କନକ ବ୍ୟୁରୋ: ରାମ ମନ୍ଦିରର ପାଂଚ କିଲୋମିଟର ପରିଧି ଭିତରେ ବିଧାୟକ, ମେୟର, ପ୍ରଶାସନିକ ଅଧିକାରୀ ସମ୍ପର୍କୀୟଙ୍କ ନାମରେ ଜମି କିଣିଥିବା ଅଭିଯୋଗ । ବିଧାନସଭା ନିର୍ବାଚନ ବେଳେ ଏପରି ଅଭିଯୋଗ ରାଜନୀତିର ପାରା ବଢାଇଛିି । ବିଏସପି, ଆମ୍ ଆଦାମୀ ପାର୍ଟି ଏବଂ ସମାଜବାଦୀ ପାର୍ଟି ପରେ ଏବେ କଂଗ୍ରେସ ମଧ୍ୟ ଏ ପ୍ରସଙ୍ଗରେ ସରକାର ଉପରେ ବର୍ଷିଛି । ସାମ୍ବାଦିକ ସମ୍ମିଳନୀ କରି କଂଗ୍ରେସ ନେତ୍ରୀ ପ୍ରିୟଙ୍କା ଗାନ୍ଧୀ କହିଛନ୍ତି କିଭଳି ଗୋଟିଏ ଜମିକୁ ଦୁଇ ଥର ବିକ୍ରି ହୋଇଛି । ଏଥିରେ ଯୋଗୀ ସରକାରର ନେତା ଏବଂ ଅଫିସର ସାମିଲ ଅଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଏପରି ଦୁର୍ନୀତି ରାମ ମନ୍ଦିର ତିଆରି ନାଁରେ କୋଟି କୋଟି ଲୋକଙ୍କ ଆସ୍ଥାକୁ ଧୋକ୍କା ଦେଇଛି ବୋଲି ସେ ଅଭିଯୋଗ କରିଛନ୍ତି । ହାଇକୋର୍ଟଙ୍କ ତତ୍ୱାବଧାନରେ ଏହାର ତଦନ୍ତ ହେବା ଦରକାର ବୋଲି ସେ ଦାବି କରିଛନ୍ତି । ଅନ୍ୟପଟେ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ସପ୍ତାହେ ମଧ୍ୟରେ ଏହି ପ୍ରସଙ୍ଗରେ ତଦନ୍ତ କରି ରିପୋର୍ଟ ଦେବାକୁ ନିର୍ଦ୍ଦେଶ ଦେଇଛନ୍ତି ।
ସୁପ୍ରିମକୋର୍ଟ ନଭେମ୍ବର ୯, ୨୦୧୯ରେ ଅଯୋଧ୍ୟା ପ୍ରସଙ୍ଗରେ ରାୟ ଦେଇଥିଲେ । ଏହାପରେ ୨୮ ମେ ୨୦୨୦ରେ ଅଯୋଧ୍ୟାର ତକ୍ରାଳୀନ ଜିଲ୍ଲାପାଳ ଅନୁଜ ଝାଙ୍କ ବାପା ଜମି କିଣିଥିବା ଜଣାପଡିଛି । ମୋଟ୍ ୧୫ ନେତା ଏବଂ ସରକାରୀ ଅଧିକାରାଙ୍କ ନାମ ଏଥିରେ ରହିଛି । ଅଧିକାଂଶ ପ୍ରଭାବଶାଳୀ, ମହର୍ଷି ରାମାୟଣ ବିଦ୍ୟାପୀଠ ନାମକ ଏକ ଟ୍ରଷ୍ଟ ପାଖରୁ ଜମି କିଣିଥିବା ଜଣାପଡିଛି । ସବୁଠୁ ବଡ କଥା ହେଲା ଏହି ଟ୍ରଷ୍ଟ ନାଁରେ ୧୯୯୦ରେ ଦଳିତ ଲୋକଙ୍କ ପାଖରୁ ବେଆଇନ ଭାବରେ ଜମି କିଣିଥିବାର ଅଭିଯୋଗ ରହିଛି । ଆଉ ଯେଉଁମାନେ ଏବେ ଜମି କିଣିଛନ୍ତି ସେଇମାନେ ହିଁ ଏହି ଦୁର୍ନୀତିର ତଦନ୍ତ କରୁଥିବା ଅଭିଯୋଗ ରହିଛି ।
ପୂର୍ବରୁ ମନ୍ଦିର ଟ୍ରଷ୍ଟ ନାଁରେ ଜମି ଉଚ୍ଚ ଦରରେ କିଣିଥିବା ଅଭିଯୋଗ ଆଉ ଏବେ ଶାସକ ଦଳର ନେତା ଏବଂ ସରକାରୀ ଅଧିକାରୀଙ୍କ ବିରୋଧରେ ଅଭିଯୋଗ ଯୋଗୀ ସରକାରର ଭାବମୂର୍ତି ଉପରେ ପ୍ରଶ୍ନବାଚୀ ସୃଷ୍ଟି କରିଛି ।