କନକ ବ୍ୟୁରୋ: ବିଶ୍ୱର୍ ଟପ୍-୧୦ ଧନୀ ତାଲିକାରେ ଦେଖିବାକୁ ମିଳିଛି ବଡ ଧରଣର ଅଦଳବଦଳ । ଦୀର୍ଘ ଦିନ ଧରି ବିଶ୍ୱର ଧନୀ ତାଲିକାରେ ଏକ ନମ୍ବର ଥିବା ଏଲନ୍ ମସ୍କ, ଏବେ ଆଉ ବିଶ୍ୱର ସବୁଠୁ ଧନୀ ବ୍ୟକ୍ତି ହୋଇ ନାହାଁନ୍ତି । ଫ୍ରାନ୍ସର ଜଣେ ବ୍ୟବସାୟୀ ବର୍ନାଲ୍ଡ ଅର୍ଣ୍ଣୋଲ୍ଟ, ତାଙ୍କୁ ଟପି ଏବେ ବିଶ୍ୱର ଏକ ନମ୍ବର ଧନୀ ହୋଇଯାଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଫୋର୍ବସର ରିୟଲ ଟାଇମ୍ ବିଲେନିୟର ଇଣ୍ଡେକ୍ସର ରିପୋର୍ଟ ମୁତାବକ, ଏବେ ବିଶ୍ୱର ସବୁଠୁ ଧନୀ ବ୍ୟକ୍ତି ହୋଇଛନ୍ତି ବର୍ଣ୍ଣାଲ୍ଡ ଅର୍ଣ୍ଣୋଲ୍ଟ । ତାଙ୍କ ମୋଟ ସମ୍ପତିର ପରିମାଣ ୧୮୬.୫ ଅରବ ଡଲାର ହୋଇଥିବାବେଳେ, ଏଲନ୍ ମସ୍କଙ୍କ ସମ୍ପତିର ପରିମାଣ ହେଉଛି ୧୮୧.୩ ଅରବ ଡଲାର । ତେବେ ବିଶ୍ୱର ଏହି ଦୁଇ ଧନୀ ବ୍ୟକ୍ତିଙ୍କ ଭିତରେ ସମ୍ପତିର ଫରକ୍ ବେଶ କମ୍ ରହିଛି । ଯାହାକି ମାତ୍ର ୫.୨ ଅରବ ଡଲାର ଅଟେ ।
ଇଲେକ୍ଟ୍ରିକ୍ କାର ନିର୍ମାଣ କରୁଥିବା କମ୍ପାନୀ ଟେସଲାର ସିଇଓ ଏଲନ୍ ମସ୍କ ୨୦୨୧ ମସିହାରୁ ବିଶ୍ୱର ସବୁଠୁ ଧନୀ ବ୍ୟକ୍ତି ହୋଇ ରହିଥିଲେ । ଆମାଜନର ଜେଫ୍ ବେଜୋସଙ୍କୁ ପଛରେ ପକାଇ ସେ ଏହି ସ୍ଥାନ ହାସଲ କରିଥିଲେ । ତେବେ ସେତେବେଳେ ତାଙ୍କ ସମ୍ପତି ୧୮୮ ଅରବ ଡଲାର ହେଇଯାଇଥିବାବେଳେ, ଏବେ ଏହା ତଳକୁ ଖସି ୧୮୧.୩ ଅରବ ଡଲାରରେ ପହଂଚିଛି । ଯାହାକି ତାଙ୍କୁ ବିଶ୍ୱର ଧନୀ ତାଲିକାର ପ୍ରଥମ ସ୍ଥାନରୁ ଦ୍ୱିତୀୟ ସ୍ଥାନକୁ ଖସାଇ ଦେଇଛି ।
ବିଶ୍ୱର ଧନୀ ତାଲିକାରେ ଅଦଳବଦଳ ହେଇଥିଲେ ବି, ଭାରତୀୟ ଉଦ୍ୟୋଗପତି ଗୌତମ ଅଦାନୀଙ୍କ ନମ୍ବରରେ କୌଣସି ଅଦଳବଦଳ ହେଇନି । ସେ ଏବେ ବି ଏହି ଲିଷ୍ଟର ତୃତୀୟ ସ୍ଥାନରେ କାଏମ୍ ରହିଛନ୍ତି । ତାଙ୍କ ସମ୍ପତିର ପରିମାଣ ବର୍ତମାନ ୧୩୪.୬ ଅରବ ଡଲାର ହେଇଥିବାବେଳେ, ଅନ୍ୟତମ ଭାରତୀୟ ଧନୀ ବ୍ୟକ୍ତି ମୁକେଶ ଅମ୍ବାନୀ ୯୨.୮ ଅରବ ଡଲାର ସହ ଏହି ଲିଷ୍ଟର ୮ମ ସ୍ଥାନରେ ରହିଛନ୍ତି ।
ଫୋର୍ବସ ଲିଷ୍ଟର ଏହି ଟପ-୧୦ ଲିଷ୍ଟରେ ନିବେଶକ ବରେନ୍ ବଫେ ୧୦୮.୧ ଅରବ ଡଲାର ସହ ଲିଷ୍ଟର ୫ମ ସ୍ଥାନରେ ଅଛନ୍ତି । ସେହିପରି ବିଲଗେଟସ୍ ୧୦୬.୫ ଅରବ ଡଲାର ସହ ଷଷ୍ଠ, ୧୦୩.୯ ଅରବ ଡଲାର ସହ ଲେରି ଏଲିସନ୍ ସପ୍ତମ ଓ ମୁକେଶ ଅମ୍ପାନୀ ଅଷ୍ଟମ ସ୍ଥାନରେ ରହିଛନ୍ତି ।
ବିଶ୍ୱର ଟପ୍-୧୦ ଧନୀ ତାଲିକା ଲିଷ୍ଟରୁ ଏଥର ଦୁଇଜଣ ଧନୀ ବ୍ୟକ୍ତି ବାଦ୍ ପଡିଛନ୍ତି । ଟପ-୧୦ରେ ଥିବା ଲେରି ପେଜ୍ ଏବଂ ସର୍ଗେ ବ୍ରିନ୍ ଏବେ ଆଉ ଟପ-୧୦ ଧନୀ ତାଲିକାରେ ନାହାଁନ୍ତି । ବିଶ୍ୱର ଏହି ଦୁଇ ଧନୀ ବ୍ୟକ୍ତି ଏବେ ଲିଷ୍ଟର ୧୧ ଆଉ ୧୨ ନମ୍ବରରେ ଥିବାବେଳେ, ଫେସବୁକ ଫାଉଣ୍ଡର ମାର୍କ ଜୁକରବର୍ଗ ଏହି ଲିଷ୍ଟର ୨୬ ନମ୍ବର ସ୍ଥାନରେ ଅଛନ୍ତି ।