କନକ ବ୍ୟୁରୋ : ଗୁଜରାଟ ବିଧାନସଭା ନିର୍ବାଚନରେ ବିଜେପି ଯେଉଁ ରେର୍କଡ ସହ ଜିତ ହାସଲ କରିଛି ତାହା ରାଜ୍ୟରାଜନୀତିର ଇତିହାସରେ ଲିପିବଦ୍ଧ ହୋଇ ସବୁଦିନ ପାଇଁ ରହିବ । ଏହି ଐତିହାସିକ ବିଜୟ ପରେ ଦ୍ୱିତୀୟ ଥର ପାଇଁ ମୁଖ୍ୟମନ୍ତ୍ରୀ ଭାବେ ଶପଥ ନେଇଛନ୍ତି ଭୁପେନ୍ଦ୍ର ପଟେଲ । ୧୮ ତମ ମୁଖ୍ୟମନ୍ତ୍ରୀ ଭାବେ ରାଜ୍ୟପାଳ ତାଙ୍କୁ ପଦ ଓ ଗୋପନୀୟତାର ସହ ଶପଥପାଠ କରାଇଛନ୍ତି । ତେବେ ଭୁପେନ୍ଦ୍ରଙ୍କ ସହ ୧୬ ବିଧାୟକ ମନ୍ତ୍ରୀ ପଦ ପାଇଁ କରିଛନ୍ତି ଶପଥପାଠ । ଗାନ୍ଧିନଗରରେ ଆୟୋଜିତ ଏହି ଭବ୍ୟ କାର୍ଯ୍ୟକ୍ରମରେ ବିଜେପି ନିଜ ଶକ୍ତି ପ୍ରଦର୍ଶନ କରିଛି ।
Kanak News is now on WhatsApp
Join and get latest news updates delivered to you via WhatsApp
ଶପଥଗ୍ରହଣ କାର୍ଯ୍ୟକ୍ରମରେ ସାମିଲ ହେବା ପାଇଁ ଗୁଜରାଟରେ ପହଂଚିଥିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ, ଗୃହମନ୍ତ୍ରୀ ଅମିତ ଶାହା, ବିଜେପି ରାଷ୍ଟ୍ରୀୟ ଅଧକ୍ଷ ଜେପି ନଡ୍ଡା । ଏଥି ସହ ଉତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ, ମଧ୍ୟପ୍ରଦେଶ ମୁଖ୍ୟମନ୍ତ୍ରୀ ଶିବରାଜ ସିଂ ଚୌହ୍ୱାନ, ଆସାମ ମୁଖ୍ୟମନ୍ତ୍ରୀ ହେମନ୍ତ ବିଶ୍ୱ ର୍ଶମାଙ୍କ ସମେତ ବିଜେପି ଶାସିତ ରାଜ୍ୟର ମୁଖ୍ୟମନ୍ତ୍ରୀ ଓ କେନ୍ଦ୍ରମନ୍ତ୍ରୀ ମାନେ ମଧ୍ୟ କାର୍ଯ୍ୟକ୍ରମରେ ସାମିଲ ହୋଇଥିଲେ ।
ମୁଖ୍ୟମନ୍ତ୍ରୀଙ୍କ ସହ ଅନ୍ୟ ୧୬ ବିଧାୟକ ମଧ୍ୟ ମନ୍ତ୍ରୀ ପଦ ପାଇଁ ସୋମବାର ଶପଥ ନେଇଛନ୍ତି । କ୍ୟାବିନେଟ୍ ମନ୍ତ୍ରୀ ଭାବେ କନୁଭାଇ ଦେଶାଇ, ରୁଷିକେଶ ପଟେଲ, ବଳବନ୍ତ ସିଂ ରାଜପୁତ, ମୁଲୁଭାଇ ବେରା, ଜଗଦୀଶ ବିଶ୍ୱକର୍ମା ପ୍ରମୁଖ ଶପଥ ନେଇଛନ୍ତି । ଏମାନଙ୍କ ମଧ୍ୟରୁ ଅଧିକାଂଶ ପୁରୁଣା ମୁହଁ ଥିବା ଦେଖିବାକୁ ମିଳିଛି । ପୂର୍ବରୁ ପଟେଲଙ୍କ ମନ୍ତ୍ରୀମଣ୍ଡଳରେ ସାମିଲ ଥିବା କିଛି ମନ୍ତ୍ରୀଙ୍କୁ ଏଥର ବି ମନ୍ତ୍ରୀ ଭାବେ ସୁଯୋଗ ମିଳିଥିବା ବେଳେ କେତେକଙ୍କୁ ବାଦ୍ ଦିଆଯାଇଛି ।
ଭୁପେନ୍ଦ୍ର ପଟେଲ ଗତ ବର୍ଷ ସେପ୍ଟେମ୍ବର ମାସରେ ମୁଖ୍ୟମନ୍ତ୍ରୀ ଭାବେ ଶପଥ ନେଇଥିଲେ । ବିଜୟ ରୂପାନୀଙ୍କୁ ରାତାରାତି ହଟେଇ ଏହି ସ୍ଥାନରେ ପଟେଲଙ୍କୁ ବସାଇଥିଲା ବିଜେପି । କାରଣ ୨୦୨୨ ବିଧାନସଭା ନିର୍ବାଚନ ପାଇଁ ପଟେଲ ସମ୍ପ୍ରଦାୟର ଭୋଟ ବିଜେପି ପାଇଁ ବେଶ ଗୁରୁତ୍ୱ ରଖୁଥିଲା । ସେପଟେ ବିଜେପି ଗୁଜରାଟରେ ଦୀର୍ଘ ୨୭ ବର୍ଷ ଧରି କ୍ଷମତାରେ ରହିଆସୁଥିବା ବିଜେପି ୭ମ ଥର ମଧ୍ୟ ବାଜି ମାରିଛି