ପ୍ରଧାନମନ୍ତ୍ରୀଙ୍କ ବିରୋଧରେ କଂଗ୍ରେସ ନେତାଙ୍କ ଆପତ୍ତିଜନକ ଟିପ୍ପଣୀ । କହିଲେ ସମ୍ବିଧାନର ସୁରକ୍ଷା ପାଇଁ ମୋଦୀଙ୍କ ହତ୍ୟା କରିବା ପାଇଁ ରୁହ ତତ୍ପର
କନକ ବ୍ୟୁରୋ : ମଧ୍ୟପ୍ରଦେଶର ପୂର୍ବତନ ମନ୍ତ୍ରୀ ତଥା କଂଗ୍ରେସର ବରିଷ୍ଠ ନେତା ରାଜ ପଟେରିଆଙ୍କ ବିବାଦୀୟ ବୟାନ୍ ସାମ୍ନାକୁ ଆସିଛି । ସମ୍ବିଧାନ ବଂଚାଇବାର ଅଛି ତ, ମୋଦୀଙ୍କୁ ହତ୍ୟା କରିବାକୁ ପ୍ରସ୍ତୁତ ରୁହ, ଏଭଳି ବୟାନ୍ ଦେଇ ବିବାଦରେ ଫଶିଛନ୍ତି ଏହି କଂଗ୍ରେସ ନେତା । ପାନ୍ନାରେ ଏକ ରାଜନୈତିକ ସଭାରେ ଯୋଗ ଦେଇ କର୍ମୀଙ୍କୁ ଏଭଳି ବିବାଦୀୟ ମନ୍ତବ୍ୟ ଦେଇଛନ୍ତି ରାଜା ପଟୋରିଆ । ଯାହାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବା ସାଙ୍ଗକୁ ଏ ଘଟଣାକୁ ନେଇ ବିଜେପି ତାଙ୍କୁ ଘେରିବା ଆରମ୍ଭ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ରାଜ ପଟେରିଆ କହିଥିଲେ କି, ଯଦି ସମ୍ବିଧାନ ବଂଚାଇବାର ଅଛି, ତେବେ ପ୍ରଧାନମନ୍ତ୍ରୀ ମୋଦୀଙ୍କୁ ହତ୍ୟା କରିବାକୁ ପ୍ରସ୍ତୁତ ରୁହ । ଏକ ରାଜନୈତିକ ସଭାରେ ଖୋଲାଖୋଲି ଭାବେ କର୍ମୀଙ୍କୁ ଏଭଳି ଗୁରୁମନ୍ତ୍ରଣା ଦେଇ ବିବାଦରେ ଫଶିଛନ୍ତି ମଧ୍ୟପ୍ରଦେଶର ପୂର୍ବତନ ମନ୍ତ୍ରୀ ତଥା କଂଗ୍ରେସର ବରିଷ୍ଠ ନେତା ରାଜା ପଟେରିଆ । ରବିବାର ପାନ୍ନାରେ କଂଗ୍ରେସର ଏକ କାର୍ଯ୍ୟକ୍ରମ ଚାଲିଥିଲା । ଏହି ସଭାରେ କର୍ମୀଙ୍କ ସହ ଆଲୋଚନା କରିବା ବେଳେ ରାଜା ପଟେରିଆ କହିଥିଲେ, ମୋଦୀ ଧର୍ମ, ଜାତି, ଭାଷା ଆଧାରରେ ଦେଶକୁ ବିଭାଜନ କରୁଛନ୍ତି । ଯଦି ଆପଣମାନେ ସମ୍ବିଧାନ ବଂଚାଇବାକୁ ଚାହୁଁଛନ୍ତି, ତେବେ ମୋଦୀଙ୍କୁ ହତ୍ୟା କରିବାକୁ ପ୍ରସ୍ତୁତ ରୁହ । ସେପଟେ ଏଭଳି ବୟାନ୍ ସାମ୍ନାକୁ ଆସିବା ପରେ ବିଜେପି ଏହାକୁ ନେଇ କଂଗ୍ରେସକୁ ଟାର୍ଗେଟ କରିଛି । ଘଟଣାକୁ ମଧ୍ୟପ୍ରଦେଶ ମୁଖ୍ୟମନ୍ତ୍ରୀ ଶିବରାଜ ସିଂ ଚୌହ୍ୱାନ ନିନ୍ଦା କରିଛନ୍ତି । ସେହିପରି ଗୃହମନ୍ତ୍ରୀ ନରୋତମ ମିଶ୍ର ତାଙ୍କ ବିରୁଦ୍ଧରେ ମାମଲା ରୁଜୁ କରିବାକୁ ପୋଲିସକୁ ନିର୍ଦ୍ଦେଶ ଦେଇଛନ୍ତି । ଏଥିସହ ସେ କହିଛନ୍ତି, କଂଗ୍ରେସ ମହାତ୍ମାଗାନ୍ଧୀଙ୍କୁ ନୁହେଁ ବରଂ ଫାଶୀବାଦୀ ଚିନ୍ତାଧାରା ରଖିଥିବା ମୁସୋଲିନିକୁ ଅନୁସରଣ କରୁଛି ।
ସେପଟେ ବିବାଦୀୟ ବୟାନକୁ ନେଇ ବିଜେପି ଘେରିବା ପରେ ସଫେଇ ରଖିଛନ୍ତି ରାଜା ପଟେରିଆ । ଏକ ବିବୃତିରେ ସ୍ପଷ୍ଟୀକରଣ ଦେଇ ସେ କହିଛନ୍ତି, ମୁଁ ଜଣେ ବ୍ୟକ୍ତି, ଯିଏ ମହାତ୍ମାଗାନ୍ଧୀଙ୍କ ଆଦର୍ଶ ଅନୁସରଣ କରୁଛି । ସଭାରେ ମୋର ଭାଷଣର ଉଦ୍ଦେଶ୍ୟ ନରେନ୍ଦ୍ର ମୋଦୀଙ୍କୁ ହତ୍ୟା କରିବା ନୁହେଁ, ବରଂ ପରବର୍ତୀ ନିର୍ବାଚନରେ ତାଙ୍କୁ ପରାସ୍ତ କରିବା । କଥା ପ୍ରସଙ୍ଗରେ ହୁଏତ ଏପରି ଶଦ୍ଦ ପାଟିରୁ ବାହାରିଯାଇଥିବ, ହେଲେ ଏହାକୁ ଭୂଲଭାବରେ ଉପସ୍ଥାପନା କରାଯାଉଛି । ଏହି ପ୍ରସଙ୍ଗରେ ବିଜେପି ଅଯଥା ରାଜନୀତି କରୁଥିବା ସେ କହିଛନ୍ତି ।
ତେବେ ଏହା ପ୍ରଥମ ଥର ନୁହେଁ ଯେବେ ପ୍ରଧାନମନ୍ତ୍ରୀଙ୍କ ବିରୋଧରେ କଗ୍ରେସ ନେତା କୌଣସି ବିବାଦୀୟ ବୟାନ ଦେଇଛନ୍ତି । ଅନେକବାର ଏଭଳି ଘଟଣା ସାମ୍ନାକୁ ଆସିଛି ଓ ଏହାକୁ ଟାର୍ଗେଟ କରି ନିଜେ ପ୍ରଧାନମନ୍ତ୍ରୀ ଓ ବିଜେପି ତରଫରୁ ପାଲଟା ଜବାବ ଦିଆଯାଇଛି ।