ଆମେରିକା ଏବଂ ୟୁରୋପରେ ବ୍ୟାଙ୍କିଂ କ୍ଷେତ୍ରରେ ସଙ୍କଟ : ବଢିଲା ସୁନା ଦର; ଚିନ୍ତାରେ ଗ୍ରାହକ ଓ ଦୋକାନୀ
କନକ ବ୍ୟୁରୋ : ଆମେରିକା ଏବଂ ୟୁରୋପରେ ବ୍ୟାଙ୍କିଂ କ୍ଷେତ୍ରରେ ଦେଖାଦେଇଥିବା ସଙ୍କଟ ଯୋଗୁଁ ସାରା ବିଶ୍ୱ ଅର୍ଥନୀତି ପ୍ରଭାବିତ ହୋଇଛି । ଫଳରେ ସୁନା ବଜାର ମଧ୍ୟ ପ୍ରଭାବିତ ହୋଇଛି । ସୁନା, ରୂପା ଦରରେ ନିଆଁ ଲାଗିଯାଇଛି । ସୁନା, ରୂପା ଦାମରେ ପ୍ରତିଦିନ ବୃଦ୍ଧି ଘଟୁଥିବା ବେଳେ ଗତ ୧୦ ଦିନ ମଧ୍ୟରେ ଭୁବନେଶ୍ୱରରେ ସୂନା ୧୦ ଗ୍ରାମ ପିଛା ଦର ୪ ହଜାର ୯୦୦ ଟଙ୍କା ବୃଦ୍ଧି ପାଇଛି । ସେହିପରି ରୂପା କିଲୋ ଦାମ ୫ ହଜାର ବୃଦ୍ଧି ପାଇଛି ।
Kanak News is now on WhatsApp
Join and get latest news updates delivered to you via WhatsApp
ଯଦି ବ୍ୟାଙ୍କି କ୍ଷେତ୍ରରେ ଦେଖାଦେଇଥିବା ଏହି ସଙ୍କଟର ଶୀଘ୍ର ସମାଧାନ ନହୁଏ, ତେବେ ଦାମ ଆହୁରୀ ବଢିବ ବୋଲି ବିଶେଷଜ୍ଞମାନେ ଆକଳନ କରିଛନ୍ତି । ଆମେରିକାର ସିଲିକନ ଭେଲି, ସିଗ୍ନେଚର ବ୍ୟାଙ୍କ ଏବଂ ସୁଇଜରଲାଣ୍ଡରେ କ୍ରେଡିଟ୍ ସୁଇସ୍ ବ୍ୟାଙ୍କ ଭଳି ବଡ ବଡ ବ୍ୟାଙ୍କ ବୁଡିଯିବା ଯୋଗୁ ଷ୍ଟକ ବଜାରରେ କାରବାର ମାନ୍ଦା ଚାଲିଥିବା ବେଳେ ସୂନା, ରୁପା ଦର ବୃଦ୍ଧି ପାଇବାରେ ଲାଗିଛି ।
ଜଣେ ଗହଣା ଦୋକାନୀଙ୍କ ସୂଚନା ମୁତାବକ, ଗତ ୧୦ ତାରିଖରେ ୨୨ କ୍ୟାରେଟ ସୂନାର ୧୦ ଗ୍ରାମର ମୂଲ୍ୟ ୫୦ ହଜାର ୫୦୦ ଥିବା ବେଳେ ଏବେ ୫୫ ହଜାର ୪୦୦ ଛୁଇଁଛି । ସେହିପରି ୨୪ କ୍ୟାରେଟ ସୂନାର ୧୦ ଗ୍ରାମର ମୂଲ୍ୟ ୫୭ ହଜାର ୬୨୦ ଥିବା ବେଳେ ଏବେ ୬୧ ହଜାର ୪୦୦ ଛୁଇଁଛି । ରୂପା କିଲୋ ୬୫ ହଜାର ଥିବା ବେଳେ ଏବେ ୭୦ ହଜାର ଛୁଇଛି । ବିବାହ ଋତୁରେ ଏଭଳି ସୂନା ଦର ବୃଦ୍ଧି ଉଭୟ ଗ୍ରାହକ ଏବଂ ଦୋକାନୀଙ୍କ ଚିନ୍ତା ବଢାଇ ଦେଇଛି ।