ଆଜି ସିଡିଏସ ବିପିନ ରାୱତ ଏବଂ ତାଙ୍କ ପତ୍ନୀଙ୍କର ପୂର୍ଣ୍ଣ ମିଲିଟାରୀ ସମ୍ମାନ ସହ ହେବ ଅନ୍ତିମ ସଂସ୍କାର : ଶେଷ ଦର୍ଶନ ପାଇଁ ସର୍ବସାଧାରଣଙ୍କୁ ଅନୁମତି
କନକ ବ୍ୟୁରୋ : ଆଜିି ସିଡିଏସ ଜେନେରାଲ ବିପିନ ରାୱତ ଓ ତାଙ୍କ ପତ୍ନୀଙ୍କର ହେବ ଅନ୍ତିମ ସଂସ୍କାର । ଏହା ପୂର୍ବରୁ ଦୁଇ ପାର୍ଥିବ ଶରୀରକୁ ସାଧାରଣ ଲୋକେ ସିଡିଏସଙ୍କ ଦିଲ୍ଲୀସ୍ଥିତ କାମରାଜ ମାର୍ଗ ବାସଭବନରେ ଅନ୍ତିମ ଦର୍ଶନ କରିପାରିବେ । ସକାଳ ୧୧ଟାରୁ ୧୨ଟା ୩୦ ମଧ୍ୟରେ ସାଧାରଣ ଲୋକ ଶେଷ ଦର୍ଶନ କରିପାରିବେ । ଏହାପରେ ମଧ୍ୟାହ୍ନ ୧୨ଟା ୩୦ରୁ ଗୋଟାଏ ୩୦ ମଧ୍ୟରେ ସେନା ଅଧିକାରୀ ଏବଂ ସଦସ୍ୟ ଶେଷ ସମ୍ମାନ ଜଣାଇବେ । ଅପରାହ୍ନ ୨ଟାରୁ ଅନ୍ତିମ ସଂସ୍କାର ପ୍ରକ୍ରିୟା ଆରମ୍ଭ ହେବାକୁ ଥିବା ବେଳେ ସଂଧ୍ୟା ୪ଟା ସୁଦ୍ଧା ଶେଷକୃତ୍ୟ ସମ୍ପନ୍ନ ହେବ ବୋଲି ସୂଚନା ରହିଛି ।
Kanak News is now on WhatsApp
Join and get latest news updates delivered to you via WhatsApp
ଗତକାଲି ରାତିରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ପ୍ରତିରକ୍ଷାମନ୍ତ୍ରୀ ରାଜନାଥ ସିଂହ, ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲଙ୍କ ସମେତ ତିନି ସେନା ମୁଖ୍ୟ ପାଲାମ ଏୟାରବେସରେ ଶ୍ରଦ୍ଧାଜ୍ଞଳି ଜ୍ଞାପନ କରିଥିଲେ । ତାମିଲନାଡୁର କୁନ୍ନରରେ ହେଲିକପ୍ଟର ଦୁର୍ଘଟଣାରେ ପ୍ରାଣ ହରାଇଥିଲେ ଦେଶର ପ୍ରଥମ ସିଡିଏସ୍ ଏବଂ ତାଙ୍କ ପତ୍ନୀ ମଧୁଲିକା ରାୱତ ଓ ଅନ୍ୟ ୧୧ ଜଣ ସେନା ଅଧିକାରୀ । ଗତକାଲି ରାତିରେ ପ୍ରାୟ ୮ଟାରେ ଜେନେରାଲ ବିପିନ ରାୱତ, ତାଙ୍କ ପତ୍ନୀ ଓ ଅନ୍ୟମାନଙ୍କ ପାର୍ଥିବ ଶରୀର ଦିଲ୍ଲୀର ପାଲମ ଏୟାରବେସ୍ରେ ପହଁଚିଥିଲା । ମୃତକଙ୍କ ମଧ୍ୟରୁ ତିନି ଜଣଙ୍କର ପରିଚୟ ମିଳିପାରିଛି । ବାକି ମୃତକଙ୍କର ଡିଏନଏ ରିପୋର୍ଟ ଆସିବା ପରେ ସେମାନଙ୍କ ପରିବାରକୁ ମର ଶରୀର ହସ୍ତାନ୍ତର କରାଯିବ । ସେପର୍ଯ୍ୟନ୍ତ ଆର୍ମି ବେସ ହସ୍ପିଟାଲରେ ପାର୍ଥିବ ଶରୀର ରହିବ ।