ହୀରାକୁଦ ବିସ୍ଥାପିତଙ୍କୁ ମିଳିବ ଜମିପଟ୍ଟା । ଦୀର୍ଘଦିନ ପରେ ସରକାରଙ୍କ ନିଷ୍ପତ୍ତିରେ ସନ୍ତୁଷ୍ଟ ନୁହଁନ୍ତି ବିସ୍ଥାପିତ
କନକ ବ୍ୟୁରୋ : ହୀରାକୁଦ ଡ୍ୟାମ ବିଶ୍ୱର ସବୁଠୁ ବଡ଼ ମାଟି ବନ୍ଧ ପ୍ରକଳ୍ପ । ସ୍ୱାଧୀନତା ପରେ ପରେ ଓଡ଼ିଶାରେ ହୋଇଥିବା ହୀରାକୁଦ ଡ୍ୟାମ, ସାରା ରାଜ୍ୟକୁ ଆଲୋକିତ କରିଥିଲା । କିନ୍ତୁ ଏହି ପ୍ରକଳ୍ପ ପାଇଁ ଜମି ହରାଇଥିବା ଲୋକ କିନ୍ତୁ ଦଶନ୍ଧି ଦଶନ୍ଧି ଧରି ସେମାନଙ୍କ ନ୍ୟାର୍ଯ୍ୟ ପ୍ରାପ୍ୟ ପାଇବା ଲାଗି ସଂଘର୍ଷ କରି ଆସୁଛନ୍ତି । ସରକାରଙ୍କ ଘୋଷଣା, ସେମାନଙ୍କୁ ସାନ୍ତ୍ୱନା ଦେଇପାରୁନି । ବର୍ଷ ବର୍ଷ ଧରି ସେମାନଙ୍କ ମନ ଭିତରେ ପୁଂଜିଭୂତ ହୋଇ ରହିଛି ଦୁଃଖ, କ୍ଷୋଭ ଓ ତୀବ୍ର ଅସନ୍ତୋଷ । ସମସ୍ୟା ଏତେ ଯେ ସରକାରଙ୍କ ପ୍ରତିଶ୍ରୁତି, ସେମାନଙ୍କ ବିଶ୍ୱାସ ଜିତିପାରୁନି ।
Kanak News is now on WhatsApp
Join and get latest news updates delivered to you via WhatsApp
ହୀରାକୁଦ ବନ୍ଧ ନିର୍ମାଣ ପାଇଁ ବିସ୍ଥାପିତ ହୋଇଥିବା ଝାରସୁଗୁଡ଼ା ଜିଲ୍ଲାର ୧୯ଟି ଗାଁର ୧୭୪୯ ପରିବାରକୁ ୫୦ ବର୍ଷ ପରେ ଜମି ପଟ୍ଟା ମିଳିବ । ବୋଲି ରାଜ୍ୟ ସରକାର ନିଷ୍ପତି ନେଇଛନ୍ତି । ଡିସେମ୍ବର ପହିଲାରୁ ବଂଟା ହେବ ପଟ୍ଟା । ଲଖନପୁର ତହସିଲର ୧୮ ଗାଁ ଓ ଝାରସୁଗୁଡ଼ା ତହସିଲର ଗୋଟିଏ ଗାଁ ଉପକୃତ ହେବେ । ୧୭୪୯ ପରିବାରକୁ ପ୍ରାୟ ୩୨୩୧ ଏକର ଜମି ଉପରେ ଅଧିକାର ଦିଆଯିବ ।
୫-ଟି ସଚିବଙ୍କ ଝାରସୁଗୁଡ଼ା ଜିଲ୍ଲା ଗସ୍ତ ବେଳେ ବିସ୍ଥାପିତମାନେ ସେମାନଙ୍କ ସମସ୍ୟା ଜଣାଇଥିଲେ । ଏହାପରେ ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶରେ ବସିଥିବା ବୈଠକରେ ଜମି ପଟ୍ଟା ଆବଂଟନ ପାଇଁ ନିଷ୍ପତି ନିଆଯାଇଥିବା ନେଇ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ପ୍ରେସ ରିଲିଜ୍ ଜାରି କରାଯାଇଛି । ତେବେ ଏହାକୁ ନିର୍ବାଚନୀ ଚାଲ୍ ବୋଲି ଅଭିଯୋଗ କରିଛନ୍ତି ବିରୋଧୀ ।
ଏ ସଂପର୍କୀତ ମାମଲାର ଶୁଣାଣି କରି ଗତ ଏପ୍ରିଲ ମାସରେ ରାୟ ଦେଇଥିଲେ ଜାତୀୟ ମାନବ ଅଧିକାର କମିସନ । ବିସ୍ଥାପିତଙ୍କୁ କ୍ଷତିପୂରଣ ଓ ଥଇଥାନ ଦିଗରେ ତ୍ୱରିତ ପଦକ୍ଷେପ ନେବାକୁ ରାଜ୍ୟ ସରକାର ଓ ଜିଲ୍ଲା ପ୍ରଶାସନକୁ ନିର୍ଦ୍ଦେଶ ଦେଇଥିଲେ ଏନଏଚଆରସି ।