ଶବରସାହି ପ୍ରାଥମିକ ସ୍କୁଲର ଘଟଣା : ଭୂତ ଭୟରେ ୪ବର୍ଷ ହେଲା ପଡିଛି ତାଲା
କନକ ବ୍ୟୁରୋ : ଭୂତ ଭୟରେ ଦୀର୍ଘ ୪ ବର୍ଷ ହେଲା ସ୍କୁଲରେ ଝୁଲୁଛି ତାଲା । ଆଉ ପରିତ୍ୟକ୍ତ ଅବସ୍ଥାରେ ପଡ଼ି ରହିଛି ସ୍କୁଲ ଘର । ସ୍କୁଲ ଘରେ ପାଠପଢ଼ା ବନ୍ଦ ରହିଥିବାରୁ ସ୍କୁଲଘର କୋଠା ଏବେ ନିଶାଡ଼ିଙ୍କ କବଜାରେ ରହିଛି । ସଂଧ୍ୟା ହେଲେ ଅସାମାଜିକ ଯୁବକ ମାନେ ଆଡ଼ା ଜମାଉଛନ୍ତି । ଏହା କୌଣସି ଉପାନ୍ତ ଅଞ୍ଚଳ ଘଟଣା ନୁହେଁ ଖୋଦ ରାଜଧାନୀ ଭୁବନଶ୍ୱେରର ୪୩ ନମ୍ବର ୱାର୍ଡ଼ରେ ଥିବା ବଡ଼ଗଡ଼ ସ୍ଥିତ ଶବର ସାହି ପ୍ରାଥମିକ ବିଦ୍ୟାଳୟର ।
Kanak News is now on WhatsApp
Join and get latest news updates delivered to you via WhatsApp
ସ୍ଥାନୀୟ ବାସିନ୍ଦାଙ୍କ କହିବା ଅନୁସାରେ ୪ବର୍ଷ ତଳେ ସପ୍ତମ ଶ୍ରେଣୀରେ ପଢ଼ୁଥିବା ଜଣେ ପିଲାର ବିଦ୍ୟାଳୟ ପରିସରରେ ଥିବା ପଣସ ଗଛରୁ ପଡ଼ି ମୃତ୍ୟୁ ହୋଇଥିଲା । ପିଲାଟିକୁ ଭୁତ ପେଲିଦେବାରୁ ତାର ମୃତ୍ୟୁ ହୋଇଥିବା ଖବର ଚାରିଆଡ଼େ ପ୍ରସାରିତ ହୋଇଥିଲା । ସେହିଦିନ ଠାରୁ ସ୍ଥାନୀୟ ଅଞ୍ଚଳରେ ସ୍କୁଲରେ ଭୁତ ଥିବା ଗୁଜବ ସୃଷ୍ଟି ହୋଇଥିଲା । ଏହାକୁ ଖଣ୍ଡନ କରିବା ପାଇଁ ସ୍କୁଲ ପରିସରରେ କ୍ୟାମେରା ମଧ୍ୟ ଲାଗିଥିଲା ।
ତେବେ ସ୍କୁଲ କର୍ତ୍ତୃପକ୍ଷ ଲୋକଙ୍କୁ ବୁଝାଇଥିଲେ ମଧ୍ୟ ଲୋକମାନେ ବୁଝିନଥିଲେ । ସେବେଠାରୁ ଅଭିଭାବକ ମାନେ ପିଲାଙ୍କୁ ସ୍କୁଲକୁ ଛାଡ଼ି ନଥିଲେ । ଯେଉଁଠି ଦିନେ ଶହ ଶହ ପିଲା ପାଠ ପଢ଼ୁଥିଲେ ସେଠି ହାତଗଣତି ୧୦ରୁ ୧୨ ଜଣ ପିଲା ପାଠ ପଢ଼ିଲେ । ଫଳରେ ପିଲାମାନଙ୍କୁ ନିକଟସ୍ଥ ଏକ ସ୍କୁଲକୁ ପ୍ରଥମରୁ ପଞ୍ଚମ ପର୍ଯ୍ୟନ୍ତ ପାଠପଢ଼ୁଥିବା ପିଲାଙ୍କୁ ସ୍ଥାନାନ୍ତର କରିଦିଆଗଲା । ସ୍କୁଲ ବନ୍ଦ ରହିବାରୁ ଏବେ ସ୍କୁଲ ପରିସର ଭାଙ୍ଗିରୁଜି ଭୁତକୋଠିରେ ପରିଣତ ହେଲାଣି ।