କନକ ବ୍ୟୁରୋ : ନୂଆବର୍ଷରୁ ନୂଆ ଆରମ୍ଭ କରିପାରେ ଟିମ୍ ଇଣ୍ଡିଆ । ଭାରତୀୟ ଦଳରେ ବଡ ଧରଣର ପରିବର୍ତ୍ତନ କରିପାରେ ବିସିସିଆଇ । ଭିନ୍ନ ଫର୍ମାଟ ପାଇଁ ଭିନ୍ନ ଅଧିନାୟକ ଫର୍ମୁଲା ଆପଣାଇପାରେ ବିସିସିଆଇ । ଏନେଇ ଏବେଠୁ ଜୋର ଧରିଛି ଚର୍ଚ୍ଚା । ଆଉ ଯଦି ବିସିସିଆଇ ଏଭଳି ନିଷ୍ପତ୍ତି ନିଏ ତେବେ ରୋହିତ ଶର୍ମାଙ୍କୁ ଲାଗିପାରେ ବଡ ଝଟକା । କାରଣ ରୋହିତଙ୍କୁ ଉଭୟ ଦିନିକିଆ ଓ ଟି-୨୦ ଅଧିନାୟକ ପଦ ଛାଡିବାକୁ ପଡିପାରେ । ତେବେ ପ୍ରଶ୍ନ ଉଠୁଛି ଯଦି ରୋହିତଙ୍କ ହାତରୁ ଅଧିନାୟକ ପଦ ଯାଏ ତେବେ ଧଳା ବଲରେ ଭାରତୀୟ ଦଳର ଅଧିନାୟକ କିଏ ହେବ? କାହା ନାଁରେ ମୋହର ମାରିବ ବିସିସିଆଇ । ଏସବୁ ଭିତରେ ହାର୍ଦ୍ଦିକ ପାଣ୍ଡ୍ୟା ଦିନିକିଆ ଓ ଟି-୨୦ ଫର୍ମାଟରେ ଟିମ୍ ଇଣ୍ଡିଆର ମଙ୍ଗ ଧରିପାରନ୍ତି ବୋଲି ଚର୍ଚ୍ଚା ଆରମ୍ଭ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ବୁଧବାର ବିସିସିଆଇର ଆପେକ୍ସ କାଉନସିଲ ବୈଠକରେ ଭିନ୍ନ ଫର୍ମାଟ ପାଇଁ ଭିନ୍ନ ଅଧିନାୟକଙ୍କ ସମେତ ଭିନ୍ନ କୋଚ୍ ପାଇଁ ମଧ୍ୟ ଆଲୋଚନା ହୋଇଥିବା ନେଇ ଚର୍ଚ୍ଚା ହୋଇଛି । ଜାତୀୟ ଗଣମାଧ୍ୟମରେ ପ୍ରକାଶିତ ଖବର ଅନୁଯାୟୀ, ହାର୍ଦ୍ଦିକଙ୍କ ହାତରେ ଉଭୟ ଦିନିକିଆ ଓ ଟି-୨୦ ଫର୍ମାଟର ଅଧିନାୟକ ଭାର ଦେବାକୁ ବିସିସିଆଇ ଏକପ୍ରକାର ନିଷ୍ପତ୍ତି ନେଇସାରିଥିବା ନେଇ ବିଶ୍ୱସ୍ତ ସୂତ୍ରରୁ ଖବର ପ୍ରକାଶ ପାଇଛି । ନାଁ ଗୋପନ ରଖିବା ସର୍ତ୍ତରେ ବିସିସିଆଇର ବରିଷ୍ଠ ଅଧିକାରୀ ଜାତୀୟ ଗଣମାଧ୍ୟମକୁ ସୂଚନା ଦେଇଛନ୍ତି ଯେ, ଅଧିନାୟକ ପଦକୁ ନେଇ ହାର୍ଦ୍ଦିକଙ୍କ ସହ ଆଲୋଚନା ହୋଇଛି । ଏପରିକି ହାର୍ଦ୍ଦିକ ଏଥିପାଇଁ କିଛି ଦିନ ସମୟ ମାଗିଥିବା କୁହାଯାଉଛି । ତେବେ ହାର୍ଦ୍ଦିକ କଣ ନିଷ୍ପତ୍ତି ନେବେ ତାହା ଉପରେ ସମସ୍ତଙ୍କର ନଜର ରହିଛି । ତେବେ ଏ ସମସ୍ତ ନିଷ୍ପତ୍ତି ବିସିସିଆଇ ନୂଆ ଚୟନ କମିଟି ଗଠନ କରିବା ପରେ ହିଁ ନେବ ।
ଯଦି ଏମିତି ହୁଏ ତେବେ ହାର୍ଦ୍ଦିକଙ୍କ ନେତୃତ୍ୱରେ ଭାରତରେ ବିଶ୍ୱକପ ଖେଳିବ ଟିମ୍ ଇଣ୍ଡିଆ । କାରଣ ୨୦୨୩ରେ ଦିନିକିଆ ବିଶ୍ୱକପ୍ ଭାରତରେ ହିଁ ଖେଳାଯିବ । ହାର୍ଦ୍ଦିକଙ୍କ ପାଇଁ ଅଧିନାୟକ ଦାୟିତ୍ୱ ନୂଆ ନୁହେଁ । ଏହାପୂର୍ବରୁ ମଧ୍ୟ ଧଳା ବଲରେ ଟିମ୍ ଇଣ୍ଡିଆର ଅଧିନାୟକ ଦାୟିତ୍ୱ ତୁଲାଇ ସାରିଛନ୍ତି ହାର୍ଦ୍ଦିକ । ଏବେ ପର୍ଯ୍ୟନ୍ତ ହାର୍ଦ୍ଦିକ ୫ଟି ଟି-୨୦ ମ୍ୟାଚରେ ଭାରତୀୟ ଦଳର ମଙ୍ଗ ଧରିଛନ୍ତି । ଯେଉଁଥିରୁ ୪ଟିରେ ଦଳ ବିଜୟୀ ହୋଇଛି । ସେହିଭଳି ଆଇପିଏଲରେ ମଧ୍ୟ ଗୁଜୁରାଟ ଟାଇଟନ୍ସର ନେତୃତ୍ୱ ନେଉଛନ୍ତି ହାର୍ଦ୍ଦିକ । ଏପରିକି ନିଜ ଅଧିନାୟକତ୍ୱର ପ୍ରଥମ ସିଜିନରେ ହିଁ ଆଇପିଏଲରେ ଡେବ୍ୟୁ କରିଥିବା ଗୁଜୁରାଟ ଟାଇଟନ୍ସକୁ ଚାମ୍ପିୟନ କରିଛନ୍ତି ହାର୍ଦ୍ଦିକ ପାଣ୍ଡ୍ୟା । ତେଣୁ ହାର୍ଦ୍ଦିକ ନେତୃତ୍ୱରେ ଟିମ୍ ଇଣ୍ଡିଆ ଦିନିକିଆ ବିଶ୍ୱକପ ଜିତୁ ବୋଲି କ୍ରିକେଟପ୍ରେମୀ ଆଶା ବାନ୍ଧି ବସିଛନ୍ତି । ୨୦୧୧ରେ ଭାରତରେ ଖେଳାଯାଇଥିବା ଦିନିକିଆ ବିଶ୍ୱକପରେ ଚାମ୍ପିୟନ ହୋଇଥିଲା ଟିମ୍ ଇଣ୍ଡିଆ । ତେଣୁ ୨୦୨୩ରେ ମଧ୍ୟ ଟିମ୍ ଇଣ୍ଡିଆ ପୁଣିଥରେ ବିଶ୍ୱବିଜେତା ହେଉ ଏହା ସମସ୍ତ କ୍ରିକେଟପ୍ରେମୀଙ୍କ ଆଶା ।