କରୋନା ସଂକ୍ରମଣରେ ଲାଗୁନି ବ୍ରେକ୍: କେରଳରୁ ଜଣେ ସଂକ୍ରମିତଙ୍କ ମୃତ୍ୟୁ
କନକ ବ୍ୟୁରୋ: ଦେଶରେ ଲାଗୁନି କରୋନା ସଂକ୍ରମଣରେ ରୋକ । ୨୪ଘଂଟାରେ ୬୨୮ ରୋଗୀଚିହ୍ନଟ ସହ ଜଣଙ୍କ ମୃତ୍ୟୁ ଚିନ୍ତାକୁ ବଢ଼ାଉଛି । ୧୭ ରାଜ୍ୟ ମଧ୍ୟର କେରଳ ଓ କର୍ଣ୍ଣାଟକରେ ସବୁଠୁ ଅଧିକ ସଂକ୍ରମିତ ଚିହ୍ନଟ ହେଉଛନ୍ତି । ତେବେ ଆଶ୍ୱସ୍ତିକର ଖବର ହେଉଛି କି ସୁସ୍ଥ ହାର ୯୮.୯୧% ରହିଛି । ସ୍ୱାସ୍ଥ୍ୟ ବିଶେଷଜ୍ଞ ସତର୍କ ଏବଂ ସଜାଗ ରହିବାକୁ ବାରମ୍ବାର ପରାମର୍ଶ ଦେଉଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଡିସେମ୍ବର ୨ୟ ସପ୍ତାହରେ କେରଳରୁ କରୋନାର ନୂଆ ଭାଇରସ ଜେଏନ ଡଟ ୱାନ ଭୁତାଣୁରେ ପ୍ରଥମ ସଂକ୍ରମିତ ଚିହ୍ନଟ ହେବା ଖବର ଯେତିକି ଭୟ ବଢାଇଥିଲା ଏବେ ତାଠୁ ବେଶ ଅଧିକ ଚିନ୍ତା ବଢ଼ାଇଛି ଏହାର ଦ୍ରୁତ ସଂକ୍ରମଣ । ଯେଉଁଠି ସକ୍ରିୟ ସଂକ୍ରମିତଙ୍କ ସଂଖ୍ୟା ଶହେ ତଳେ ରହୁଥିଲା କିଛି ଦିନ ଭିତରେ ଏହା ୪ହଜାର ପାର କରିଛି ।
ଡରାଉଛି କରୋନାର ନୂଆ ଭୂତାଣୁ
-୨୪ ଘଂଟା ଭିତରେ ଦେଶରୁ ୬୨୮ ରୋଗୀ ଚିହ୍ନଟ
-କେରଳରେ ୧୨୮ ସଂକ୍ରମିତ ଚିହ୍ନଟ
-କେରଳରେ ଜଣଙ୍କ ମୃତ୍ୟୁ
-ମହାରାଷ୍ଟ୍ରରୁ ୫ଜଣ ନୂଆ ରୋଗୀ ଚିହ୍ନଟ
-କେରଳ ଓ କର୍ଣ୍ଣାଟକରେ ସଂକ୍ରମଣ ୨୦୦% ବୃଦ୍ଧି
-ସୁସ୍ଥ ହାର ୯୮.୯୧% ରହିବା ଏକ ପ୍ରକାର ଆଶ୍ୱସ୍ତି
ଦିଲ୍ଲୀ ଏମ୍ସର ପୂର୍ବତନ ଅଧ୍ୟକ୍ଷ ତଥା ବରିଷ୍ଠ ଚିକିତ୍ସ ଡକ୍ଟର ରଣଦୀପ ଗୁଲେରିଆଙ୍କ ମତରେ ଯଦିଓ ଜେଏନ ଡଟ ୱାନ ବେଶ ଦ୍ରୁତ ସଂକ୍ରମଣ କରୁଛି ତଥାପି ଏହା ବର୍ତ୍ତମାନ ଘାତକ ସାବ୍ୟସ୍ତ ହୋଇନି । ଏହାକୁ ମାଇଲ୍ଡ ଭାଇରସ କୁହାଯାଏ । ଅଧିକାଂଶ ସଂକ୍ରମିତ ଘରେ ରହି ସୁସ୍ଥ ହେଉଛନ୍ତି । ଡାକ୍ତରଖାନାରେ ଭର୍ତ୍ତି ସଂଖ୍ୟା କମ ରହିଛି ।
ଇନସାକଗର ଅଧ୍ୟକ୍ଷ ଡକ୍ଟର ଏନକେ ଆରୋଡାଙ୍କ ମତରେ ନୂଆ ଭୂତାଣୁଠୁ ଭୟଭୀତ କାରଣ ନାହିଁ । ପୂର୍ବ ଭୂତାଣୁ ପରି ନୂଆ ଭୂତାଣୁ ସଂକ୍ରମିତଙ୍କ ନିକଟେରେ ସମାନ ଲକ୍ଷଣ ପ୍ରକାଶ ପାଉଛି । ଗମ୍ଭୀର ସ୍ୱାସ୍ଥ୍ୟ ସମସ୍ୟାର ଆଶଙ୍କା କମ ରହିଛି ତଥାପି ସତର୍କ ରହିବା ଜରୁରୀ ।
ସ୍ୱାସ୍ଥ୍ୟ ବିଶେଷଜ୍ଞଙ୍କ ମତରେ କରୋନା ଭ୍ୟାକ୍ସିସିନ ଓ ବୁଷ୍ଟର ଡୋଜ ନୂଆ ଭୁତାଣୁ ସହ ଲଢ଼ିବାରେ ବେଶ ସହାୟକ ହେବ । ସେପଟେ ଜେଏନ ଡଟ ୱାନ ପାଇଁ ନୂଆ ଟିକା ତିଆରି ପାଇଁ ପୁଣେ ସ୍ଥିତ ସିରମ ଇନଷ୍ଟିଚ୍ୟୁଟ ଅଫ ଇଣ୍ଡିଆ ପ୍ରସ୍ତୁତି ଆରମ୍ଭ କରିଛି । ଏନେଇ କମ୍ପାନୀ ପକ୍ଷରୁ ଲାଇସେନ୍ସ ଆବେଦନ କରାଯାଇଥିବା ସୁଚନା ମିଳିଛି ।