ପୁରୀ ପରିକ୍ରମା ପ୍ରକଳ୍ପକୁ ନେଇ ଏଏସଆଇର ରହସ୍ୟମୟ ନୀରବତା । କୋର୍ଟରେ ଦେଲେନି ତଥ୍ୟ. ମାଗିଲେ ସମୟ । ସାଂସଦ ଅପରାଜିତାଙ୍କ ସମର୍ଥନରେ ବିଶାଳ ପଦଯାତ୍ରା ପାଇଁ ଚାଲିଛି ପ୍ରସ୍ତୁତି!
କନକ ବ୍ୟୁରୋ : ପୁରୀ ଶ୍ରୀମନ୍ଦିର ପରିକ୍ରମା ପ୍ରକଳ୍ପକୁ ନେଇ ହାଇକୋର୍ଟରେ ହୋଇଥିବା ଜନସ୍ୱାର୍ଥ ମାମଲାର ଶୁଣାଣି ଆସନ୍ତା ମାସକୁ ଘୁଞ୍ଚିଛି । ବିଭିନ୍ନ ସମୟରେ ଚିଠି ଲେଖି କାମ ବନ୍ଦ କରିବାକୁ କହୁଥିବା ଏଏସଆଇର ଆଞ୍ଚଳିକ କାର୍ଯ୍ୟାଳୟ ପକ୍ଷରୁ ତଥ୍ୟ ଦାଖଲ ପାଇଁ ଅଧିକ ସମୟ ମଗାଯିବାରୁ କୋର୍ଟ ଶୁଣାଣିକୁ ବିଳମ୍ବିତ କରିଛନ୍ତି । ରାଜ୍ୟ ସରକାରଙ୍କ ସହ ଯୁଗ୍ମ ବିଶେଷଜ୍ଞ ଦଳ ଗଠନ କରି ପରିଦର୍ଶନ ପରେ ରିପୋର୍ଟ ଦେବାକୁ ଖଣ୍ଡପୀଠ ନିର୍ଦ୍ଦେଶ ଦେଇଛନ୍ତି । ଅନ୍ୟପଟେ ଶ୍ରୀମନ୍ଦିର ପରିଦର୍ଶନରେ ଆସିଥିବା ଶ୍ରୀମନ୍ଦିର ଏଏସଆଇ ଏଡିଜି ମଧ୍ୟ ମୁହଁ ଖୋଲି ନାହାଁନ୍ତି । ଯାହକି ଏଏସଆଇର ଆଭିମୁଖ୍ୟ ଉପରେ ପ୍ରଶ୍ନବାଚୀ ସୃଷ୍ଟି କରିଛି ।
Kanak News is now on WhatsApp
Join and get latest news updates delivered to you via WhatsApp
ପୂର୍ବ ନିର୍ଦ୍ଧାରିତ ତାରିଖ ଅନୁସାରେ ପୁରୀ ଶ୍ରୀମନ୍ଦିର ପରିକ୍ରମା ପ୍ରକଳ୍ପକୁ ନେଇ ହାଇକୋର୍ଟରେ ହୋଇଥିବା ଜନସ୍ୱାର୍ଥ ମାମଲାର ଶୁଣାଣି ହୋଇଛି । ହେଲେ, ବିଡମ୍ବନାର କଥା ହେଉଛି, ଯେଉଁ ପ୍ରସଙ୍ଗକୁ ନେଇ କୋଟି କୋଟି ଓଡିଆଙ୍କ ଭିତରେ ସନ୍ଦେହ ସୃଷ୍ଟି ହୋଇଛିି, ସେହି ପ୍ରସଙ୍ଗରେ କୋର୍ଟଙ୍କୁ କୌଣସି ରିପୋର୍ଟ ନଦେଇ ଅଧିକ ସମୟ ମାଗିଛି ଭାରତୀୟ ପ୍ରତ୍ନତତ୍ୱ ବିଭାଗ । ଏହି କେନ୍ଦ୍ରୀୟ ସଂସ୍ଥା ପକ୍ଷରୁ କୁହାଯାଇଛି ମନ୍ଦିର ଚତୁଃପାଶ୍ୱର୍ରେ ଖନନ ଓ ନିର୍ମାଣ ମାମଲା ନେଇ ବିସ୍ତୃତ ତଥ୍ୟ ରଖିବା ପାଇଁ ଅଧିକ ସମୟ ଦିଆଯାଉ । ଆଉ କୋର୍ଟ ଏଏସଆଇର ଅନୁରୋଧକୁ ଗ୍ରହଣ କରି ସମୟ ବି ଦେଇଛନ୍ତି । ଏଥିସହ ରାଜ୍ୟ ସରକାର ଓ ଏଏସଆଇର ବିଶେଷଜ୍ଞ ଟିମ ଦ୍ୱାରା ପ୍ରକଳ୍ପ ସ୍ଥଳକୁ ଯାଇ ମିଳିତ ପରିଦର୍ଶନ କରି ରିପୋର୍ଟ ଦେବାକୁ ନିର୍ଦ୍ଦେଶ ଦେଇଛନ୍ତିି ।
