ଚୀନକୁ ଖେଳ ଶିଖାଇବ ଭାରତ! କୋଲକାତାରେ ଟ୍ରେନିଂ ନେବେ ଚୀନ କୋଚ୍
କନକ ବ୍ୟୁରୋ: ଭାରତ ଏବଂ ଚୀନ ମଧ୍ୟରେ ସୀମା ବିବାଦ ଥମିବାର ନାଁ ନେଉନାହିଁ । ଆର୍ଥିକସ୍ଥିତି ବି ବେଶ ସଙ୍ଗୀନ ରହିଛି । ତେବେ ଏହାରି ମଧ୍ୟରେ କ୍ରିକେଟ ମଇଦାନରେ ଦୁଇ ଦେଶ ଏକାଠି ନଜର ଆସିପାରନ୍ତି । ଭାରତ ବର୍ତ୍ତମାନ ଚୀନକୁ କ୍ରିକେଟ ଖେଳ ଶିଖାଇବ । ଏଥିପାଇଁ ଉଭୟ ଦେଶ ରାଜି ମଧ୍ୟ ହୋଇଛନ୍ତି । ଚୀନର କାଉନସିଲ ଜେନେରାଲଙ୍କ ଦ୍ୱାରା ବେଙ୍ଗଲ କ୍ରିକେଟ ଆସୋସିଏସନକୁ ଗୋଟିଏ ପ୍ରସ୍ତାବ ଦିଆଯାଇଛି । ଏଥିରେ ଚୀନରେ କ୍ରିକେଟକୁ ଆଗକୁ ବଢାଇବା ପାଇଁ ସହଯୋଗ ଲୋଡାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଖବର ସରବରାହ ସଂସ୍ଥା ଏଏନଆଇର ତଥ୍ୟ ଅନୁସାରେ, ଚୀନର ତିନି ଅଧିକାରୀ ବେଙ୍ଗଲ କ୍ରିକେଟ ଆସୋସିଏସନର ଅଧ୍ୟକ୍ଷ ଅଭିଶେଖ ଡାଲମିଆଙ୍କୁ ସାକ୍ଷାତ କରିଛନ୍ତି । ଏହି ସମୟରେ କ୍ରିକେଟ ବାବଦରେ ଜାଣିବା ସହ ସେମାନେ ନିଜ ଦେଶରେ କ୍ରିକେଟକୁ କେମିତି ଆଗକୁ ନିଆଯାଇପାରିବ ସେନେଇ ସହଯୋଗ ଲୋଡିଥିଲେ ।
ଅଭିଶେଖ ଡାଲମିଆ ଏହି ସାକ୍ଷାତକୁ ନେଇ କହିଛନ୍ତି, ଚୀନ ପ୍ରତିନିଧିମଣ୍ଡଳି ଆମ ସହିତ ସାକ୍ଷାତ କରିଛନ୍ତି । ଚୀନର ଚଂଗକ୍ୟୁଙ୍ଗ ସହରରେ କ୍ରିକେଟର ସୁବିଧା ସୁଯୋଗ ଯୋଗାଇଦେବାକୁ ସେମାନେ କହିଛନ୍ତି । ସେଠାରେ କ୍ରିକେଟକୁ ଆଗକୁ ବଢାଇବାକୁ ସେମାନେ ଇଚ୍ଛୁକ ଅଛନ୍ତି, ଆମେ ତାଙ୍କୁ ଭରସା ଦେଇଛୁ । ଏହା ଭଲ କଥା ଯେ ଚୀନ ମଧ୍ୟ କ୍ରିକେଟକୁ ପସନ୍ଦ କରୁଛି ।
ସିଏବି ଚେୟାରମ୍ୟାନ କହିଛନ୍ତି, ଆମେ ଏହା ପୂର୍ବରୁ ଭୁଟାନ କ୍ରିକେଟ, ବାଂଲାଦେଶ କ୍ରିକେଟ ବୋର୍ଡକୁ ସହଯୋଗ କରିଛୁ । ତାଙ୍କ ସହ ବିଭିନ୍ନ କାର୍ଯ୍ୟକ୍ରମ ମଧ୍ୟ କରିଛୁ । ସେମାନେ ଚାହୁଁଛନ୍ତି ନୂଆ ଖେଳାଳୀଙ୍କୁ ବିଭିନ୍ନ ପ୍ରକାରରେ ସୁଯୋଗ ମିଳୁ । ଆମେ ସେମାନଙ୍କୁ କହିଛୁ ତାଙ୍କ କୋଚ ଏଠାରେ ଆସି ଟ୍ରେନିଂ ନେଇପାରିବେ ।
କେମିତି ଚୀନ ଶିଖିବ କ୍ରିକେଟ?
ଚୀନ ତରଫରୁ ବେଙ୍ଗଲ କ୍ରିକେଟ ଆସୋସିଏସକୁ ଯେଉଁ ପ୍ରସ୍ତାବ ଦିଆଯାଇଛି ସେଥିରେ ଚଂଗକ୍ୟୁଙ୍ଗ ସହରରେ କ୍ରିକେଟ ସୁବିଧା ଉପଲବ୍ଧ କରିବା ପାଇଁ ସହଯୋଗ ଲୋଡାଯାଇଛି । ଏହି ଆଧାରରେ ଏକ ଚୁକ୍ତି ସ୍ୱାକ୍ଷର ହେବ । ଚୁକ୍ତି ଶେଷ ହେବା ପରେ କ୍ରିକେଟ ଖେଳାଳୀ, କୋଚ ଟ୍ରେନିଂ ପାଇଁ କୋଲକତା ଆସିପାରିବେ ।
ସେହିଭଳି କିଛି ବନ୍ଧୁତ୍ୱପୂର୍ଣ୍ଣ ମ୍ୟାଚ ଏବଂ ଟୁର୍ଣ୍ଣାମେଣ୍ଟ କରି ଅଭ୍ୟାସ କରାଯିବ । ତେବେ ବର୍ତ୍ତମାନ ସୁଦ୍ଧା ଏହା କେବେ ହେବ ତାହା ସ୍ପଷ୍ଟ ହୋଇନାହିଁ ।