କନକ ବ୍ୟୁରୋ: ଭାଇରାଲ୍ ହେଉଥିବା ଏହି ଭିଡିଓକୁ ନେଇ ସାରା ରାଜ୍ୟରେ ଚର୍ଚ୍ଚା । ମୋବାଇଲ୍ ଟାୱାର ପାଇଁ ପୌର ନିର୍ବାହୀ ଅଧିକାରୀଙ୍କ ଅନୁମତି ନେଇ ଉତକ୍ଷିପ୍ତ ହୋଇ ଉଠିଥିଲେ ବ୍ୟାସନଗର ପୌରାଧ୍ୟକ୍ଷା ସଙ୍ଗୀତା ପିଙ୍ଗୁଆ । ରାଗ ତାଙ୍କର ପଞ୍ଚମକୁ ଉଠିଯାଇଥିଲା । ଗାଳି ଦେବା ସହ ନିର୍ବାହୀ ଅଧିକାରୀ ଅଶୋକ ରାଉତଙ୍କ ଉପରକୁ ଫାଇଲ୍ ଫିଙ୍ଗିଥିଲେ । ତୁରନ୍ତ ଏନଓସି ବାତିଲ୍ କରିବାକୁ ନିର୍ଦ୍ଦେଶ ଦେଇଥିଲେ ପୌରାଧ୍ୟକ୍ଷା ।
Kanak News is now on WhatsApp
Join and get latest news updates delivered to you via WhatsApp
ବ୍ୟାସନଗର ପୌରପାଳିକା କାର୍ଯ୍ୟାଳୟରେ ଆଲୋଚନା ଚାଲିଥିବା ବେଳେ ପୌରାଧ୍ୟକ୍ଷାଙ୍କ ଏପରି ରୂପ ଦେଖି ସମସ୍ତେ ନିରବ ହୋଇ ଯାଇଥିଲେ । ପୌରଧ୍ୟକ୍ଷାଙ୍କ ଅଶାଳୀନ ବ୍ୟବହାର ଓ ଫାଇଲ ଫୋପାଡିବା ଚିତ୍ର ସୋସିଆଲ୍ ମିଡିଆରେ ଭାଇରାଲ ହେବା ପରେ ସାମନାକୁ ଆସିଥିଲା ପୂରା ଘଟଣା । ନିର୍ବାହୀ ଅଧିକାରୀ ଅଶୋକ ରାଉତ ଅଭିଯୋଗ କରିଛନ୍ତି, ତାଙ୍କ ଛାତି ଉପରକୁ ଲକ୍ଷ୍ୟ କରି ଫାଇଲ ଫିଙ୍ଗିଥିଲେ ପୌରାଧ୍ୟକ୍ଷା । ଅନେକ ଥର ତାଙ୍କ ସହ ଏପରି ଦୁର୍ବ୍ୟବହାର କରିଥାନ୍ତି ସଙ୍ଗୀତା ପିଙ୍ଗୁଆ । କିନ୍ତୁ ପୌରାଧ୍ୟକ୍ଷା କହିଛନ୍ତି, ମୋବାଇଲ୍ ଟାୱାରକୁ ଅନେକ ଲୋକ ବିରୋଧ କରୁଥିବାରୁ ଅନୁମତି ଦିଆଯାଇଥିବା ଜାଣି ସେ କ୍ଷୁବ୍ଧ ହୋଇଥିଲେ । ସେ ଫାଇଲ୍ ଫିଙ୍ଗିନାହାନ୍ତି, ଏନଓସିକୁ ବାତିଲ କରିବା ପାଇଁ ଫାଇଲ୍ ଫେରାଇ ଦେଇଥିଲେ ।
ନିର୍ବାହୀ ଅଧିକାରୀଙ୍କ କହିବା କଥା ୮ନମ୍ବର ୱାର୍ଡରେ ମୋବାଇଲ୍ ଟାୱାର ସ୍ଥାପନ ପାଇଁ ୱାର୍ଡବାସୀ ଅନୁରୋଧ କରିଥିଲେ । ଅନୁମତି ପାଇଁ କାଉନସିଲର ମଧ୍ୟ ଦସ୍ତଖତ କରିଥିଲେ । ଏପଟେ ପୌରଧ୍ୟକ୍ଷା କହିଛନ୍ତି, ମୋବାଇଲ୍ ଟାୱାରକୁ ସ୍ଥାନୀୟ ଲୋକ ବିରୋଧ କରୁଥିଲେ । ଫିଲ୍ଡ ଭେରିଫିକସନ୍ ପରେ ଏଠାରେ ମୋବାଇଲ୍ ଟାୱାର କରିବାକୁ ମନା କରାଯାଇଥିଲା । ଏହାସତ୍ୱେ ଏନଓସି ଦେଇଥିଲେ ନିର୍ବାହୀ ଅଧିକାରୀ । ଏହାରି ଭିତରେ ନିର୍ବାହୀ ଅଧିକାରୀ ଅଶୋକ ରାଉତଙ୍କୁ ବଦଳି କରାଯାଇଛି । ତେବେ ଭାଇରାଲ ହୋଇଥିବା ଏହି ଭିଡିଓକୁ ନେଇ ଜୋରଦାର ଚର୍ଚ୍ଚା ହେଉଛି ।