ଶ୍ରୀମନ୍ଦିର ଚାରିପଟେ ଚାଲିଥିବା ନିର୍ମାଣ କାର୍ଯ୍ୟକୁ ନେଇ ପ୍ରଶ୍ନ ଉଠାଇବା ସହ କାର୍ଯ୍ୟ ବନ୍ଦ କରିବାକୁ ଫେବ୍ରୁଆରୀ ମାସରେ ଚିଠି ଲେଖିଥିଲେ ଏଏସଆଇର ଆଞ୍ଚଳିକ ନିର୍ଦ୍ଦେଶକ । ହେଲେ, ଏବେ ଚିଠିରେ ଲେଖିଥିବା କଥାକୁ ବି କୋର୍ଟରେ ଉପସ୍ଥାପନ କରିନି ଏଏସଆଇ । ଯାହାକି ସନ୍ଦେହକୁ ବଢ଼ାଇ ଦେଇଛି । ଶ୍ରୀମନ୍ଦିର ଚାରିପଟେ ବେଆଇନ ଭାବେ ଖନନ କରାଯାଉଥିବା ଦର୍ଶାଇ ହାଇକୋର୍ଟରେ ଏକ ଜନସ୍ୱାର୍ଥ ମାମଲା ରୁଜୁ ହୋଇଥିଲା । ଗତ ୮ତାରିଖରେ ମାମଲାର ଶୁଣାଣି କରି ୧୭ତାରିଖ ସୁଦ୍ଧା ପକ୍ଷ ରଖିବା ପାଇଁ ରାଜ୍ୟ ସରକାର ଓ ଏଏସଆଇକୁ ନିର୍ଦ୍ଦେଶ ଦେଇଥିଲେ କୋର୍ଟ । କିନ୍ତୁ ଏଏସଆଇର ନୀରବତା ଯୋଗୁଁ ନିର୍ମାଣ କାର୍ଯ୍ୟ ଉପରେ ରହିତାଦେଶ ଜାରି କରିନାହାଁନ୍ତିି କୋର୍ଟ । ଅର୍ଥାତ ଏବେ ନିର୍ମାଣ କାର୍ଯ୍ୟ ଯେମିତି ଚାଲୁଥିଲା ସେମିତି ଚାଲିବ । ଆଉ ପରବର୍ତି ଶୁଣାଣି ବେଳକୁ କାର୍ଯ୍ୟ ଶେଷ ହୋଇଯାଇପାରେ ବୋଲି ଆଶଙ୍କା ପ୍ରକାଶ ପାଇଛି ।
ଅନ୍ୟପଟେ ପୁରୀ ପ୍ରକଳ୍ପ ସ୍ଥଳରେ ବୁଲି ଦେଖିବା ପରେ ବି ଏଏସଆଇ ଅଧିକାରୀ କିଛି କହିନାହାଁନ୍ତି । ପୁରୀରେ ପହଁଚିଥିବା ସଂସଦୀୟ ଷ୍ଟାଣ୍ଡିଂ କମିଟି ସଦସ୍ୟ ମଧ୍ୟ ମିଶ୍ରିତ ପ୍ରତିକ୍ରିୟା ଦେଇଛନ୍ତି । ଶ୍ରୀମନ୍ଦିର ପରିକ୍ରମା ପ୍ରକଳ୍ପକୁ ଏଏସଆଇର ନୀରବତା ଓ ରାଜ୍ୟ ସରକାରଙ୍କ ଆଭୁମୁଖ୍ୟକୁ ନେଇ ଅସନ୍ତୋଷ ତୀବ୍ର ହେବାରେ ଲାଗିଛି । ଏପରିକି ଆଗକୁ ଭୁବନେଶ୍ୱର ସାଂସଦଙ୍କ ପରୋକ୍ଷ ସମର୍ଥନରେ ଏକ ବଡ ଧରଣର ପଦଯାତ୍ରା କରିବାକୁ ପ୍ରସ୍ତୁତି ଚାଲିଥିବା ସୂଚନା ମିଳିଛି ।