କନକ ବ୍ୟୁରୋ : ଓଡିଶାର ଭାତହାଣ୍ଡି କୁହାଯାଉଥିବା ବରଗଡରେ ଚକଡା ପୋକ କରୁଛି ରାଜୁତି । ପ୍ରଥମେ ମରୁଡି କିଛି ଅଂଚଳରେ ଦାଉ ସାଧିଲା ଆଉ ଏବେ ଚକଡା ପୋକ ଚଡକ ଭଳି ମାଡି ଆସିଛି । ଏକର ଏକର ଚାଷ ଜମି ଗୋଟିଏ ରାତି ଭିତରେ ନଷ୍ଟ ହୋଇଯାଉଛି । ଚାଷଜମି ନଷ୍ଟ ହେଉଥିବା ଦେଖି କେଉଁଠି ଚାଷୀ ମୃତ୍ୟୁର ରାସ୍ତାକୁ ବାଛି ନେଇଛି ତ ପୁଣି କେଉଁଠି ଏକର ଏକର ଚାଷ ଜମିରେ ନିଆଁ ଲଗାଇ ଦେଇଛି । ହାତ ଉଧାରୀ ଆଉ ବ୍ୟାଙ୍କରୁ ଋଣ ନେଇ ଫସଲ କରିଥିବା ଚାଷୀ ଆଜି ହତାଶ ।
Kanak News is now on WhatsApp
Join and get latest news updates delivered to you via WhatsApp
ପ୍ରତିବର୍ଷ ଅକ୍ଟୋବର ମାସରେ ଧାନ ଫସଲରେ ଦେଖା ଦେଉଥିବା ଏହି ସାଧାରଣ ରୋଗପୋକ ଚଳିତ ବର୍ଷ ଅସାଧାରଣ ଭାବେ ଶକ୍ତିଶାଳୀ ହେବା ସହ ଚାଷୀ ଜୀବନରେ ଚଡକ ପକାଇଛି । ନା ସରକାରୀ ନା ବେସରକାରୀ କିଛି ବି କୀଟନାଶକ କାମ ଦେଉନି । ଏପରିକି ୧୪ରୁ ୧୫ ଥର ଔଷଧ ସିଞ୍ଚନ କରିବା ପରେ ମଧ୍ୟ ଫଳ ଶୂନ । ଯାହାକୁ ନେଇ ଚାଷୀଙ୍କ ମନରେ ଅସନ୍ତୋଷ ଦାନା ବାନ୍ଧୁଛି ।
ବରଗଡ ଜିଲ୍ଲାରେ ଚାଷ ହୋଇଥିବା ଅଧିକାଂଶ ଜମିରେ ସମାନ ଅବସ୍ଥା । ଚକଡା ପୋକ ମହାମାରୀ ଭଳି ମାଡିଚାଲିଛି । ଚାଷଜମିରେ ପୋକ ଏମିତି ଦାଉ ଦେଖାଉଛନ୍ତି ଯେ, ଏକର ପିଛା ୧୦ ରୁ ୧୨ ହଜାର ଟଙ୍କାର ଔଷଧ ପ୍ରୟୋଗ କଲେ ମଧ୍ୟ ଫଳ ଶୁନ । ଚାଷୀ କରିବେ ବା କଣ? ମାର୍କେଟରେ ମିଳୁଥିବା ଔଷଧ କିଣିବାକୁ ବାଧ୍ୟ । ତେବେ ଆଶ୍ଚର୍ଯ୍ୟର କଥା ହେଉଛି, ଔଷଧ ବୋତଲ ଉପରେ ଲେଖା ଥିବା ଟଙ୍କା ଠାରୁ ଢେର କମରେ ଚାଷୀକୁ ଔଷଧ ମିଳେ । ନଗଦରେ ନେଲେ ୩୦୦ ଟଙ୍କା ଆଉ ବାକିରେ ନେଲେ ୫୦୦ ଟଙ୍କା । ଅଭାବରେ ପଡୁଥିବା ଚାଷୀଙ୍କୁ ଠକିବାର ଏହି ତରିକା ବାହାର କରିଛନ୍ତି କିଛି ମୁନାଫାଖୋର ବ୍ୟବସାୟୀ ।
ଅସହାୟ ଚାଷୀ ପାଖରେ କ୍ଷୋଭ କରିବାକୁ ବହୁତ କିଛି ଅଛି । ହେଲେ ଶୁଣିବ କିଏ? ହଜାର ହଜାର ହେକ୍ଟର ଜମିରେ ଫସଲ ନଷ୍ଟ ହୋଇଛି । ସରକାରୀ ଅଧିକାରୀ ଫିଲଡ ଭିଜିଟ କରି କ୍ଷୟକ୍ଷତିର ଆକଳନ କରୁଛନ୍ତି । ହେଲେ ନା ପର୍ଯ୍ୟାପ୍ତ କର୍ମଚାରୀ ଏହି କାର୍ଯ୍ୟରେ ଲାଗୁଛନ୍ତି ନା ସବୁ ଜାଗାରେ ସରକାରୀ ଅଧିକାରୀଙ୍କର ପାଦ ପଡିପାରୁଛି । ଚାଷୀ ଆତ୍ମହତ୍ୟା ନେଇ କୃଷିମନ୍ତ୍ରୀ ଯେଉଁଭଳି ଭାବେ ବୟାନ ଦେଉଛନ୍ତି ତାହାକୁ ଘୋର ବିରୋଧ କରିଛନ୍ତି ଚାଷୀ । ପୂର୍ବରୁ ଚାଷୀ ଆତ୍ମହତ୍ୟା ନେଇ ଦାମ ବିବାଦୀୟ ବୟାନ ଦେଇ ଚର୍ଚ୍ଚାକୁ ଆସିଥିଲେ । ପାରିବାରିକ କଳହ ପାଇଁ ଚାଷୀ ଆତ୍ମହତ୍ୟା କରୁଥିବା ବେଳେ ଏହାକୁ ରାଜନୀତିକ ରଙ୍ଗ ଦିଆଯାଉଛି ବୋଲି ଦାମ କହିଥିଲେ । ଏହାଛଡା ଚାଷୀ ମାନେ ଚାଷ ନାଁରେ ଲକ୍ଷାଧିକ ଟଙ୍କା ଉଠାଇ ଏଥିରେ ମଦ ପିଇବା ସହ ଝିଅ ବାହାଘର କରିଥାନ୍ତି ବୋଲି ଦାମ ବିବାଦୀୟ ବୟାନ ଦେଇଥିଲେ । ଯାହାକୁ ନେଇ ସେତେବେଳେ ପ୍ରବଳ ଚର୍ଚ୍ଚା ହୋଇଥିଲା ।
ପୁଂଜିଭୁତ ନିରାଶା, ଅସହାୟତା ଆଉ ଅସନ୍ତୋଷ ଏବେ ଚରମସୀମାରେ ପହଂଚିଛି । ଆଉ ଚାଷୀକୁଳର ଭରସା ପାଉନାହିଁ ଯେ, ଏ ଦୁର୍ଦ୍ଦିନରେ ସରକାର ସେମାନଙ୍କର ସହାୟକ ହେବେ ଓ ବ୍ୟବସ୍ଥା ସେମାନଙ୍କ ପଛରେ ଛିଡାହେବ ।