ଚୂଡାନ୍ତ ହେଲା କଂଗ୍ରେସ ଅଧ୍ୟକ୍ଷ ନିର୍ବାଚନ ତାରିଖ: କଂଗ୍ରେସ କାର୍ଯ୍ୟକାରିଣୀ ବୈଠକରେ ବଡ଼ ନିଷ୍ପତ୍ତି
କନକ ବ୍ୟୁରୋ: ଦିପାବଳୀ ପୂର୍ବରୁ ଜଣାପଡିବ କଂଗ୍ରେସର ନୂଆ ମଙ୍ଗୁଆଳ କିଏ ହେବେ । ରବିବାର କଂଗ୍ରେସ କାର୍ଯ୍ୟକାରିଣୀ ବୈଠକରେ ଏହି ନିଷ୍ପତି ନିଆଯାଇଛି । ଅକ୍ଟୋବର ୧୭ରେ ଅଧ୍ୟକ୍ଷ ପଦ ପାଇଁ ନିର୍ବାଚନ ହେବ ଏବଂ ୧୯ ତାରିଖରେ ଫଳାଫଳ ଘେଷଣା ହେବ ବୋଲି ତାରିଖ ସ୍ଥିର ହୋଇଛି । ୨୨ ସେପ୍ଟେମ୍ବରରେ ଏ ନେଇ ବିଧିବଦ୍ଧ ଭାବେ ବିଜ୍ଞପ୍ତି ପ୍ରକାଶ ପାଇବ । ୨୪ ଏବଂ ୩୦ରେ ନାମାଙ୍କନ ଭରିବାର ଶେଷ ତାରିଖ ରହିଛି । ସ୍ୱାସ୍ଥ୍ୟ ପରୀକ୍ଷା ପାଇଁ ବିଦେଶ ଗସ୍ତରେ ଥିବାରୁ ଅନ୍ତରୀଣ ଅଧ୍ୟକ୍ଷା ସୋନିଆ ଗାନ୍ଧି ଭିଡିଓ କନଫରେନସିଂ ଜରିଆରେ ଯୋଡି ହୋଇଥିଲେ । ଆଉ ସାଙ୍ଗରେ ଥିଲେ ରାହୁଲ ଗାନ୍ଧି ଏବଂ ପ୍ରିୟଙ୍କା ଗାନ୍ଧି ।
Kanak News is now on WhatsApp
Join and get latest news updates delivered to you via WhatsApp
୨୦୨୪ ସାଧାରଣ ନିର୍ବାଚନ ପୂର୍ବରୁ ଦଳ ପାଇଁ ବଡ ଚ୍ୟାଲେଞ୍ଜ ଚଳିତ ବର୍ଷ ଶେଷରେ ହେବାକୁ ଥିବା ଗୁଜରାଟ ବିଧାନସଭା ନିର୍ବାଚନ ଏବଂ ପରେ କର୍ଣ୍ଣାଟକ ଓ ହିନ୍ଦୀ ହାର୍ଟଲ୍ୟାଣ୍ଡ ନିର୍ବାଚନ । ୨୦୧୯ ସାଧାରଣ ନିର୍ବାଚନ ପୂର୍ବରୁ ରାଜସ୍ଥାନ, ମଧ୍ୟପ୍ରଦେଶ, ଛତିଶଗଡ ସହିତ କର୍ଣ୍ଣାଟକରେ ଗେରୁଆ ଗଡରେ ଧସେଇ ପଶିଥିଲା କଂଗ୍ରେସ । ପରେ କିନ୍ତୁ ରାଜନୈତିକ ସମୀକରଣ ଭିତରେ ମଧ୍ୟପ୍ରଦେଶ ଓ କର୍ଣ୍ଣାଟକରେ ବଦଳିଯାଇଛି ସରକାର । ଏହି ସମୟରେ ଦଳର ଅଧ୍ୟକ୍ଷ ଥିଲେ ରାହୁଲ ଗାନ୍ଧି । କିନ୍ତୁ ୨୦୧୯ ନିର୍ବାଚନ ହାରିବା ପରେ ସେ ଇସ୍ତଫା ଦେଇଛନ୍ତି । ଏବେ କିନ୍ତୁ ସେ ଅଧ୍ୟକ୍ଷ ପଦ ପାଇଁ ରାଜି ନହେଉଥିବାରୁ ଜଣେ ଅଣ ଗାନ୍ଧି ନେତାଙ୍କୁ ଦଳର ଅଧ୍ୟକ୍ଷ କରିବାକୁ କଂଗ୍ରେସ ଯୋଜନା କରୁଥିବା ସୂଚନା ରହିଛି । ଆଉ ଏହି ତାଲିକାରେ ଆଗରେ ରହିଛନ୍ତି ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲୋଟ । ଅନ୍ୟପଟେ ପୁଣିଥରେ ରାହୁଲ ଗାନ୍ଧୀଙ୍କୁ ଅଧ୍ୟକ୍ଷ ପଦରେ ବସାଇବାକୁ ଗୋଟିଏ ବଡ ଗୋଷ୍ଠୀ ପ୍ରୟାସ କରୁଥିବା କୁହାଯାଉଛି ।
ଅଧ୍ୟକ୍ଷ ନିର୍ବାଚନ ପୂର୍ବରୁ ସେପ୍ଟେମ୍ବର ୭ରୁ ସାରା ଦେଶରେ ଭାରତ ଯୋଡୋ ଯାତ୍ରା ଆରମ୍ଭ କରିବାକୁ ଯାଉଛି । କିନ୍ତୁ ଏହା ପୂର୍ବରୁ ଦଳର ପୁରୁଖା ନେତା ଗୁଲାମ ନବୀ ଆଜାଦ ଇସ୍ତଫା ଦେଇଛନ୍ତି । ଆଉ ଜି-୨୩ ଗୋଷ୍ଠୀରେ ଥିବା ଅସନ୍ତୁଷ୍ଟ ନେତା ଗୁଲାମଙ୍କ ଘରେ ଏକାଠି ହୋଇ ବୈଠକ କରିବା ଦଳର ଅଡୁଆରେ ବଢାଇଛି ।
କଂଗ୍ରେସ ଅଧ୍ୟକ୍ଷ ନିର୍ବାଚନ କାର୍ଯ୍ୟକ୍ରମ
ବିଜ୍ଞପ୍ତି: ସେପ୍ଟେମ୍ବର ୨୨
ନାମାଙ୍କନ: ୨୪-୩୦ ସେପ୍ଟେମ୍ବର
ନାମାଙ୍କନ ଯାଞ୍ଚ: ୧ ଅକ୍ଟୋବର
ନାମାଙ୍କନ ପ୍ରତ୍ୟାହାର: ଅକ୍ଟୋବର ୮
ମତଦାନ: ଅକ୍ଟୋବର ୧୭
ଭୋଟ ଗଣତି: ଅକ୍ଟୋବର ୧୯