ସରିଲା ବଲାଙ୍ଗୀର ନକଲି ସାର୍ଟିଫିକେଟ୍ ମାମଲାରେ ୪ ଅଭିଯୁକ୍ତଙ୍କ ରିମାଣ୍ଡ : ମାଷ୍ଟରମାଇଣ୍ଡ ମନୋଜଙ୍କ ଦେଢ଼ କୋଟିରୁ ଅଧିକ ଟଙ୍କା ମୂଲ୍ୟର ସମ୍ପତ୍ତି ଜବତ
କନକ ବ୍ୟୁରୋ : ବଲାଙ୍ଗୀର ନକଲି ସାର୍ଟିଫିକେଟର ମାଷ୍ଟରମାଇଣ୍ଡ ମନୋଜ ମିଶ୍ରଙ୍କ ରିମାଣ୍ଡ ଅବଧି ଶେଷ ହୋଇଛି । ତେବେ ରିମାଣ୍ଡ ବେଳେ କ୍ରାଇମବ୍ରାଞ୍ଚ ହାତରେ କିଛି ଗୁରୁତ୍ୱପୂର୍ଣ୍ଣ ତଥ୍ୟ ଓ ମନୋଜଙ୍କ କୋଟି କୋଟି ଟଙ୍କାର ସମ୍ପତ୍ତି ହାତରେ ଲାଗିଛି । ମନୋଜଙ୍କର ପ୍ରାୟ ଦେଢ଼ କୋଟି ଟଙ୍କାର ସମ୍ପତ୍ତି ଜବତ ହୋଇଥିବା କ୍ରାଇମବ୍ରାଞ୍ଚ ସୂତ୍ରରୁ ସୂଚନା ମିଳିଛି ।
Kanak News is now on WhatsApp
Join and get latest news updates delivered to you via WhatsApp
ଏହାସହ କିଛି ନକଲି ସାର୍ଟିଫିକେଟ୍ ବିକ୍ରି କରି ମନୋଜ ଯେଉଁ ଜମି ସବୁ ଜବତ କରିଥିଲା, ତାକୁ ମଧ୍ୟ ଜବତ କରିଛି ତଦନ୍ତକାରୀ ସଂସ୍ଥା । ଏହା ସହ ବଲାଙ୍ଗୀରର ବିଭିନ୍ନ ସ୍ଥାନରେ ମନୋଜ ମିଶ୍ରଙ୍କର ୫ଟି ପ୍ଲଟ ଉପରେ ମଧ୍ୟ ନଜର ରଖିଛି କ୍ରାଇମବ୍ରାଞ୍ଚ । ତଦନ୍ତ ବେଳେ ଜଣାପଡ଼ିଛି ଯେ ମନୋଜ ରାଜ୍ୟ ବାହାରର ସ୍କୁଲ ଓ ବିଶ୍ୱବିଦ୍ୟାଳୟ ନାଁରେ ପାଖାପାଖି ୫ହଜାରରୁ ଅଧିକ ନକଲି ସାର୍ଟିଫିକେଟ୍ ପ୍ରସ୍ତୁତ କରିଥିଲା । ଆଉ ମନୋଜ ଦେଢ଼ରୁ ୨ ଲକ୍ଷ ଟଙ୍କାରେ ଆଶାୟୀ ପ୍ରାର୍ଥୀଙ୍କୁ ସାର୍ଟିଫିକେଟ୍ ବିକ୍ରି କରୁଥିଲେ ।
ସାର୍ଟିଫିକେଟ୍ ବିକ୍ରି କରି ମନୋଜ ବଲାଙ୍ଗୀରରେ ମୂଲ୍ୟବାନ ଜମି କିଣିଥିଲେ । ଆଉ କିଛି ନଗଦ ଟଙ୍କା ବ୍ୟାଙ୍କ ଓ ଘରେ ରଖିଥିଲେ । ଗତ ୫ ତାରିଖରେ କ୍ରାଇମବ୍ରାଞ୍ଚ ମନୋଜ ଓ ଆଲୋକ ଉଦଗାତାଙ୍କୁ ତିନିଦିନିଆ ରିମାଣ୍ଡାରେ ଆଣିଥିଲା । ଶୁକ୍ରବାର ରିମାଣ୍ଡ ଅବଧି ଶେଷ ହୋଇଛି । ରିମାଣ୍ଡରେ ଜେରା ସମୟରେ କ୍ରାଇମବ୍ରାଞ୍ଚ ମନୋଜଙ୍କ ବେଆଇନ୍ ଜମିକୁ ଜବତ କରିଛି । ତେବେ ଆଜି କ୍ରାଇମବ୍ରାଞ୍ଚ ଏ ସମ୍ପର୍କରେ ସବିଶେଷ ତଥ୍ୟ ଉପସ୍ଥାପନା କରିବ ବୋଲି ଜଣାପଡ଼ିଛି ।