ନାଗରିକତା ସଂଶୋଧନ ଆଇନକୁ ନେଇ କଂଗ୍ରେସର ପ୍ରତିବାଦ । ରାଜଘାଟରେ ସୋନିଆ, ପ୍ରିୟଙ୍କା, ରାହୁଲ ଗାନ୍ଧୀ ଓ ମନମୋହନ ସିଂ, ସମେତ ବରିଷ୍ଠ ନେତାଙ୍କ ଧାରଣା ।
କନକ ବ୍ୟୁରୋ : ନାଗରିକତା ସଂଶୋଧନ ଆଇନକୁ ନେଇ ତେଜିଛି ରାଜନୀତି । ପ୍ରତିବାଦରେ କଂଗ୍ରେସ ରାଜଘାଟରେ ସତ୍ୟାଗ୍ରହ କରିଥିବାବେଳେ ବିଜେପି ପଶ୍ଚିମବଙ୍ଗରେ କରିଛି ସମର୍ଥନ ରାଲି । କେନ୍ଦ୍ର ସରକାର ବିରୋଧରେ ବର୍ଷିଛନ୍ତି ସୋନିଆଙ୍କ ସମେତ କଂଗ୍ରେସର ବରିଷ୍ଠ ନେତା । ଅନ୍ୟପଟେ କୋଲକାତାରେ ସମର୍ଥନ ରାଲି କରି ବିରୋଧୀଙ୍କୁ ଟାର୍ଗେଟ କରିବା ସହ ଲୋକମାନଙ୍କୁ ମମତା ମିଛ କହି ଭ୍ରମିତ କରୁଛନ୍ତି ବୋଲି କହିଛନ୍ତି ବିଜେପି କାର୍ଯ୍ୟକାରୀ ସଭାପତି ଜେପି ନଡ୍ଡା ।
Kanak News is now on WhatsApp
Join and get latest news updates delivered to you via WhatsApp
ନାଗରିକତା ସଂଶୋଧନ ଆଇନକୁ ନେଇ ଦେଶର ଅଧିକାଂଶ ରାଜ୍ୟରେ ଅସନ୍ତୋଷର ନିଆଁ ଜଳୁଥିବା ବେଳେ କଂଗ୍ରେସର ନୂଆ ପ୍ରତିବାଦ ରାଜନୀତି । ରାଜଘାଟରେ ସତ୍ୟାଗ୍ରହରେ ବସିଛନ୍ତି ଦଳର ତୁଙ୍ଗ ନେତା । କଂଗ୍ରେସର ଏକତା ପାଇଁ ସତ୍ୟାଗ୍ରହରେ ସାମିଲ ହୋଇଛନ୍ତି ଦଳର ହେବିୱେଟ୍ ନେତା । ଅହିଂସା ସ୍ଥଳରେ ସମ୍ବିଧାନ ପଢିଛନ୍ତି କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀ, ଉପାଧ୍ୟକ୍ଷ ରାହୁଲ ଗାନ୍ଧି ଓ ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂହ । ଆଉ, କେନ୍ଦ୍ର ସରକାରଙ୍କ ନୂଆ ଆଇନକୁ ନିଜ ରାଜ୍ୟରେ ଲାଗୁ କରିବେ ନାହିଁ ବୋଲି ସିଧାସଳଖ ମନା କରିଦେଇଛନ୍ତି ମଧ୍ୟପ୍ରଦେଶ ମୁଖ୍ୟମନ୍ତ୍ରୀ କମଲ ନାଥ ଏବଂ ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲଟ୍ ।
ନାଗରିକତା ଆଇନକୁ ନେଇ ଦିଲ୍ଲୀରେ କଂଗ୍ରେସ ସତ୍ୟାଗ୍ରହ କରୁଥିବା ବେଳେ କୋଲକାତାରେ ବଡ ଧରଣର ସମର୍ଥନ ରାଲି କରିଛି ବିଜେପି । କେନ୍ଦ୍ର ସରକାରଙ୍କ ଆଇନ ସମର୍ଥନରେ ବାହାରିଥିବା ରାଲିର ନେତୃତ୍ୱ ନେଇଛନ୍ତି କାର୍ଯ୍ୟକାରୀ ଅଧ୍ୟକ୍ଷ ଜେପି ନଡ୍ଡା । କହିଛନ୍ତି, ଭାରତରେ ଖୁସିରେ ଅଛନ୍ତି ମୁସଲିମ ସଂପ୍ରଦାୟ ହେଲେ ପାକିସ୍ତାନରେ ହିନ୍ଦୁଙ୍କୁ ନିର୍ଯାତନା ଦିଆଯାଉଛି । କେନ୍ଦ୍ରର ଲୋକପ୍ରିୟ ଆଇନକୁ ନେଇ ଭୋଟ ବ୍ୟାଙ୍କ ରାଜନୀତି କରୁଛି କଂଗ୍ରେସ ।
ନାଗରିକତା ସଂଶୋଧନ ଆଇନ୍ ଆସିବା ପରେ ଏହାର ପ୍ରତିବାଦରେ ସାରା ଦେଶରେ ହିଂସାତ୍ମକ ପ୍ରତିବାଦ ଜାରି ରହିଛି । ଏପରିକି ହିଂସା ଏଡାଇବାକୁ ଯାଇ ପୋଲିସ ଗୁଳିରେ ୨୨ ଜଣଙ୍କ ମୃତ୍ୟୁ ହୋଇସାରିଲାଣି । ଏବେ ଆଇନକୁ ନେଇ ଆରମ୍ଭ ହୋଇଛି ନୂଆ ରାଜନୀତି ।