ସଭାପତି ରେସରୁ ଓହରିଲେ ଗେହଲଟ । ଚାଲିଯାଇପାରେ ମୁଖ୍ୟମନ୍ତ୍ରୀ ପଦବୀ
କନକ ବ୍ୟୁରୋ : କଂଗ୍ରେସ ସଭାପତି ନିର୍ବାଚନକୁ ନେଇ ରାଜସ୍ଥାନରେ ଦେଖାଦେଇଥିବା ରାଜନୈତକ ସଙ୍କଟ ଭିନ୍ନ ମୋଡ ନେଇଛି । ସଭାପତି ନିର୍ବାଚନ ଲଢିବେ ନାହିଁ ବୋଲି ଗୁରୁବାର ସୋନିଆ ଗାନ୍ଧୀଙ୍କୁ ଭେଟି ଦେଢ ଘଂଟା ଆଲୋଚନା ପରେ କହିଛନ୍ତି ଅଶୋକ ଗେହଲଟ । ଏବଂ ରାଜସ୍ଥାନରେ ଦେଖିଦେଇଥିବା ବିଶୃଙ୍ଖଳା ପାଇଁ ସୋନିଆଙ୍କୁ କ୍ଷମା ମାଗିଛନ୍ତି ଗେହଲଟ । କିନ୍ତୁ ଦିନ କି ଦୁଇ ଦିନ ମଧ୍ୟରେ ରାଜସ୍ଥାନ ନୂଆ ମୁଖ୍ୟମନ୍ତ୍ରୀ ପାଇବ ବୋଲି କହିଛନ୍ତି ଏଆଇସିସି ସାଧାରଣ ସମ୍ପାଦକ କେ.ସି ବେଣୁଗୋପାଳ । ରାଜସ୍ଥାନରେ କୌଣସି ଡ୍ରାମା ଚାଲିବ ନାହିଁ, ଦୁଇ ଦିନ ଭିତରେ ସବୁକିଛି ସ୍ପଷ୍ଟ ହୋଇଯିବ ଏବଂ କିଏ ନୂଆ ମୁଖ୍ୟମନ୍ତ୍ରୀ ହେବ ତାହା ଆପଣମାନେ ଜାଣିପାରିବେ ବୋଲି କହିଛନ୍ତି ବେଣୁଗୋପାଳ ।
Kanak News is now on WhatsApp
Join and get latest news updates delivered to you via WhatsApp
ତିନି ଦିନ ପୂର୍ବରୁ କଂଗ୍ରେସ ସଭାପତି ନିର୍ବାଚନ ଲଢିବେ ନାହିଁ ବୋଲି କହିଥିବା ବରିଷ୍ଠ ନେତା ଦିଗବିଜୟ ସିଂ ନିର୍ବାଚନ ଲଢିବା ନେଇ ଗୁରୁବାର ସ୍ପଷ୍ଟ କରିଛନ୍ତି । ବୁଧବାର ସୋନିଆ ଗାନ୍ଧୀଙ୍କୁ ଭେଟିବା ପରେ ଶୁକ୍ରବାର ନାମାଙ୍କନ ଦାଖଲ କରିବେ ବୋଲି କହିଛନ୍ତି ଦିଗବିଜୟ ସିଂ । ପୂର୍ବରୁ ବରିଷ୍ଠ କଂଗ୍ରେସ ନେତା ଶଶି ଥରୁର ନିର୍ବାଚନ ଲଢିବା ନେଇ ସ୍ପଷ୍ଟ କରିଥିବାରୁ ଏହି ଦୁଇ ବରିଷ୍ଠ ନେତାଙ୍କ ମଧ୍ୟରେ ହେବ ଲଢେଇ । କିନ୍ତୁ ଗାନ୍ଧୀ ପରିବାରର ସମର୍ଥନ ଦିଗବିଜୟଙ୍କ ସହ ରହିଥିବାରୁ ସେ ହିଁ କଂଗ୍ରେସର ନୂଆ ସଭାପତି ହେବା ଏକ ପ୍ରକାର ସ୍ପଷ୍ଟ ହୋଇଯାଇଛି ।
ଶୁକ୍ରବାର ନାମାଙ୍କନ ଦାଖଲର ଶେଷ ତାରିଖ ଧାର୍ଯ୍ୟ କରାଯାଇଥିବା ବେଳେ ୧୭ ତାରିଖ ନିର୍ବାଚନ ହେବ । ଆଉ ଦିର୍ଘ ୨୪ ବର୍ଷ ପରେ କଂଗ୍ରେସ ଦେଖିବ ଅଣ ଗାନ୍ଧୀ ମୁଖିଆ । ହେଲେ ରାଜସ୍ଥାନର ମୁଖ୍ୟମନ୍ତ୍ରୀ ପରିବର୍ତନ ହେବ ନା ଗେହଲଟ ମୁଖ୍ୟମନ୍ତ୍ରୀ ରହିବେ ତାକୁ ନେଇ ଏବେବି ଜାରି ରହିଛି ସସପେନ୍ସ ।