ରାଜ୍ୟ ରାଜନୀତିକୁ ସରଗରମ କଲା ପାଣ୍ଡିଆନଙ୍କ ମନ୍ତବ୍ୟ । ବିଜେଡି ନେତାଙ୍କ ମନ୍ତବ୍ୟ ପରେ ଆରମ୍ଭ ହେଲା ଚର୍ଚ୍ଚା । ବିଜେପିର ପ୍ରଶ୍ନ, ବିଜେଡିରେ ‘ସିନ୍ଦେ’ କିଏ?
କନକ ବ୍ୟୁରୋ: ଓଡ଼ିଶା ରାଜନୀତିରେ ଆଜି ହଠାତ୍ ସିନ୍ଦେ ପ୍ରସଙ୍ଗ ଚର୍ଚ୍ଚାର ପରିସରକୁ ଚାଲିଆସିଛି । ଆପଣଙ୍କ ମନରେ ପ୍ରଶ୍ନ ଆସୁଥିବ, ସିନ୍ଦେ କିଏ? ଆପଣଙ୍କୁ ମହାରାଷ୍ଟ୍ରର ଅପରେସନ ଲୋଟସର କଥା ନିଶ୍ଚୟ ମନେଥିବ । ମହାରାଷ୍ଟ୍ରରେ ମହାମେଣ୍ଟ ସରକାରକୁ ମାତ୍ ଦେଇ ଉଦ୍ଧବ ଠାକରେଙ୍କ ହାତରୁ ସରକାର ଛଡ଼ାଇ ଆଣିଥିଲା ବିଜେପି । ଏକନାଥ ସିନ୍ଦେ ବିଦ୍ରୋହ କରି ଉଦ୍ଧବ ସରକାରର ପତନ ଘଟାଇବାରେ ପ୍ରମୁଖ ଭୂମିକା ନେଇଥିଲେ । ଏବେ ବିଜେଡିର ପ୍ରଭାବଶାଳୀ ନେତା ଭି.କେ ପାଣ୍ଡିଆନ କହିଛନ୍ତି ଓଡ଼ିଶାରେ ମଧ୍ୟ ଅପରେସନ ଲୋଟସ୍ ଚଳାଇବାକୁ ପ୍ରୟାସ କରୁଛି ବିଜେପି । ଆଉ ଏହି ସମୟରେ ବିଜେପି ପ୍ରଶ୍ନ କରିଛି, ତାହା ହେଲେ ବିଜେଡିରେ ଏକନାଥ ସିନ୍ଦେ କିଏ?
Kanak News is now on WhatsApp
Join and get latest news updates delivered to you via WhatsApp
ବିଜେଡିର ସବୁଠାରୁ ଚର୍ଚ୍ଚିତ ଓ ପାୱାରଫୁଲ ନେତା କୁହାଯାଉଥିବା ଭି.କେ. ପାଣ୍ଡିଆନଙ୍କ ଏହିି ମନ୍ତବ୍ୟ ରାଜ୍ୟ ରାଜନୀତିରେ ଚର୍ଚ୍ଚାର ବିଷୟ ହୋଇଛି । ରାଜନୈତିକ ମହଲ ଠାରୁ ଆରମ୍ଭ କରି ସବୁଠି ଏହା ଆଲୋଚନାର ପ୍ରସଙ୍ଗ ପାଲଟିଛି । ଏହି ଚର୍ଚ୍ଚା ଭିତରେ ପାଲଟା ପ୍ରଶ୍ନ କରିଛି ବିଜେପି । ବିଜେଡିରେ ସିନ୍ଦେ କିଏ ବୋଲି ପ୍ରଶ୍ନ କରିଛନ୍ତି ବିଜେପି ନେତା । ସୂଚନାଯୋଗ୍ୟ ଯେ, ଏକନାଥ ସିନେ୍ଧ ଶିବସେନାରେ ବିଦ୍ରୋହ କରିବା ପରେ ସଂଖ୍ୟା ଗରିଷ୍ଠତା ହରାଇଥିଲା ଉଦ୍ଧବ ଠାକରେ ନେତୃତ୍ୱଧୀନ ମେଣ୍ଟ ସରକାର । ପରବର୍ତ୍ତୀ ସମୟରେ ଏକନାଥ ସିନ୍ଦେ ବିଜେପି ସହ ମିଶି ମହାରାଷ୍ଟ୍ରରେ ସରକାର ଗଢ଼ିଥିଲେ ଓ ମୁଖ୍ୟମନ୍ତ୍ରୀ ଆସନରେ ବସିଥିଲେ ।
ତେବେ ନିର୍ବାଚନ ସମୟରେ, ପାଣ୍ଡିଆନ ମହାରାଷ୍ଟ୍ରର ଉଦାହରଣ ଦେବା ରାଜ୍ୟ ରାଜନୀତିକୁ ଉଷ୍ମ କରିଛି । ରାଜନୀତି ସମୀକ୍ଷକଙ୍କ ଠାରୁ ଆରମ୍ଭ କରି ରାଜ୍ୟବାସୀଙ୍କ ମନରେ ଭିନ୍ନ ଭିନ୍ନ ପ୍ରଶ୍ନ ଉଠିବାରେ ଲାଗିଛି । ଅନ୍ୟପଟେ କଂଗ୍ରେସ ଆହୁରି ସାଂଘାତିକ ଅଭିଯୋଗ ଆଣିଛି । ବରିଷ୍ଠ ନେତା ନରସିଂହ ମିଶ୍ର ବିଜେଡିର ଗୋଷ୍ଠୀ କନ୍ଦଳ କଥା ଉଠାଇ କଟାକ୍ଷ କରିଛନ୍ତି ।
ପାଣ୍ଡିଆନଙ୍କ ଅଭିଯୋଗ, ବିରୋଧୀଙ୍କ ପାଲଟା ଅଭିଯୋଗ ପରେ, ଓଡିଶାବାସୀଙ୍କ ମନରେ ଏକାଧିକ ପ୍ରଶ୍ନ ଉଙ୍କି ମାରୁଛି । ପ୍ରଶ୍ନ ଉଠୁଛି, ବିଜେପି ମହାରାଷ୍ଟ୍ର, କର୍ଣ୍ଣାଟକ ଭଳି ଓଡିଶାରେ ଅପରେସନ ଲୋଟସ ଚଳାଇବାକୁ ଯୋଜନା କରିଛି କି? ଯଦି ବିଜେପି ମହାରାଷ୍ଟ୍ର ଭଳି ଓଡିଶାରେ ଅପରେସନ ଲୋଟସ କରେ ଏହାକୁ କେମିତି ଚେକ୍ ଦେବ ବିଜେଡି?