ଅବସର ପରେ ଜଷ୍ଟିସ ନାଜିର ଆନ୍ଧ୍ର ରାଜ୍ୟପାଳ ଭାବେ ନିଯୁକ୍ତ: ବିରୋଧୀ କହିଲେ ଯିଏ କରିବ ମୋଦୀ ସରକାରର କାମ ସେ ପାଇବ ନିଯୁକ୍ତି
କନକ ବ୍ୟୁରୋ: ଅଯୋଧ୍ୟା ଋାମ ମନ୍ଦିର, ଟ୍ରିପଲ ତଲାକ, ନୋଟ ବନ୍ଦୀ ଭଳି ଗୁରୁତ୍ୱପୂର୍ଣ୍ଣ ମାମଲାର ବିଚାରପତି ଥିଲେ ଜଷ୍ଟିସ ଅବଦୁଲ ଏସ ନାଜିର । ନିକଟରେ ସେ ଅବସର ଗ୍ରହଣ କରିଥିଲେ । ଶନିବାର ରାଷ୍ଟ୍ରପତି ଦ୍ରୌପଦୀ ମୁର୍ମୁ ତାଙ୍କୁ ଆନ୍ଧ୍ର ପ୍ରଦେଶର ନୂଆ ରାଜ୍ୟପାଳ ଭାବେ ନିଯୁକ୍ତି ଦେଇଛନ୍ତି । ଏହାକୁ ନେଇ ବିବାଦ ବଢିବାରେ ଲାଗିଛି । ମୁଖ୍ୟତଃ ଏହି ତିନି ପ୍ରସଙ୍ଗକୁ ନେଇ କଂଗ୍ରେସ ମୋଦୀ ସରକାରଙ୍କୁ ସମାଲୋଚନା କରିଆସୁଥିଲା । କିନ୍ତୁ ସୁପ୍ରିମକୋର୍ଟ ଯେଉଁ ରାୟ ଶୁଣାଇଛନ୍ତି ତାହା ବିରୋଧୀଙ୍କ ମୁହଁ ବନ୍ଦ କରିଦେଇଛି । ଆଉ ଯେଉଁ ବିଚାରପତି ଏହି ମାମଲା ସହ ଜଡିତଥିଲେ ସେ ଏବେ ରାଜ୍ୟପାଳ ଭାବେ ନିଯୁକ୍ତ ହୋଇଛନ୍ତି । କଂଗ୍ରେସ ଏହି ନିଯୁକ୍ତିଙ୍କୁ ନେଇ ସନ୍ଦେହ ପ୍ରକାଶ କରିବା ନ୍ୟାୟପାଳିକା ସ୍ୱାଧୀନତା ବିପଦରେ ଥିବା ଅଭିଯୋଗ ଆଣିଛି କଂଗ୍ରେସ ।
Kanak News is now on WhatsApp
Join and get latest news updates delivered to you via WhatsApp
କଂଗ୍ରେସର ସାଧାରଣ ସମ୍ପାଦକ ଜୟରାମ ରମେଶ ସ୍ୱର୍ଗତ ବିଜେପି ନେତା ତଥା ପୂର୍ବତନ ଆଇନ ମନ୍ତ୍ରୀ ଅରୁଣ ଜେଟଲିଙ୍କ ଏକ ଭିଡିଓ ଟୁଇଟ କରି ବିଜେପିକୁ ଟାର୍ଗେଟ କରିଛନ୍ତି । ଯେଉଁ ଭିଡିଓରେ ଜେଟଲି କହୁଛନ୍ତି, ଅବସର ପୂର୍ବରୁ ବିଚାରପତି ଦେଇଥିବା ରାୟ ଅବସର ପରେ ମିଳୁଥିବା ନିଯୁକ୍ତିକୁ ପ୍ରଭାବିତ କରିଥାଏ । ଅରୁଣ ଜେଟଲୀଙ୍କ ଏହି ଭିଡିଓ ୨୦୧୨ ମସିହାର । ଯେଉଁ ସମୟରେ କେନ୍ଦ୍ରରେ ବିରୋଧୀ ଆସନରେ ଥିଲା ବିଜେପି । ଆଉ କ୍ଷମତାର ଥିଲା କଂଗ୍ରେସ । କଂଗ୍ରେସ ସମେତ ଅନ୍ୟ ବିରୋଧୀ ଦଳ ରାଜ୍ୟପାଳ ନିଯୁକ୍ତି ନେଇ ପ୍ରଶ୍ନ ଉଠାଇବା ପରେ ଜବାବ ରଖିଛନ୍ତି ଆଇନ ମନ୍ତ୍ରୀ କିରଣ ରିଜିଜୁ । ସେ କହିଛନ୍ତି, ବିରୋଧ କରୁଥିବା ବ୍ୟକ୍ତି ବୁଝିବା ଦରକାର ଯେ ଭାରତ ଏବେ କେଉଁ ପରିବାର ନିୟନ୍ତ୍ରଣରେ ନାହିଁ । ସମ୍ବିଧାନର ନିୟମ ଅନୁଯାୟୀ ରାଜ୍ୟପାଳ ନିଯୁକ୍ତ କରାଯାଇଛି ।
ଜଷ୍ଟିସ୍ ଅବଦୁଲ ଏସ ନାଜିର ବାବ୍ରୀ ମସଜିଦ ମାମଲାର ଶୁଣାଣି ପାଇଁ ଗଠିତ ଖଣ୍ଡପୀଠରେ ଥିଲେ ଏକମାତ୍ର ମୁସଲିମ ବିଚାରପତି । କେବଳ ଜଷ୍ଟିସ୍ ନାଜିର ନୁହେଁ ଏହା ପୂର୍ବରୁ ସୁପ୍ରିମକୋର୍ଟର ପ୍ରଧାନ ବିଚାରପତି ଥିବା ଜଷ୍ଟିସ୍ ରଞ୍ଜନ ଗୋଗେଇଙ୍କୁ ଅବସର ପରେ ରାଜ୍ୟସଭା ପଠାଯାଇଥିବାର ନଜିର ରହିଛି । ଯଦିଓ ଏହା ସାମ୍ବିଧାନିକ ନିୟମ ଅନୁଯାୟୀ ହୋଇଛି, ହେଲେ ସୁପ୍ରମିକୋର୍ଟର ବିଚାରପତିଙ୍କୁ ଏଭଳି ନିଯୁକ୍ତି ନ୍ୟାୟପାଳିକାର ସ୍ୱାଧୀନତା ଉପରେ ପ୍ରଶ୍ନ ଉଠାଇଛି ।