କନକ ବ୍ୟୁରୋ : ଦିଲ୍ଲୀର ଯନ୍ତରମନ୍ତରରେ ପୁଣିଥରେ ଧାରଣାରେ ବସିଛନ୍ତି ଭାରତୀୟ ରେସଲର । ଭାରତୀୟ କୁସ୍ତି ମହାସଂଘ ବା ଡବ୍ଲ୍ୟୁଏଫଆଇର ଅଧ୍ୟକ୍ଷ ବ୍ରଜଭୂଷଣ ସିଂଙ୍କ ବିରୋଧରେ ପୁଣିଥରେ ଧାରଣା ଦେବା ସହ ପୋଲିସ ଉପରେ ମଧ୍ୟ ଗୁରୁତର ଅଭିଯୋଗ ଆଣିଛନ୍ତି ରେସଲ । ବଜରଙ୍ଗ ପୁନିଆ, ଭିନେଶ ଫୋଗାଟ୍, ସାକ୍ଷୀ ମଲିକଙ୍କ ସମେତ ଦେଶ କିଛି ରେସଲର ରାତିତମାମ ଧାରଣାରେ ବସିଛନ୍ତି । ପୋଲିସ ସେମାନଙ୍କର ଖାଦ୍ୟ-ପାନୀୟ ବନ୍ଦ କରିବା ସହ ହଇରାଣ କରୁଥିବା ଏମାନେ ଅଭିଯୋଗ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଧାରଣାରେ ବସିଥିବା ଭିନେଶ ଫୋଗାଟ୍ କହିଛନ୍ତି ଯେ ସେ ଅସୁସ୍ଥ ଅଛନ୍ତି ଏବଂ ସେଥିପାଇଁ ଗାଡ଼ିରୁ ଔଷଧ ଆଣିବାକୁ ଯାଇଥିଲେ । ଏହି ସମୟରେ ପୋଲିସ ଚାରିଆଡ଼େ ରାସ୍ତା ଅବରୋଧ କରିବା ସହ ସେମାନଙ୍କୁ ଭିତରକୁ ଯିବାକୁ ବାରଣ କରିଥିଲେ । ଏପରିକି ତାଙ୍କୁ ଧକ୍କା ମରାଯାଇଥିବା ମଧ୍ୟ ଅଭିଯୋଗ ଆଣିଛନ୍ତି ଭିନେଶ । ଭିନେଶ ଆହୁରି କହିଛନ୍ତି, ବାରମ୍ବାର ପ୍ରୟାସ ସତ୍ୱେ ସରକାରଙ୍କ ତରଫରୁ କୌଣସି ପ୍ରତିକ୍ରିୟା ମିଳିଲାନାହିଁ । ଆଉ ଯେପର୍ଯ୍ୟନ୍ତ ଆମକୁ ନ୍ୟାୟ ନମିଳିଚି, ସେଯାଏଁ ଖାଦ୍ୟ ଓ ପାଣି ଗ୍ରହଣ କରିବୁ ନାହିଁ ବୋଲି କହିଛନ୍ତି । ସେହିପରି ବଜରଙ୍ଗ ପୁନିଆ କହିଛନ୍ତି ଯେ ସେ ଧାରଣାରୁ ହଟିବେ ନାହିଁ ।
ସୂଚନା ଅନୁସାରେ, ଡବ୍ଲୁଏଫଆଇର ସଭାପତି ମହିଳା ଖେଳାଳିଙ୍କୁ ଯୌନ ନିର୍ଯାତନ କରିଥିବା ଅଭିଯୋଗ ଆଣି ରେସଲରମାନେ ବ୍ରଜଭୂଷଣ ସିଂଙ୍କ ବିରୋଧରେ ଗତ ଜାନୁଆରୀରେ ଜନ୍ତରମନ୍ତରରେ ଧାରଣାରେ ବସିଥିଲେ । ଏହି ମାମଲାରେ ଭାରତୀୟ ଅଲିମ୍ପିକ୍ ଆସୋସିଏସନ୍ ଓ କ୍ରୀଡ଼ା ମନ୍ତ୍ରାଳୟ ଏକ କମିଟି ଗଠନ କରିଥିଲେ । କିନ୍ତୁ ଏପର୍ଯ୍ୟନ୍ତ ବ୍ରଜଭୂଷଣଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ନିଆଯାଇନଥିବା ଅଭିଯୋଗ ଆଣିଛନ୍ତି ରେସଲର ।