ପ୍ରଦର୍ଶନକାରୀ କୁସ୍ତିଯୋଦ୍ଧାଙ୍କ ସହ କ୍ରୀଡା ମନ୍ତ୍ରୀଙ୍କ ୫ ଘଣ୍ଟାର ବୈଠକ । ଅନୁରାଗ ଠାକୁର କହିଲେ, ଜୁନ ୧୫ ତାରିଖ ସୁଦ୍ଧା ଦିଲ୍ଲୀ ପୋଲିସ ପୂରା କରିବ ଯାଂଚ
କନକ ବ୍ୟୁରୋ : ଗୋଟିଏ ମାସରୁ ଅଧିକ ସମୟ ଧରି ଧାରଣାରେ ବସିଥିବା କୁସ୍ତିଯୋଦ୍ଧାଙ୍କ ସହ ଆଜି କ୍ରୀଡାମନ୍ତ୍ରୀ ଅନୁରାଗ ଠାକୁର ବୈଠକ କରିଛନ୍ତି । ଏହି ବୈଠକରେ ଅଲମ୍ପିକରେ କାଂସ୍ୟପଦକ ବିଜେତା ବଜରଙ୍ଗ ପୁନିଆ ନେତୃତ୍ୱ ନେଇଥିଲେ । ସେ ଏକା ହିଁ ଅନୁରାଗ ଠାକୁରଙ୍କ ସହ କଥା ହୋଇଥିଲେ ।
Kanak News is now on WhatsApp
Join and get latest news updates delivered to you via WhatsApp
ବୈଠକ ପରେ ଅନୁରାଗ ଠାକୁର କହିଛନ୍ତି କି ପ୍ରଦର୍ଶନକାରୀ କୁସ୍ତିଯୋଦ୍ଧାଙ୍କ ସହ ହୋଇଥିବା ବୈଠକ ଆଗକୁ ସମସ୍ୟାର ସମଧାନ କରିପାରିବ ବୋଲି ଅନୁମାନ କରାଯାଉଛି । ଏହା ସହ ବ୍ରିଜଭୂଷଣଙ୍କ ନାମରେ ହୋଇଥିବା ଅଭିଯୋଗ ଉପରେ ଦିଲ୍ଲୀ ପୋଲିସ ଜୁନ ୧୫ ତାରିଖ ସୁଦ୍ଧା ଯାଂଚ ସମାପ୍ତ କରିବ ବୋଲି ସେ କହିଛନ୍ତି । ମନ୍ତ୍ରୀ କହିଛନ୍ତି କି ଭାରତୀୟ କୁସ୍ତିସଂଘର ନିର୍ବାଚନ ନେଇ ମଧ୍ୟ ଆଲୋଚନା ହୋଇଛି । ଏହାସହ ୩ଥର ସଭାପତି ଥିବା ବ୍ରିଜଭୂଷଣ ସିଂଙ୍କୁ ଭାରତୀୟ କୁସ୍ତିସଂଘରୁ ଦୂରେଇ ରଖିବାକୁ କୁସ୍ତିଯୋଦ୍ଧାମାନେ ଦାବି କରିଥିବା କଥା ମଧ୍ୟ ଅନୁରାଗ ଠାକୁର କହିଛନ୍ତି ।
ସେପଟେ ଖେଳାଳୀ ଓ କୁସ୍ତିଯୋଦ୍ଧାଙ୍କ ଉପରେ ଦିଲ୍ଲୀ ପୋଲିସ ରୁଜୁ କରିଥିବା ମାମଲା ପ୍ରତ୍ୟାହାର ପାଇଁ ବଜରଙ୍ଗ ପୁନିଆ ଦାବି କରିଥିବା କଥା କ୍ରୀଡାମନ୍ତ୍ରୀ କହିଛନ୍ତି । ଏହାସହ ଆଲୋଚନା ଉଭୟଙ୍କ ସହମତିରେ ହୋଇଛି । ଏହାପରେ ଖେଳାଳୀମାନେ ସେମାନଙ୍କ ଲୋକଙ୍କ ସହ ଆଲୋଚନା କରିବେ ବୋଲି କ୍ରୀଡାମନ୍ତ୍ରୀ କହିଛନ୍ତି ।
ଅନ୍ୟପଟେ ବୈଠକ ପରେ ପ୍ରଦର୍ଶନକାରୀ କୁସ୍ତିଯୋଦ୍ଧାମାନେ କହିଛନ୍ତି କି, ଜୁନ ୧୫ ପର୍ଯ୍ୟନ୍ତ ଆନ୍ଦୋଳନ ସ୍ଥଗିତ ରଖାଯିବ । ଏହାସହ ସୂତ୍ର ସୂଚନା ମୁତାବକ ଅନୁରାଗ ଠାକୁର କୁସ୍ତିଯୋଦ୍ଧାଙ୍କୁ ଆଶ୍ୱାସନା ଦେଇଛନ୍ତି କି, ବ୍ରିଜଭୂଷଣଙ୍କ ବିରୋଧରେ ମଜବୁତ ଚାର୍ଜସିଟ୍ ପ୍ରସ୍ତୁତ କରାଯାଉଛି ।