ଭକ୍ତଙ୍କୁ ମିଳିଲା ନୂଆ ଦାୟିତ୍ୱ: କଂଗ୍ରେସ ପ୍ରଚାରର ଧରିବେ ମଙ୍ଗ
କନକ ବ୍ୟୁରୋ: ନିର୍ବାଚନ ତାରିଖ ଘୋଷଣା ହୋଇସାରିଲାଣି, ରାଜ୍ୟର ପ୍ରମୁଖ ରାଜନୈତିକ ଶିବିର ଲଢ଼େଇ ପାଇଁ ପ୍ରସ୍ତୁତ ହେଉଛନ୍ତି । ଏତିକି ବେଳେ କଂଗ୍ରେସ ଶିବିରରେ ଅସ୍ଥିରତା ଲାଗିରହିଛି । ଗତକାଲି ଅଚାନକ ପ୍ରଚାର କମିଟି ଅଧ୍ୟକ୍ଷ ପଦରୁ ବିଜୟ ପଟ୍ଟନାୟକଙ୍କୁ ହଟାଇ ଭକ୍ତ ଦାସଙ୍କୁ ଦାୟିତ୍ୱ ଦିଆଯାଇଛି । ଯଦିଓ ବିଜୟଙ୍କୁ ନିର୍ବାଚନ ସମନ୍ୱୟ କମିଟିର ଅଧ୍ୟକ୍ଷ ଭାବରେ ନୁଆ ନିଯୁକ୍ତି ମିଳିଛି, କିନ୍ତୁ କାହିଁକି ବିଜୟଙ୍କ ଦାୟିତ୍ୱ ପରିବର୍ତନ ହେଲା ତାକୁ ନେଇ ଅନେକ ପ୍ରଶ୍ନ ଉଠିଛି ।
Kanak News is now on WhatsApp
Join and get latest news updates delivered to you via WhatsApp
ନିର୍ବାଚନ ତାରିଖ ଘୋଷଣା ସରିଛି, ପ୍ରାର୍ଥୀ ଚୟନ ଚୂଡାନ୍ତ ପର୍ଯ୍ୟାୟରେ ପହଁଚିଛି, ଏହି ସମୟରେ ହଠାତ ପ୍ରଚାର କମିଟି ଅଧ୍ୟକ୍ଷଙ୍କୁ ବଦଳାଇ ଦେଇଛି କଂଗ୍ରେସ । ପ୍ରଚାର କମିଟି ଅଧ୍ୟକ୍ଷ ପଦରୁ ବିଜୟ ପଟ୍ଟନାୟକଙ୍କୁ ହଠାଇ ଭକ୍ତ ଦାସଙ୍କୁ ଦାୟିତ୍ୱ ଦେଇଛି ଏଆଇସିସି । ନୂଆ ଦାୟିତ୍ୱ ମିଳିବା ପରେ ଭକ୍ତଙ୍କୁ କଂଗ୍ରେସର ଯୁବ ଓ ଛାତ୍ର ନେତାମାନେ ଦିଲ୍ଲୀରେ ଭେଟି ତାଙ୍କୁ ସ୍ୱାଗତ ଜଣାଇଛନ୍ତି । ଭକ୍ତ କହିଛନ୍ତି, ଓଡିଶାରେ ନୂଆ ଢ଼ଂଗରେ ପ୍ରଚାର କରି କଂଗ୍ରେସ ଗ୍ୟାରେଂଟିକୁ ଲୋକଙ୍କ ପାଖରେ ପହଁଚାଇବି । ବିଧାନସଭା ଓ ଲୋକସଭାରେ କଂଗ୍ରେସ ଅଧିକ ଆସନ ଜିତିବା ପାଇଁ ଉଦ୍ୟମ କରିବି ।
ନିର୍ବାଚନ ପ୍ରଚାର ପାଇଁ ଯେତେବେଳେ ସବୁ ଦଳ ଲାଗି ପଡିଲେଣି ସେତିକିବେଳେ, କଂଗ୍ରେସ ପ୍ରଚାର କମିଟି ଅଧ୍ୟକ୍ଷଙ୍କୁ ପରିବର୍ତନ କରିବା ଚର୍ଚ୍ଚାର ବିଷୟ ହୋଇଛି । ବିଜୟଙ୍କୁ ନିର୍ବାଚନ ସମନ୍ୱୟ କମିଟି ଅଧ୍ୟକ୍ଷ ଦାୟିତ୍ୱ ଦିଆଯାଇଥିଲେ ବି କାହିକି ତାଙ୍କୁ ପ୍ରଚାର କମିଟିରୁ ହଟାଇ ଦିଆଗଲା, ତାହା କଂଗ୍ରେସ ମହଲରେ ଚର୍ଚ୍ଚା ସୃଷ୍ଟି କରିଛି । ନିର୍ବାଚନ ପୂର୍ବରୁ ଶୀର୍ଷ ନେତୃତ୍ୱ ଏଭଳି ଗୋଟିଏ ନିଷ୍ପତି କାହିଁକି ନେଲେ, ତାକୁ ନେଇ ପ୍ରଶ୍ନ ସୃଷ୍ଟି ହୋଇଛି । କୁହାଯାଉଛି, ଦୁଇଟି ଇସ୍ତାହାର ପ୍ରକାଶକୁ ନେଇ ବିବାଦ ଓ ଇସ୍ତାହାରକୁ ନେଇ ପଂଚାନନ କାନୁନଗୋଙ୍କ ବିଜୟଙ୍କ ବିରୋଧରେ ଅଭିଯୋଗ ପରେ ଦଳୀୟ ଅସନ୍ତୋଷ ଦେଖା ଦେଇଥିଲା । ଏଥିସହ କିଛି କଂଗ୍ରେସ ନେତା ଦିଲ୍ଲୀରେ ବିଜୟଙ୍କ ବିରୋଧରେ ଅଭିଯୋଗ କରିଥିଲେ । ଯାହାଫଳରେ ଏଭଳି ପରିବର୍ତନ ହୋଇପାରିଥାଇପାରେ ବୋଲି କୁହାଯାଉଛି । ତେବେ ନିର୍ବାଚନ ସମୟରେ ସମନ୍ୱୟର ଏକ ଗୁରୁତ୍ୱପୂର୍ଣ୍ଣ ଭୂମିକା ରହିଥାଏ ତେଣୁ ଏଆଇସିସି ତାଙ୍କୁ ଏହି ଦାୟିତ୍ୱ ଦେଇଛି । ତେବେ ନେତାଙ୍କ ବାଦ ବିବାଦ ଭିତରେ କଂଗ୍ରେସ କେତେ ସଫଳ ହେଉଛି, ତାହା ଆଗାମି ଦିନରେ ସ୍ପଷ୍ଟ ହେବ ।