ସଂସଦ ଭବନ ବାହାରେ ଉଭୟ ଶାସକ ଓ ବିରୋଧୀଙ୍କ ପ୍ରତିବାଦ : ମଣିପୁର ପ୍ରସଙ୍ଗରେ ପ୍ରଧାନମନ୍ତ୍ରୀଙ୍କ ବିବୃତି ଦାବି; ସେପଟେ ରାଜସ୍ଥାନ ପ୍ରସଙ୍ଗ ଉଠାଇ ବିଜେପି ସାଂସଦଙ୍କ ଧାରଣା
କନକ ବ୍ୟୁରୋ : ସଂସଦ ଭବନ ବାହାରେ ଏକାଠି ହେଲେ ବିରୋଧୀ । ମଣିପୁର ପ୍ରସଙ୍ଗ ଉଠାଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଜବାବ ଲୋଡିଛନ୍ତି ବିରୋଧୀ । ସଂସଦରେ ମୋଦୀ ଏହି ପ୍ରସଙ୍ଗରେ ବିବୃତି ରଖନ୍ତୁ ବୋଲି ଦାବି କରିଛନ୍ତି ବିରୋଧୀ ଦଳର ସାଂସଦ । ଶାସକ ଦଳ ଏନଡିଏ ବିରୋଧରେ ତିଆରି ହୋଇଥିବା ଇଣ୍ଡିଆ ମେଂଟରେ ଥିବା ସମସ୍ତ ଦଳର ସାଂସଦ ପ୍ରଥମ ଥର ପାଇଁ ସଂସଦ ଭବନ ପରିସରରେ ଏକାଠି ହୋଇଛନ୍ତି । ଆଉ କେନ୍ଦ୍ର ସରକାରଙ୍କୁ ଘେରିଛନ୍ତି । ମଣିପୁର ହିଂସାକୁ ୨ ମାସରୁ ଅଧିକ ଦିନ ବିତିଛି ।
Kanak News is now on WhatsApp
Join and get latest news updates delivered to you via WhatsApp
ମୋଦୀ ଏହି ପ୍ରସଙ୍ଗରେ ମୌସୁମୀ ଅଧିବେଶନ ଆରମ୍ଭ ଦିନ ପ୍ରଥମ ଥର ପାଇଁ ପ୍ରତିକ୍ରିୟା ରଖି ନିନ୍ଦା କରିଥିଲେ । ଆଉ ଦୋଷୀ ବିରୋଧରେ କାର୍ଯ୍ୟାନୁଷ୍ଠାନ ହେବ ବୋଲି କହିିଥିଲେ । ଏଥିସହ ଦେଶରେ ବିଭିନ୍ନ ସମୟରେ ବଢୁଥିବା ହିଂସା କଥା ଉଠାଇଥିଲେ । କିନ୍ତୁ ବିରୋଧୀ ଏହି ପ୍ରସଙ୍ଗରେ ଗୃହରେ ମୋଦୀଙ୍କ ଜବାବ ଲୋଡିଛନ୍ତି । ଗତ ସପ୍ତାହରେ କେନ୍ଦ୍ର ସଂସଦୀୟ ବ୍ୟାପାର ମନ୍ତ୍ରୀ ପ୍ରହ୍ଲାଦ ଯୋଶୀ କହିଥିଲେ, ସଂସଦରେ ମଣିପୁର ପ୍ରସଙ୍ଗରେ ଆଲୋଚନା ପାଇଁ ସରକାର ରାଜି । ବାଚସ୍ପତି ତାରିଖ ସ୍ଥିର କରିବେ । ଗୃହମନ୍ତ୍ରୀ ଏ ବାବଦରେ ଉତର ରଖିବେ । ବିରୋଧୀ କିନ୍ତୁ ପ୍ରଧାନମନ୍ତ୍ରୀଙ୍କ ଉତର ଦାବି କରି ଅଡି ବସିଛନ୍ତି ।
ସେପଟେ ମହିଳା ନିର୍ଯାତନା କଥା କହି ବିରୋଧୀ କଂଗ୍ରେସ ଏବଂ ତୃଣମୂଳ କଂଗ୍ରେସକୁ ଘେରିଛି ବିଜେପି । ସଂସଦର ଗାନ୍ଧୀ ପ୍ରତିମୂର୍ତ୍ତି ତଳେ ବିଜେପି ସାଂସଦ ଏକାଠି ହୋଇ ପ୍ରତିବାଦ କରିଛନ୍ତି । ପଶ୍ଚିମବଙ୍ଗରେ ମହିଳାଙ୍କୁ ନିର୍ଯାତନା ଓ ରାଜସ୍ଥାନରେ ମହିଳାଙ୍କ ପ୍ରତି ବଢୁଥିବା ଅତ୍ୟାଚାର କଥା କହି ବିଜେପି ସାଂସଦ ମାନେ ପ୍ରତିବାଦ କରିଛନ୍ତି । ଗୁରୁତ୍ୱପୂର୍ଣ୍ଣ କଥା ହେଉଛି ବିଜେପି ହେଉ ଅବା ବିରୋଧୀ ମହିଳା ନିର୍ଯାତନା କଥା କହି ପରସ୍ପରକୁ କାଦୁଅ ଫିଙ୍ଗୁଛନ୍ତି । କିନ୍ତୁ ନିଜ ନିଜ ରାଜ୍ୟରେ ହେଉଥିବା ମହିାଳା ନିର୍ଯାତନା ବାବଦରେ କିଛି ସ୍ପଷ୍ଟ କରୁ ନାହାନ୍ତି ।