କନକ ବ୍ୟୁରୋ: ସେପ୍ଟେମ୍ବର ୭ ଭାରତ ଯୋଡୋ ଯାତ୍ରା ପୂର୍ବରୁ ଏକାଠି ହୋଇଛନ୍ତି କଂଗ୍ରେସ ନେତା । ଦରଦାମ ବୃଦ୍ଧି ଏବଂ ବେକାରୀ ଭଳି ସମସ୍ୟାକୁ ପ୍ରସଙ୍ଗ କରି ରାହୁଲ ଗାନ୍ଧୀଙ୍କ ଆହ୍ୱାନ କ୍ରମେ ଦିଲ୍ଲୀ ରାମଲୀଳା ମୈଦାନରେ ଆୟୋଜିତ ହୋଇଛି ହଲ୍ଲା ବୋଲ ରାଲି ।
Kanak News is now on WhatsApp
Join and get latest news updates delivered to you via WhatsApp
ହଜାର ହଜାର କଂଗ୍ରେସ କର୍ମୀ ଏବଂ ନେତାଙ୍କ ଉପସ୍ଥିତିରେ ଏଭଳି କିଛି କହି ମୋଦୀ ସରକାରକୁ ଟାର୍ଗେଟ କରିଛନ୍ତି ରାହୁଲ ଗାନ୍ଧୀ । ୟୁପିଏ ସରକାର ୧୦ ବର୍ଷରେ ୨୭ କୋଟି ଲୋକଙ୍କୁ ଗରିବ ଶ୍ରେଣୀରୁ ବାହାରକୁ ଆଣିଥିଲା । କିନ୍ତୁ ବିଜେପି ୨୩ କୋଟି ଲୋକଙ୍କୁ ଗରିବ ଶ୍ରେଣୀକୁ ଠେଲି ଦେଇଛି । ଦରଦାମ ବୃଦ୍ଧି ପାଇଁ ଏପରି ପରିସ୍ଥିତି ଉପୁଜିଛି । ଜିଏସଟି ପାଇଁ ଛୋଟ ବ୍ୟବସାୟୀଙ୍କ କାରବାର ଠପ୍ ହୋଇଯାଇଛି । କିନ୍ତୁ ୭୦ ବର୍ଷ ସରକାରରେ କଂଗ୍ରେସ ଏପରି କେବେ ଦରଦାମ ବୃଦ୍ଧି କରିନଥିଲା ବୋଲି ରାହୁଲ ଗାନ୍ଧୀ କହିଛନ୍ତି । ଏଥିସହ ପରୋକ୍ଷରେ ସେ ଟ୍ୱିଟ୍ କରି କହିଛନ୍ତି, ଦେଶରେ ବେରୋଜଗାରୀ ବଢୁଥିବା ବେଳେ ମୋଦୀ ସରକାର ନିଜ ବନ୍ଧୁଙ୍କୁ ରୋଜଗାର ଯୋଗାଇ ଦେଉଛନ୍ତି ।
ବିଜେପି ଘୃଣାଭାବ ସୃଷ୍ଟି କରୁଛି । ଯିଏ ଭୟଭୀତ ସିଏ ଘୃଣାଭାବ ସୃଷ୍ଟି କରୁଛି । ରାହୁଲଙ୍କ ଏହି ମନ୍ତବ୍ୟର ଜବାବ ରଖିଛି ବିଜେପି । ନ୍ୟାଶନାଲ ହେରାଲ୍ଡ ମାମଲାରେ ଜାମିନରେ ଅଛନ୍ତି ସୋନିଆ ଓ ରାହୁଲ ଗାନ୍ଧୀ । କୋର୍ଟରେ ମାମଲା ରଦ୍ଦ ନହେବା ପରେ ତଦନ୍ତର ସାମ୍ନା କରୁଛନ୍ତି । ତେଣୁ ନିଜେ ଭୟଭୀତ ବୋଲି ବିଜେପି କହିଛି ।
ଆଗକୁ ସାଧାରଣ ନିର୍ବାଚନ । ଅନ୍ୟପଟେ ଗୁଲାମ ନବୀ ଆଜାଦଙ୍କ ପରେ ଆଉ କିଛି କଂଗ୍ରେସ ନେତା ମଧ୍ୟ ଆଜାଦଙ୍କ ରାସ୍ତା ଆପଣାଇପାରନ୍ତି ବୋଲି ଚର୍ଚ୍ଚା ହେଉଛି । ଏହାରି ଭିତରେ ଦଳୀୟ ନେତାଙ୍କୁ ଏକାଠି କରି ରାହୁଲ ଗାନ୍ଧୀ ଉତ୍ସାହ ଭରିବାକୁୁ ଚେଷ୍ଟା କରିଛନ୍ତି ।