କନକ ବ୍ୟୁରୋ : ଦୁଇଜଣ ପ୍ରାପ୍ତ ବୟସ୍କଙ୍କ ମଧ୍ୟରେ ସହମତି ଭିତରେ ଶାରୀରିକ ସମ୍ପର୍କ ହୋଇଥିବ କିନ୍ତୁ ଏହା ବିବାହରେ ପରିଣତ ନହେଲେ କିମ୍ବା ଦୁଇ ଜଣଙ୍କ ମଧ୍ୟରେ ସଂପର୍କରେ ଫାଟ ସୃଷ୍ଟି ହେଲେ ପରବର୍ତ୍ତୀ ସମୟରେ ଏହା ଦୁଷ୍କର୍ମ ବୋଲି ବିବେଚନା କରାଯିବନି । ତେଣୁ ଏପରି ମାମଲା ଆଇପିସିର ଧାରା ୩୭୬ ଅଧୀନକୁ ଆସିବନାହଁ । କେରଳ ହାଇକୋର୍ଟ ଶୁକ୍ରବାର ଏକ ମାମଲାର ରାୟ ପ୍ରକାଶ କରିବା ବେଳେ ଏପରି କହିଛନ୍ତି । ଯେ ଯେପର୍ଯ୍ୟନ୍ତ କୌଣସି ଜାଲିଆତି କିମ୍ବା ମିଛ ପ୍ରତିଶ୍ରୁତି ଦେଇ ଯୌନ ସମ୍ପର୍କର ଅଭିଯୋଗ ଆସିନଥିବ ସେପର୍ଯ୍ୟନ୍ତ ଆଇପିସିର ଧାରା ୩୭୬ ଲାଗୁ ହେବନି ।
Kanak News is now on WhatsApp
Join and get latest news updates delivered to you via WhatsApp
ବିଚାରପତି ବେଚୁ କୁରିଆନ ଥୋମାସ ଆଇନଜୀବୀ ନବନୀତ ଏନ ନାଥଙ୍କୁ ଜାମିନ ପ୍ରଦାନ କରିବା ସମୟରେ ଏପରି ରାୟ ଦେଇଛନ୍ତି । ଆଇନଜୀବୀ ବିବାହର ପ୍ରତିଶ୍ରୁତି ଦେଇ ଜଣେ ମହିଳା ଆଇନଜୀବୀଙ୍କୁ ବିଭିନ୍ନ ସମୟରେ ଦୁଷ୍କର୍ମ କରିଥିବା ଅଭିଯୋଗ ହୋଇଥିଲ। । ପରେ ନବନୀତ ଗିରଫ ହୋଇଥିଲେ । ନବନୀତ ସଂପୃକ୍ତି ମହିଳା ଆଇନଜୀବୀକୁ ବିବାହ କରିବେ ବୋଲି ପ୍ରତିଶ୍ରୁତି ଦେଇ ଶାରୀରିକ ସଂପର୍କ ରଖିଥିଲେ । କିନ୍ତୁ ନବନୀତ ଅନ୍ୟ ଜଣେ ମହିଳାଙ୍କୁ ବିବାହ କରିବା ପରେ ପୀଡିତା ନବୀନତଙ୍କ ବିରୋଧରେ ଏତଲା ଦେଇଥିଲେ । କୋର୍ଟରେ ବିବାହ କରିବେ ବୋଲି ପ୍ରତିଶ୍ରୁତି ଦେଇ ନବନୀତ ଶାରୀରିକ ସଂପର୍କ ରଖିଥିଲେ ବୋଲି ପୀଡିତାଙ୍କ ଓକିଲ ଯୁକ୍ତି ବାଢିଥିଲେ ।
ଅନ୍ୟପଟେ ନବନୀତଙ୍କ ଓକିଲ କହିଥିଲେ ପୀଡିତା ଅନ୍ୟ ଜାତିର । ତାଙ୍କ ସହ ବିବାହ ସମ୍ଭବ ନଥିଲା । ଏହାଜାଣି ବି ସେ ବାରମ୍ବାର ଶାରୀରିକ ସଂପର୍କ ରଖିବାକୁ ବାଧ୍ୟ କରୁଥିଲେ ବୋଲି କହିଥିଲେ ନବନୀତଙ୍କ ଓକିଲ । ଏହାପରେ ବିଚାରପତି ରାୟ ଶୁଣାଇ କହିଥିଲେ ଦୁଇ ପ୍ରାପ୍ତ ବୟସ୍କଙ୍କ ସହମତିରେ ଶାରୀରିକ ସଂପର୍କ ରଖିଥିବେ କିନ୍ତୁ ଏହି ସଂପର୍କ ବିବାହରେ ପରିଣତ ନହେଲେ ଏହାକୁ ଦୁଷ୍କର୍ମ ମାମଲା ବୋଲି ବିବେଚନା କରାଯିବନି । ସେତେବେଳେ ଏହାକୁ ଦୁଷ୍କର୍ମ ଭାବେ ବିବେଚନା କରାଯିବ ଯେତେବେଳେ ବିନା ସହମତିରେ କିମ୍ବା ବଳ ପୂର୍ବକ ଶାରୀରିକ ସଂପର୍କ ସ୍ଥାପନ ହୋଇଥିବ ।