କନକ ବ୍ୟୁରୋ: ଝାରସୁଗୁଡା ଉପନିର୍ବାଚନ ପାଇଁ ଏକ ପ୍ରକାର ଶକ୍ତି ପ୍ରଦର୍ଶନ କରିଛି ବିଜେପି। ସହରରେ ବିରାଟ ଶୋଭାଯାତ୍ରାରେ ଯାଇ ଉପଜିଲ୍ଲାପାଳଙ୍କ କାର୍ଯ୍ୟାଳୟରେ ନାମାଙ୍କନ ଭରିଛନ୍ତି ବିଜେପି ପ୍ରାର୍ଥୀ ଟଙ୍କଧର ତ୍ରିପାଠୀ । ହଜାର ହଜାର ସମର୍ଥକ, ଦଳୀୟ କର୍ମୀ ଓ ନେତାଙ୍କ ସହ ଯାଇ ପ୍ରାର୍ଥୀପତ୍ର ଦାଖଲ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
କେନ୍ଦ୍ରମନ୍ତ୍ରୀ ବିଶ୍ୱେଶ୍ୱର ଟୁଡୁ, ସାଂସଦ ସୁରେଶ ପୂଜାରୀ, ବସନ୍ତ ପଣ୍ଡା, ରାଜ୍ୟ ସଭାପତି ମନମୋହନ ସାମଲଙ୍କ ସମେତ ଦଳର ବହୁ ବରିଷ୍ଠ ନେତା ଶୋଭାଯାତ୍ରାରେ ସାମିଲ ହୋଇ, ରାଜ୍ୟର ଆଇନଶୃଙ୍ଖଳା ପରିସ୍ଥିତିକୁ ନେଇ ପ୍ରଶ୍ନ ଉଠାଇଛନ୍ତି । ଆଉ କହିଛନ୍ତି, ଝାରସୁଗୁଡାରୁ ପରିବର୍ତନର ଆରମ୍ଭ ହେବ ।
ବିଜେଡି ପ୍ରାର୍ଥୀ ଦିପାଳୀ ଦାସ ମଙ୍ଗଳବାର ନାମାଙ୍କନ ଭରିବାର କାର୍ଯ୍ୟକ୍ରମ ରହିଛି । ନାମାଙ୍କନ ପୂର୍ବରୁ ଦଳୀୟ ନେତା ଓ କର୍ମୀଙ୍କୁ ନେଇ ଦିପାଳୀ ଶକ୍ତି ପ୍ରଦର୍ଶନ କରିବେ ବୋଲି ସୂଚନା ମିଳିଛି । ତେବେ ରାଜ୍ୟର ଆଇନ ଶୃଙ୍ଖଳାକୁ ନେଇ ବିଜେପି ନେତା ପ୍ରଶ୍ନ ଉଠାଇବା ପରେ, କଟାକ୍ଷ କରିଛନ୍ତି ବିଜେଡି ନେତା । କହିଛନ୍ତି, ଚାଲୁଣି କହୁଛି ଛୁଞ୍ଚିକୁ । ଅନ୍ୟପଟେ କଂଗ୍ରେସ ବିଧାୟକ ସୁର ରାଉତରାୟ କହିଛନ୍ତି, ବିଜେପି ତିନି ନମ୍ବରରେ ରହିବ । ଗତ ଶନିବାର ଦିନ କଂଗ୍ରେସ ପ୍ରାର୍ଥୀ ତରୁଣ ପାଣ୍ଡେ ପ୍ରାର୍ଥିପତ୍ର ଦାଖଲ କରିଥିଲେ । ଝାରସୁଗୁଡ଼ା ଉପନିର୍ବାଚନ ପାଇଁ ଏବେ ସରଗରମ ରହିଛି ଝାରସୁଗୁଡ଼ା ରାଜନୀତି । ତିନି ପ୍ରମୁଖ ଦଳର ବରିଷ୍ଠ ନେତା ଝାରସୁଗୁଡ଼ାରେ ଡେରା ପକାଇଛନ୍ତି ।