ପଦ୍ମପୁରକୁ ଜିଲ୍ଲା ମାନ୍ୟତା ! ‘ପ୍ରତିଶ୍ରୁତି ଦେଲେ ନବୀନ’ ବିଜେପିର କଟାକ୍ଷ ‘ଉପନିର୍ବାଚନକୁ ଦେଖି ମୁଖ୍ୟମନ୍ତ୍ରୀଙ୍କ ନିଦ ଭାଙ୍ଗିଛି ।
କନକ ବ୍ୟୁରୋ: ଓଡିଶାର ଜିଲ୍ଲା ସଂଖ୍ୟା ତାଲିକାରେ ଯୋଡି ହେବ ଆଉ ଏକ ଜିଲ୍ଲା । ପଦ୍ମପୁର ଉପଖଣ୍ଡ ହେବ ଓଡିଶାର ୩୧ତମ ଜିଲ୍ଲା । ଅର୍ଥାତ ରାଜ୍ୟର ଜିଲ୍ଲା ସଂଖ୍ୟା ୩୦ରୁ ବୃଦ୍ଧି ପାଇ ୩୧ରେ ପହଁଚିବ । ଉପନିର୍ବାଚନରେ ପଦ୍ମପୁର ଉପଖଣ୍ଡକୁ ଜିଲ୍ଲା ମାନ୍ୟତା ଦାବି ପ୍ରମୁଖ ପ୍ରସଙ୍ଗ ପାଲଟିଥିବାବେଳେ, ମୁଖ୍ୟମନ୍ତ୍ରୀଙ୍କୁ ଭେଟି ଆଲୋଚନା କରିବା ପରେ ଏହି ସୂଚନା ଦେଇଛନ୍ତି କ୍ରିୟାନୁଷ୍ଠାନ କମିଟିର ସଦସ୍ୟ । ପଦ୍ମପୁର ଉପଖଣ୍ଡକୁ ଜିଲ୍ଲା ମାନ୍ୟତା ଦାବିରେ ଆନ୍ଦୋଳନ ଚାଲି ଥିବାବେଳେ, ଭୁବନେଶ୍ୱରରେ ନବୀନ ପଟ୍ଟନାୟକଙ୍କୁ ଭେଟି ଆଲୋଚନା କରିଥିଲେ କ୍ରିୟାନୁଷ୍ଠାନ କମିଟି ସଦସ୍ୟ । ନବୀନଙ୍କ ସହ ବୈଠକ ପରେ କ୍ରିୟାନୁଷ୍ଠାନ କମିଟିର ଆବାହକ କହିଛନ୍ତି, ଆଲୋଚନା ସଫଳ ହୋଇଛି । ‘ପଦ୍ମପୁରକୁ ଜିଲ୍ଳା ମାନ୍ୟତା ଦେବାକୁ ମୁଖ୍ୟମନ୍ତ୍ରୀ ପ୍ରତିଶ୍ରୁତି ଦେଇଛନ୍ତି’ । ‘ଆଚରଣ ବିଧି ଲାଗୁ ହୋଇଥିବାରୁ ବର୍ତ୍ତମାନ ଘୋଷଣା ହୋଇପାରୁନି’ ।
Kanak News is now on WhatsApp
Join and get latest news updates delivered to you via WhatsApp
ପଦ୍ମପୁର ଉପଖଣ୍ଡକୁ ଜିଲ୍ଲା ମାନ୍ୟତା ଦାବି ନେଇ ଅର୍ଥମନ୍ତ୍ରୀ ନିରଞ୍ଜନ ପୂଜାରୀଙ୍କ ନେତୃତ୍ୱରେ କ୍ରିୟାନୁଷ୍ଠାନ କମିଟିର ସଦସ୍ୟ ମୁଖ୍ୟମନ୍ତ୍ରୀଙ୍କୁ ଭେଟିଥିଲେ । ବିଧାୟକ ସୁଶାନ୍ତ ସିଂ ମଧ୍ୟ ଆଲୋଚନା ସମୟରେ ଉପସ୍ଥିତ ଥିଲେ । ଆଲୋଚନା ପରେ ନିରଞ୍ଜନ ପୂଜାରୀ କହିଛନ୍ତି, କ୍ରିୟାନୁଷ୍ଠାନ କମିଟିକୁ ମୁଖ୍ୟମନ୍ତ୍ରୀ ଆଲୋଚନା ପାଇଁ ଆମନ୍ତ୍ରଣ କରିଥିଲେ । ମୁଖ୍ୟମନ୍ତ୍ରୀ ସେମାନଙ୍କ ସହ ଆଲୋଚନା କରିଛନ୍ତି । ପଦ୍ମପୁର ଉପଖଣ୍ଡକୁ ଜିଲ୍ଲା ଘୋଷଣା କରିବା ପାଇଁ ବିଜେଡି ପ୍ରତିଶ୍ରୁତିବଦ୍ଧ । ବିଜେଡିର ଉପନିର୍ବାଚନ ଇସ୍ତାହାରରେ ଏହାକୁ ପ୍ରକାଶ କରାଯିବ ।
ପଦ୍ମପୁର ଉପଖଣ୍ଡକୁ ଜିଲ୍ଲା ମାନ୍ୟତା ଦେବାକୁ ମୁଖ୍ୟମନ୍ତ୍ରୀ ପ୍ରତିଶ୍ରୁତି ଦେବା ପରେ କଟାକ୍ଷ କରିଛି ବିଜେପି । ବିଜେପି ନେତା କହିଛନ୍ତିି, ପଦ୍ମପୁରକୁ ଜିଲ୍ଲା ମାନ୍ୟତା ଦେବାକୁ ପ୍ରଦୀପ ପୁରୋହିତ ୨୦୧୮ରେ ମୁଖ୍ୟମନ୍ତ୍ରୀଙ୍କୁ ଚିଠି ଲେଖିଥିଲେ । ବିଧାନସଭାରେ ଦାବି ଉଠାଇଥିଲେ, କିନ୍ତୁ ତକ୍ରାଳିନ ମନ୍ତ୍ରୀ କହିଥିଲେ ସେମିତି କୌଣସି ପ୍ରସ୍ତାବ ନାହିଁ । ନିର୍ବାଚନ ଜିତିବା ପାଇଁ ମିଛ ପ୍ରତିଶ୍ରୁତି ଦେଇଛନ୍ତି ମୁଖ୍ୟମନ୍ତ୍ରୀ ।
ଦୀର୍ଘ ବର୍ଷ ହେବ ପଦ୍ମପୁର ଉପଖଣ୍ଡକୁ ଜିଲ୍ଲା ମାନ୍ୟତା ଦେବାକୁ ଦାବି କରି ଆସୁଛନ୍ତି ପଦ୍ମପୁରବାସୀ । ଜିଲ୍ଳା ମାନ୍ୟତା ଦେବାକୁ ପୂର୍ବରୁ ପ୍ରତିଶ୍ରୁତି ବି ମିଳିଛି । ହେଲେ, ଏବେ ନବୀନ ଦେଇଥିବା ପ୍ରତିଶ୍ରୁତି ପାଳନ ହେବ ନା ପୁଣି ଅପେକ୍ଷା କରିବା ପାଇଁ ପଡିବ ପଦ୍ମପୁରବାସୀଙ୍କୁ ।