ସ୍ୱାଭିମାନ ଅଂଚଳରେ ମାଛ ଦେଉଛି ରୋଜଗାର । ସ୍ୱାବଲମ୍ବି ହେଉଛନ୍ତି ସ୍ୱାଭିମାନ ଅଂଚଳବାସୀ
କନକ ବ୍ୟୁରୋ : ସଫଳ ହୋଉଛି ସେତୁ ଯୋଜନା । ମାଛ ବିକି ସ୍ୱାବଲମ୍ବି ହୋଉଛନ୍ତି ସ୍ୱାଭିମାନ ଅଂଚଳବାସୀ । ଏ ଚିତ୍ର ହେଉଛି ମାଲାକନଗିରି ଜିଲ୍ଲା ବାଲିମେଳା ଜଳଭଣ୍ଡାରର । ୨୦୧୮ ଜୁଲାଇ ମାସରେ ଗୁରୁପ୍ରୀୟା ସେତୁ ନିର୍ମାଣ ପରେ ସେତୁ ଯୋଜନା ମାଧ୍ୟମରେ ୧୦୦ କୋଟି ଟଙ୍କାର ପ୍ୟାକେଜ ଘୋଷଣା କରିଥିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଆଉ ମତ୍ସ୍ୟଜୀବୀଙ୍କ ପାଇଁ ସ୍ୱତନ୍ତ୍ର ଯୋଜନା ପ୍ରସ୍ତୁତ କରାଯାଇ କୋଟି କୋଟି ଟଙ୍କାର ମାଛ ଯାଆଁଳ ଛାଡାଯାଇଥିଲା । ମାଛ ଛାଡିବାର ତିନି ବର୍ଷ ପରେ ସେତୁ ଯୋଜନା ସଫଳ ହୋଉଥିବା ଦେଖିବାକୁ ମିଳିଛି । ବାଲିମେଳା ଜଳ ଭଣ୍ଡାରରେ ଛଡା ଯାଇଥିବା ଭାକୁର, ରୋହି ଆଦି ମାଛ ବାଲିମେଳା ଜଳ ଭଣ୍ଡାରରୁ ଧରି ଲାଭବାନ ହୋଉଛନ୍ତି ଚାଷୀ । ବିଶେଷ କରି ଜଳଭଣ୍ଡାରର ମଧୁର ପାଣି ମାଛର ବେଶ ଚାହିଦା ରହିଥିବାରୁ ଏହା ଚିତ୍ରକୋଣ୍ଡା ଓ ମାଲକାନଗିରି ବଜାରକୁ ପଠାନ୍ତି ମତ୍ସଜୀବି । ଆଉ ଘାଟରେ ଏହି ମାଛର କିଲୋ ପିଛା ଦର ୧୫୦ ରୁ ୨୦୦ ଟଙ୍କା ରହିଥିବା ବେଳେ ବଜାରରେ ୨୫୦ ରୁ ୩୦୦ ଟଙ୍କା ଦରରେ ବିକ୍ରୀ ହୋଇଥାଏ ।
Kanak News is now on WhatsApp
Join and get latest news updates delivered to you via WhatsApp
ଗୁରୁପ୍ରୀୟା ପୋଲ ଉଦଘାଟନ ପରେ ସେତୁ ଯୋଜନା ମାଧ୍ୟମରେ ମତ୍ସଜୀବିଙ୍କୁ ପ୍ରୋତ୍ସାହନ ଯୋଗାଇବା ଲାଗି ପରିକଳ୍ପନା କରି ଥିଲେ ତତକାଳିନ ଜିଲ୍ଲାପାଳ ମନିଷ ଅଗ୍ରଓାଲ । ୨୦୧୯-୨୦ ଆର୍ଥୀକ ବର୍ଷ ଠାରୁ ଆରମ୍ଭ କରି ବର୍ତମାନ ଯାଏଁ ପ୍ରାୟ ୧୦ କୋଟି ଟଙ୍କାର ମାଛ ଜାଅାଁଳ ଜଳଭଣ୍ଡାରରେ ଛଡାଯାଇଛି । ଏହା ସହ ମତ୍ସଜୀବୀଙ୍କ ପାଇଁ ଡଙ୍ଗା, ମାଛ ଜାଲ, ଲାଇଫ୍ ଜାକେଟ୍ ଆଦି ପ୍ରଦାନ କରିଛି ଜିଲ୍ଲା ପ୍ରଶାସନ । ୧୦ଟି ଗୃପ ମାଧ୍ୟରେ ୧୫୦୦ରୁ ଉର୍ଦ୍ଧ ମତ୍ସ୍ୟଜୀବୀଙ୍କୁ ଅନ୍ତର୍ଭୁକ୍ତ କରାଯାଇ ମାଛ ଚାଷ ପାଇଁ ପ୍ରୋତ୍ସାହନ ଯୋଗାଇବା ସହ ସ୍ଥିତି ଅନୁଧ୍ୟାନ କରିଥିଲା ଖୋଦ ମୁଖ୍ୟ ଶାସନ ସଚିବ ସୁରେଶ ମହାପାତ୍ର । ଆଉ ତାହାର ପ୍ରତିଫଳନ ଏବେ ଦେଖିବାକୁ ମିଳୁଛି । ପ୍ରତି ଦିନ ୧୦ ରୁ ୧୫ କିଲୋ ମାଛ ଧରି ଦୁଇ ପଇସା ରୋଜଗାର କରି ସ୍ୱାବଲମ୍ବୀ ହୋଇପାରିଛନ୍ତି ସ୍ୱାଭିମାନ ଅଂଚଳର ମତ୍ସ୍ୟଜୀବି ।
ଦିନ ଥିଲା ଜଳ ଭଣ୍ଡାର ଆରପଟେ ବସବାସ କରୁ ଥିବା ୧୫୧ ଟି ଗାଁର ଲୋକେ ଗଂଜେଇ ଚାଷ କରି ନିଜ ଜୀବିକା ନିର୍ବାହ କରୁଥିଲେ । ଆଉ ଏ ହୋଉଛି ପରିବର୍ତନର ଚିତ୍ର । ଦୀର୍ଘ ଦିନ ଧରି ବୁଡି ଅଂଚଳ ବା ବିଚ୍ଛିନ୍ନାଂଚଳ ଭାବେ ପ୍ରସିଦ୍ଧି ଲାଭ କରିଥିଲା ବାଲିମେଳା ଜଳଭଣ୍ଡାର ଘେରରେ ଥିବା ଅଂଚଳ । ତେବେ ଗୁରୁପ୍ରୀୟା ସେତୁ ନିର୍ମାଣ ପରେ କେବଳ ମତ୍ସ୍ୟଜୀବି ନୁହଁ ହଳଦି, ଝାଡୁ, ଆମ୍ବ, ସୁଆଁ, ବିରି, ମାଣ୍ଡିଆ ଆଦି ଭିନ୍ନ ଭିନ୍ନ ଚାଷ କରି ରୋଜଗାରକ୍ଷମ ହେଉଛନ୍ତି ସ୍ୱାଭିମାନ ଅଂଚଳବାସୀ ।