ଜେଲ ଭିତରୁ ପ୍ରବର୍ତନ ନିର୍ଦ୍ଦେଶାଳୟ ବିରୋଧରେ ଦିଲ୍ଲୀ ମୁଖ୍ୟମନ୍ତ୍ରୀଙ୍କ ରଣହୁଙ୍କାର । କାଲି ଇଡି ବିରୋଧରେ କୋର୍ଟରେ କରିବେ ବଡ ଖୁଲାସା
କନକ ବ୍ୟୁରୋ : ଅବକାରୀ ଦୁର୍ନୀତି ମାମଲାକୁ ନେଇ ଉଠୁଛି ପଡୁଛି ଦିଲ୍ଲୀ । ଯେବେଠୁ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କୁ ଗିରଫ କରିଛି ପ୍ରବର୍ତନ ନିର୍ଦ୍ଦେଶାଳୟ ସେବେଠୁ ରାଜଧାନୀରେ ହୁଲୁସ୍ତୁଲୁ ପରିସ୍ଥିତି ଜାରି ରହିଛି । ଏହା ଭିତରେ କେଜ୍ରିୱାଲଙ୍କ ପତ୍ନୀ ସୁନୀତା କେଜ୍ରିୱାଲ ଏକ ଭିଡିଓ ଜାରି କରି ବଡ ସୂଚନା ଦେଇଛନ୍ତି । ମଦ ଦୁର୍ନୀତି ମାମଲାରେ ଇଡିର କି ଭୂମିକା ରହିଛି? କୁଆଡେ ଯାଇଛି କୋଟି କୋଟି ଟଙ୍କା? ଏହି ସବୁରୁ ଜବାବ ଦେବେ କେଜ୍ରିୱାଲ । ୨୮ ତାରିଖ ଅର୍ଥାତ ଗୁରୁବାର ପ୍ରମାଣ ସହ କୋର୍ଟରେ ଜବାବ ରଖିବା ନେଇ ବୁଧବାର ଏକ ଭିଡିଓ ଜାରି କରି କହିଛନ୍ତି ସୁନୀତା କେଜ୍ରିୱାଲ । ସେପଟେ ସୁନୀତାଙ୍କ କଥା ଉପରେ ଜବାବ ରଖି କେଜ୍ରିୱାଲଙ୍କ ଇସ୍ତଫା ଦାବି କରିଛି ବିଜେପି ।
Kanak News is now on WhatsApp
Join and get latest news updates delivered to you via WhatsApp
କେଜ୍ରିୱାଲଙ୍କ ଗିରଫକୁ ବିରୋଧ କରି ଲଗାତର ୫ଦିନ ହେବ ଜୋରଦାର ବିକ୍ଷୋଭ ଭିତରେ ଆଜି ଆମ ଆଦମୀ ପାର୍ଟି ବିଧାନସଭା ବାହାରେ ଅଭିନବ ଉପାୟରେ ପ୍ରତିବାଦ କରିଛି । ମୁଁ କେଜ୍ରିୱାଲ କ୍ୟାମ୍ପେନ ଆରମ୍ଭ କରିଛି । କେଜ୍ରିୱାଲଙ୍କ ଫଟୋର ମୁଖା ଓ ମୁଁ କେଜ୍ରିୱାଲ ଲେଖା ଟିସାର୍ଟ ପିନ୍ଧି ଇଡିର ଗିରଫଦାରୀକୁ ବିରୋଧ କରିଛି ଦଳ ।ସେପଟେ ସୋସିଆଲ ମିଡିଆରେ ଦଳର ସମସ୍ତ ନେତା,ମନ୍ତ୍ରୀ, କର୍ମୀ ଓ ସମର୍ଥକ ଡିପି କ୍ୟାମ୍ପେନକୁ ଜୋରଦାର କରିଛନ୍ତି ।
ବୁଧବାର ଦିଲ୍ଲୀ ପୁଲିସ କମିଶନରଙ୍କୁ ଭେଟିଛନ୍ତି ଦିଲ୍ଲୀ ପ୍ରଦେଶ ବିଜେପି ଅଧ୍ୟକ୍ଷ ବିରେନ୍ଦ୍ର ସଚଦେବ । ହେପାଜତରେ ରହି କିଭଳି ଦିଲ୍ଲୀବାସୀଙ୍କ ପାଇଁ କେଜ୍ରିୱାଲ ଚିଠି ପଠାଉଛନ୍ତି ଏହାର ଯାଂଚ ପାଇଁ ଅଭିଯୋଗ ପତ୍ର ଦିଲ୍ଲୀ ପୁଲିସକୁ ଦେଇଛନ୍ତି ସଚଦେବ ।
ତେବେ ଇଡିର ଗିରଫଦାରୀ ଓ ତଳକୋର୍ଟଙ୍କ ରିମାଣ୍ଡ ନିର୍ଦ୍ଦେଶକୁ ଚ୍ୟାଲେଂଜ କରି କେଜ୍ରିୱାଲଙ୍କ ଆବେଦନ ଉପରେ ଆଜି ଶୁଣାଣୀ କରିଛନ୍ତି ଦିଲ୍ଲୀ ହାଇକୋର୍ଟ ।