କନକ ବ୍ୟୁରୋ: ରାଜଧାନୀରେ ମାତିଛନ୍ତି ଲୁଟେରା । ଏହି ଲୁଟେରାଙ୍କ ଟାର୍ଗେଟରେ ବର୍ତ୍ତମାନ ନୀରିହ ବସଯାତ୍ରୀ । ଦିନକୁ ଦିନ ଭୁବନେଶ୍ୱରରେ ବସରେ ଲୁଟ ବଢିଚାଲିଛି । ଆଉ ଗରିବ ଯାତ୍ରୀ ମାନେ ଏହାର ଶିକାର ହେବାରେ ଲାଗିଛନ୍ତି । ବିଶେଷ କରି ବସରେ ମୋବାଇଲ ଏବଂ ପର୍ସକୁ ଟାର୍ଗେଟ କରାଯାଉଛି । ଯାହାର ଉଦାହରଣ ହେଉଛି ୧୮ ନଂ ବସ । ୧୮ ନଂ ରୁଟରେ ଯାଉଥିବା ଏହି ବସରୁ ଦାମୀ ମୋବାଇଲ ଲୁଟ ହୋଇଛି । ଫାୟାର ଷ୍ଟେସନ ଏବଂ ଜୟଦେବ ବିହାର ଛକରୁ ଏହି ଚୋରୀ ହୋଇଥିବା ବେଳେ ଚିନ୍ତାରେ ଯାତ୍ରୀ । ତେବେ ସବୁଠାରୁ ବଡ କଥା, ଯାତ୍ରୀ ଭାବେ ଆସି ଅନ୍ୟ ଯାତ୍ରୀଙ୍କୁ ଲୁଟ କରାଯାଉଛି । ଆଉ ବସର କର୍ମଚାରୀଙ୍କୁ ଯେତେବେଳେ ଗାଡି ଅଟକାଇବା ପାଇଁ କୁହାଯାଉଛି ସେମାନେ ଶୁଣିବାକୁ ନାରାଜ ।
Kanak News is now on WhatsApp
Join and get latest news updates delivered to you via WhatsApp
ଯେତେବେଳେ ଯାତ୍ରୀ ଜଣଙ୍କ କହୁଛନ୍ତି ଯେ ବସରେ ଲୁଟେରା ରହିଛି ଗାଡି ଅଟକାଯାଉ, ସେତେବେଳେ ଗାଡିର କର୍ମଚାରୀ ଗାଡି ଅଟକାଉନାହାନ୍ତି । ସେହିଭଳି ଅନେକ ସମୟରେ କର୍ମଚାରୀ ମାନେ ନିଶାସେବନ କରି ଗାଡି ଚଳାଉଥିବା ମଧ୍ୟ ଅଭିଯୋଗ ହୋଇଛି । ତେଣୁ ଅସାଧୁ କର୍ମଚାରୀ ମଧ୍ୟ ଏଥିରେ ସାମିଲ ଥିବା ସନ୍ଦେହ କରାଯାଉଛି । ଗୋଟିଏ ପଟେ ସ୍ମାର୍ଟ ସିଟି, ସ୍ମାର୍ଟ ବସ କହି ପୁରସ୍କାର ପାଉଥିବା ବେଳେ ବର୍ତ୍ତମାନ ଏଭଳି ଚିତ୍ର ନିହାତି ଅନେକ ପ୍ରଶ୍ନ ସୃଷ୍ଟି କରୁଛି । ବସରେ ସିସିଟିଭି ଥାଇ ମଧ୍ୟ ଏହା ଲୋକଙ୍କ କାମରେ ଆସିପାରୁନାହିଁ । ବର୍ତ୍ତମାନ ଏନେଇ ନୟାପଲ୍ଲୀ ଥାନାରେ ଦୁଇଟି ମାମଲା ରୁଜୁ କରିଛନ୍ତି ଚୋରୀର ଶିକାର ବ୍ୟକ୍ତି ।
ରାଜଧାନୀରେ ଦିନକୁ ଦିନ ଆଇନଶୃଙ୍ଖଳା ପରିସ୍ଥିତି ବିଗିଡିବାରେ ଲାଗିଛି । ଚୋର, ଡକାୟତ, ନିଶା କାରବାର ବଢିଚାଲିଛି । ମୋ ବସ ମଧ୍ୟ ଚୋର, ଅସାମାଜିକ ବ୍ୟକ୍ତିଙ୍କ ଆଡ୍ଡାସ୍ଥଳୀ ପାଲଟିଗଲାଣି । କମିଶନରେଟ ପୋଲିସ ବର୍ତ୍ତମାନ ଯଦି ଏଥିପ୍ରତି ଦୃଷ୍ଟି ନଦିଏ ତେବେ ଆଗାମୀ ଦିନରେ ଏଭଳି ସମସ୍ୟା ବଢିବାରେ ଲାଗିବ ।