିଷଦ ଆସନ ବିଜେଡି ହାତରେ ରହିଥିବାରୁ ଦଖଲ କରିବା ପାଇଁ ସବୁ ବଳ ଲଗାଇ ଦେଇଛି ବିଜେପି ।
ପୋଲସରାରେ ବିଜେଡି ସମର୍ଥିତ ପ୍ରାର୍ଥୀଙ୍କ ପାଇଁ ପ୍ରଚାର କରିଛନ୍ତି ତମନ୍ନା, ପୁନମ ଓ ଦେବାଶିଷ ପାତ୍ର । ପୋଲସରାରେ ରୋଡ ସୋ କରିବା ସହ ଦଳୀୟ ପ୍ରାର୍ଥୀଙ୍କୁ ଭୋଟ ଦେବାକୁ ଅପିଲ କରିଛନ୍ତି ସିନେ ତାରକା ।