ସୋନିଆଙ୍କ ସମର୍ଥନରେ ଦିଲ୍ଲୀଠୁ ପଲ୍ଲୀ ଯାଏଁ କଂଗ୍ରେସର ବିକ୍ଷୋଭ: ରାସ୍ତା ଉପରେ ବସି ମୋଦି ସରକାରଙ୍କୁ ଟାର୍ଗେଟ କଲେ ରାହୁଲ ଗାନ୍ଧୀ
କନକ ବ୍ୟୁରୋ: ପୁଣି କଂଗ୍ରେସର ପ୍ରତିବାଦରେ କମ୍ପିଲା ରାଜଧାନୀ ଦିଲ୍ଲୀ । ପ୍ରବର୍ତନ ନିର୍ଦ୍ଦେଶାଳୟ କାର୍ଯ୍ୟାଳୟଠୁ ନେଇ ସଂସଦଭବନ । ଶହ ଶହ କଂଗ୍ରେସ ନେତା, କର୍ମୀ ଓ ସମର୍ଥକ ଇଡି ବିରୋଧରେ ପ୍ରତିବାଦ କରି ରାସ୍ତାକୁ ଓହ୍ଲାଇଛନ୍ତି । ନ୍ୟାଶନାଲ ହେରାଲ୍ଡ ମାମଲାରେ କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀଙ୍କୁ ଜେରା କରୁଛି ଇଡି । ଏହାକୁ ଜୋରଦାର ବିରୋଧ କରୁଛି କଂଗ୍ରେସ । କେଉଁଠି ପୋଡାଜଳା ତ ପୁଣି କେଉଁଠି ପୁଲିସ ସହ ମୁହାଁମୁହିଁ । କିଛି ସ୍ଥାନରେ ଯୁବ ଓ ମହିଳା କଂଗ୍ରେସ ୱିଙ୍ଗସ ବିଶାଳ ରାଲି ବିକ୍ଷୋଭ କରିଥିବା ଦେଖିବାକୁ ମିଳିଛି । ଧାରଣାରେ ସାମିଲ ହୋଇ କଂଗ୍ରେସ ସାଂସଦ ରାହୁଲ ଗାନ୍ଧୀ କହିଛନ୍ତି ଦେଶର ବେକାରୀ, ଦରଦାମ ବୃଦ୍ଧି, ଜିଏସଟି ଏଭଳି ସମ୍ବେଦନଶୀଳ ପ୍ରସଙ୍ଗ ଉପରୁ ଦେଶବାସୀଙ୍କ ଧ୍ୟାନ ହଟାଇବା ପାଇଁ ବିରୋଧୀଙ୍କ ଉପରେ ଜୋରର ଚାବୁକ ମାଡ କରୁଛନ୍ତି ସରକାର ।
Kanak News is now on WhatsApp
Join and get latest news updates delivered to you via WhatsApp
ମଙ୍ଗଳବାର ସକାଳୁ ସଂସଦ ଭବନଠୁ ଇଡି କାର୍ଯ୍ୟାଳୟ ପର୍ଯ୍ୟନ୍ତ ପ୍ରତିବାଦ କରି କଂଗ୍ରେସର ବରିଷ୍ଠ ନେତା ବସ ଯୋଗେ ଆସୁଥିବାବେଳେ ପ୍ରଥମେ ସେମାନଙ୍କୁ ହେପାଜତକୁ ନେଇ ପୁଲିସ ପରେ ଛାଡି ଦେଇଛି । ସଂସଦ ଭବନ ପରିସରରେ ଥିବା ଗାନ୍ଧୀ ମୂର୍ତି ତଳେ ଛିଡା ହୋଇ ସାଂସଦମାନେ ବିଜେପି ସରକାରଙ୍କ ବିରୋଧରେ ନାରାବାଜୀ କରିବା ସହ ଏହା ସୋନିଆଙ୍କ ବିରୋଧରେ ଏକ ଷଡଯନ୍ତ୍ର ବୋଲି କଂଗ୍ରେସ କହିଛି ।
ଇଡିରେ ସୋନିଆ ହାଜର ହେବାକୁ ନେଇ ସାରା ଦେଶରେ କଂଗ୍ରେସ ପକ୍ଷରୁ ହୋଇଛି ବିରୋଧ ପ୍ରଦର୍ଶନ । ରାଜଧାନୀ ଦିଲ୍ଲୀରେ କଂଗ୍ରେସ ର୍ୟାଲି ପାଇଁ ଅନୁମତି ମିଳି ନଥିବାରୁ ଦେଖିବାକୁ ମିଳିଛି ଜବରଦସ୍ତ ହଙ୍ଗାମା । ଇଡି କାର୍ଯ୍ୟାଳୟ ସମ୍ମୁଖରେ ଶକ୍ତି ପ୍ରଦର୍ଶନ କରିଛନ୍ତି କଂଗ୍ରେସ କର୍ମୀ । ଶହ ଶହ ସଂଖ୍ୟାରେ କଂଗ୍ରେସ କର୍ମୀ ରାସ୍ତାକୁ ଓହ୍ଲାଇ କରିଛନ୍ତି ବିରୋଧ । କଂଗ୍ରେସ ଶାସିତ ରାଜ୍ୟର ବରିଷ୍ଠନେତାମାନେ ଦିଲ୍ଲୀରେ ପହଁଚି ଇଡି ବିରୋଧୀ ଆନ୍ଦୋଳନରେ ସାମିଲ ହୋଇଛନ୍ତି ।
ସ୍ଥିତିକୁ ଦେଖି କଂଗ୍ରେସ ଓ ଇଡି ମୁଖ୍ୟାଳୟ ସାମ୍ନାରେ ଲାଗିଛି୧୪୪ ଧାରା । କଂଗ୍ରେସ କହିଛି ବିରୋଧୀଙ୍କ ମୁହଁ ଚୁପ କରିବାକୁ ପ୍ରଧାନମନ୍ତ୍ରୀ ମୋଦି ଓ ଗୃହମନ୍ତ୍ରୀ ଅମିତ ଶାହା ଇଡିର ଅପବ୍ୟହାର କରୁଛି । ସେପଟେ ବିଜେପି କହିଛି ଦୁର୍ନୀତି ହୋଇଛି ଏହାର ଯାଂଚ ହେବା ଜରୁରୀ ।
ନ୍ୟାସନାଲ ହେରାଲ୍ଡ ସମ୍ପତି ହେରଫେର ମାମଲାରେ ସୋନିଆଙ୍କୁ ଇଡି ଜୁଲାଇ ୨୧ ତାରିଖରେ ସମନ ପଠାଇ ଜେରା କରିଥିଲା । ସେହି ସମୟରେ ମଧ୍ୟ କଂଗ୍ରେସ ସମାନ ଧରଣର ପ୍ରଦର୍ଶନ କରି ଏହାକୁ ବିରୋଧ ଜୋରଦାର ବିରୋଧ କରିଥିଲା । ତିନି ତିନି ଥର ଇଡି ସମନ ପଠାଇଥିଲେ ମଧ୍ୟ ଅସୁସ୍ଥତା କାରଣ ଦର୍ଶାଇ ସୋନିଆ ଜେରା ପାଇଁ ହାଜର ହୋଇନଥିଲେ ।